1 REYES 20 - Guarani Bible with DC

Acab omoamɨri Siriaɨgua reta

1Mburuvicha guasu Ben-adad, Siria pegua, omboatɨ opaete isundaro reta, jare treinta y dos mburuvicha guasu oñemoïru jae ndive vae reta, ikavayu re jare ikäretou ñeraro pegua reve reve, yogüɨraja opa oñova Samaria jare opüa jese.

2Omondo vi ñee jerajaa reta jókuae tëta guasu pe, Acab pɨri, mburuvicha guasu Israel pegua, jei reta chupe:

3“Körai jei Ben-adad: ‘Ndekorepoti jare ndeoro chembae, chembae ma ko, jökoraiño vi nderembireko reta jare nderaɨ reta maepöra yae vae.’ ”

4Jare mburuvicha guasu Israel pegua jei: “Jókuae rere rami cheruvicha guasu, che jare chembaembae, ndembae ko.”

5Ñee jerúa reta jekuae yogüeru ye jei Acab pe: “Amondo ma jae ndeve remee vaerä cheve: Ndekorepoti jare ndeoro, jökoraiño vi nderembireko reta jare nderaɨ reta.

6Pɨareve amondota vi cherembiokuai cheɨvɨrigua reta oipapa vaerä mbaembae ndero pegua, jare ndeɨvɨrigua reta jo pegua, jare opaete mbae jepɨ vae reta güeruta imbaerä.”

7Jayave mburuvicha guasu Israel pegua oenɨiuka opaete tenondegua reta jókuae ɨvɨ pegua, jare jei chupe reta:

—Mase, pemae, kërai kuae kuimbae oeka ikavimbae vaeño, echa ombou oeka cheve chekorepoti, cheoro, cherembireko reta jare cheraɨ reta jare che mbaetɨ aikuaku chugüi.

8Jare opaete tenondegua jare opaete vae reta jei chupe:

—Agüɨye eendu chupe jare agüɨye vi eyapo jei vae.

9Jayave Acab jei jókuae Ben-adad ombou jekovia pe imiari vaerä vae reta pe:

—Pere peruvicha pe, ayapota opaete tenonde jei vae, ërei mbaetɨta ayapo añave jei ye cheve vae.

Jare mburuvicha jekovia pe kuimbae reta imiari vae yogüɨraja omombeu kuae ñee,

10jare Ben-adad omondo jei Acab pe: “¡Täta toiporarauka cheve tumpa reta, mbaetɨ yave Samaria opaetei amboai!”

11Mburuvicha guasu Israel pegua omondo vi jei chupe: “Agüɨye eyerovia ndei reporomoamɨri mbove.”

12Ben-adad oendu kuae ñee, vino jou ñogüɨnoi ïru mburuvicha guasu reta ndive küaraɨa pe yave. Jayave jei isundaro ruvicha reta pe: “¡Peyeapo katu peñoraro vaerä!” Jare opaete vae oyupavo oporepeña vaerä tëta guasu re.

13Jökorai yave metei Tumpa iñeemombeúa ou Acab mburuvicha guasu Israel pegua pɨri, jare jei chupe:

—Körai jei yandeYa: “Yepe tëi reecha jókuae tovaicho jeta yae vae, ërei añave che ameeta ndepo pe, reikuaa vaerä che ko jae ndeYa.”

14Jare Acab jei:

—¿Kia reta ipo rupi pa remeeta cheve?

Jare jae jei:

—Jókuae ɨvɨ ruvicha reta imborɨa reta rupi.

Acab oparandu ye chupe:

—¿Kia reta räri pa oporepeñata?

Jare jae jei chupe:

—Nde räri.

15Jayave Acab omae jare oipapa kavi ɨvɨ ruvicha reta imborɨa reta, dosciento treinta y dos ñogüɨnoi vae, omae jare oipapa kavi vi sundaro Israel iñemuña pegua reta siete mil kuimbae ñogüɨnoi vae.

16Jare ñogüɨnoe reta kuaraɨ ara mbɨte ma yave. Ben-adad jare treinta y dos mburuvicha guasu reta okau jare osavaɨpo ñogüɨnoi ramboeve küaraɨa yai pegua oyapo reta iyeupe vae pe,

17jare ɨvɨ ruvicha reta imborɨa reta räri oporepeña tenonde. Ben-adad oikuaa yave amogüe kuimbae reta ñogüɨnoe tëta Samaria güi,

18jei körai: “¡Yogüeru yave oeka mbɨakatu ani yogüeru yave oñeraro, aipota jekove reve!”

19Ɨvɨ ruvicha imborɨa reta ñogüɨnoe tëta güi, sundaro reta jenonde.

20Jare metei ñavo oyuka tovaicho oporepeña jese yave, otekuarai Siriaɨgua reta. Israel iñemuña reta oaɨkuemoña, ërei Ben-adad, Siriaɨgua reta juvicha guasu otekuarai kavayu re, amogüe sundaro kavayu regua reta ndive.

21Jayave mburuvicha guasu Israel pegua omoña jare opɨ̈ro chugüi ikavayu reta jare ikäretou reta ñeraro pegua, jökorai Siriaɨgua reta ñamɨriasɨ yae.

22Jaɨkue rupi ñeemombeúa ou mburuvicha guasu Israel pegua jóvai, jare jei chupe:

—Ekua, eyeapokatu jare emoïru ndesundaro reta, jare eyemongeta kavi mbae reyapota vae re, echa kuae güi metei añoa pe mburuvicha guasu Siria pegua oporepeña yeta nderé.

23Jare mburuvicha guasu Siria pegua imborɨa reta, jei chupe:

—Israel iñemuña reta itumpa reta, jae ko tumpa reta ɨvɨtɨ rupigua; jáeramo ñanemoamɨri. Ërei ñañoraro yave ɨvɨpe kavi pe jae reta ndive ñamoamɨrita.

24Añave eyapo körai: Eekɨ mburuvicha reta jenda güi, jare eñono jekovia pe sundaro ruvicha reta,

25jare nde emopüa ïru sundaro jókuae opa remokañɨ rami, kavayu reguarä vae reta kavayu re jare käretou ñeraro peguarä vae reta käretou pe. Jayave ñañoraro jae reta ndive, yaecha ra ipuere ye ñanemoamɨri reta.

Ben-adad oendu kuae yemongeta chupe, jare oyapo jökorai.

26Metei año jaɨkue rupi, Ben-adad omae jare oipapa kavi Siriaɨgua reta, jare ou Afec pe oñoraro vaerä Israel iñemuña reta ndive.

27Israel iñemuña pegua reta omae jare oyopapa kavi vi, jare oñemee reta vi chupe jembiurä, jare ñogüɨnoe oövaiti Siriaɨgua reta. Oyembojeyupa Siriaɨgua reta jóvai mókoi atɨ mi kavara vaeecha, echa Siriaɨgua reta opaetei omotɨnɨe ɨvɨ.

28Jayave ou kuimbae Tumpa iñeemombeúa mburuvicha guasu Israel pegua jóvai, jare jei chupe:

—Körai yandeYa jei: “Echa Siriaɨgua reta jei, che jae Tumpa ɨvɨtɨ rupiguaño, mbaetɨ ko ɨvɨpe kavi rupigua ramo, ameeta ndepo pe kuae jeta yae vae. Jökorai peikuaata che jae ko peYa.”

29Chiu ara, Siriaɨgua jare Israel iñemuña reta oyóvai ñogüɨnoi jeyupa rupi, chiúa ara pe oñeraro reta. Jókuae ara Israel iñemuña reta oyuka cien mil sundaro Siriaɨgua ipɨ regua.

30Ïru sundaro reta otekuarai tëta Afec kotɨ, ërei tëta guasu ikësea osururu jókuae veintisiete mil sundaro otekuarai tëi vae re. Ben-adad otekuarai vi jare ojo jókuae tëta guasu pe oñemi o ñavo rupi.

31Jayave iyɨvɨrigua mburuvicha reta jei chupe:

—Roendu mburuvicha guasu reta Israel pegua iporoparareko jare ombopo iñee; jayave yayemonde temimonde mbɨatɨtɨ pegua pe jare yandeayu re ñañono tɨmasa, javoi yaja mburuvicha guasu Israel pegua jóvai, yaecha ra iñɨ̈ro ndeve.

32Jayave oyemonde reta temimonde mbɨatɨtɨ pegua pe jare tɨmasa oñono reta iyayu re, jökorai yogüeru oyemboɨ mburuvicha guasu Israel pegua jóvai, jare jei reta chupe:

—Ben-adad nemoñera remaeño vaerä oikove.

Acab jei:

—¿Oikoveño yera? ¡Tëtara rami ko chevegua!

33Kuimbae reta pe kuae ñee ikavi yae, jare jei voi reta:

—¡Ben-adad tëtara rami yepe ndeve!

Acab jei:

—¡Pekua peru!

Jayave Ben-adad ou Acab jóvai, jare Acab omboyeupi ikäretou pe,

34javoi Ben-adad jei:

—Cheru opɨ̈ro tëta guasu reta nderu güi vae che tamboyevɨ ye ndeve; javoi ndepuere remaemee jare rembaegua ndeyeupe Damasco pe, cheru oyapose Samaria pe rami.

Jare Acab jei:

—Che amaeñota reo ye.

Körai, Acab oyapo morogüɨrökuavee päve Ben-adad ndive jare omaeño ojo ye.

35Ërei ngatu metei kuimbae ñeemombeúa reta güi oyókuai iñeïru, Tumpa jei chupegüe rupi:

—¡Eyapo ikavi vae cheve, chembopere!

Ërei jókuae iñeïru mbaetɨ oipota oyapo.

36Jayave ñeemombeúa jei chupe:

—Mbaetɨ reipota reyapo yandeYa jeigüe jeko pegua, resɨrɨ chegüi yave ndeyukata yaguapope.

Jare osɨrɨ ñeemombeúa güi yave oë chupe yaguapope jare oyuka.

37Javoi jókuae ñeemombeúa oñoväe ïru kuimbae ndive, jare jei chupe jae ombopere vaerä jare jae okua jese jare ombopere.

38Jayave ñeemombeúa ojo oäro mburuvicha guasu tape pe, jare oñeäka-soi reve tarapo pe.

39Jare mburuvicha guasu oasa jókuae tape rupi yave, ñeemombeúa iñeeäta reve jei chupe:

—Mburuvicha guasu, che nderembiokuai aja ñeraroa pe, jare jókuae ñeraro pɨte güi oë metei sundaro güeru cheve metei tembipɨɨ, omee chepo pe ayangareko vaerä jese. Ërei omombeu voi cheve, otekuarai ko chegüi yave amboepɨta cherekove pe, ani tres mil reare korepoti pegua pe.

40Jare che nderembiokuai ayapo ramboeve ïru mbaembae, jókuae tembipɨɨ otekuarai chegüi.

Jayave mburuvicha guasu Israel pegua jei:

—Nde aeño remombeu teko renoi vae, jare kërai remboepɨta vae.

41Ërei jókuae ñeemombeúa oekɨ iyeugüi aramoete iñäkaövaa tarapo, jare mburuvicha guasu oikuaa jae ko ñeemombeúa reta güi metei.

42Jayave ñeemombeúa jei chupe:

—Körai jei yandeYa: “Echa nde remaeño ojo ye kuimbae omano vaerä tëi ko vae jeko pegua nderekove pe remboepɨta, jare ndembae vae reta omboepɨta jekove pe, jókuae mburuvicha imbae vae reta jekove.”

43Jayave mburuvicha guasu Israel pegua ojo Samaria kotɨ ipɨatɨtɨ jare iyarasɨ reve, jare oike jo pe.