TOBIT 8 - Guarani Bible with DC

Aña iñamɨri vae

1Opa okaru yave, jaema opa yogüɨraja oyapakua. Jare jókuae kunumi güɨraja jókuae ojo pe.

2Jaema Tobías imaendúa Rafael jei chupe vae re. Oekɨ ivokoo güi jevae ipɨagüe jare ichörokokogüe jare oñono incienso oyeapɨa pe.

3Jare jókuae jevae ipichegüe mbaetɨ ma aña omaeño oya jese, jare oë otekuarai ojo ɨvɨtu jupíe matɨ yae Egipto güi. Jare Rafael ojo oñapɨti oeya karena pe, jupivei oyerova ye.

4Ïru vae reta oë ojo güi jare oyokenda reta öke.

Jaema Tobías opüa tupa güi jare jei Sara pe: “Kuña michi, epüa yayerure yandeYa pe iporoparareko vaerä yandekotɨ jare ñaneovatu vaerä.”

5Jaema kuña opüa, jare mókoi reve omboɨpɨ oyerure reta körai, oiporu reta Tumpa pe oyangareko vaerä jese: “Mbaemboete toiko, yandetenondegua reta iTumpa pe, mbaemboete toiko nderé jekuae avei. Opaete ara jare arasa rupi tandemboete vae.

6Nde ko reyapo Adán jare remee jembirekorä Eva omborɨ vaerä. Jare chugüi reta oë opaete vae. Jare nde rere: ‘Mbaetɨ ikavi kuimbae jaeiño oiko vaerä. Tayapo chupe metei kuña ïrurä oyomborɨ vaerä.’

7Añave, che mbaetɨ kuae kuña aipɨɨ cheyemongeta pɨ̈chɨi jeko pegua, jaeño ma jupi rupi ko aipɨɨ, eiparareko emae cheré jare chekuña re, emee toroiko puku vaerä.”

8Jare mókoi reve: “Jökorai toiko, jökorai toiko” —jei reta.

9Jare opa oyapakua reta oke vaerä jókuae pɨ̈tu.

Ragüel ikɨɨye

10Ɨma ete yave Ragüel opüa oenɨi jembiokuai, jare ojo reta oyoo ɨvɨkua, echa oyemongeta: “Tobías omano yave, güɨraja vaerä oñotɨ, agüɨye vaerä ïru vae reta oyóyai.”

11Opa ma ɨvɨkua oyoo reta yave, Ragüel ou ye jëta pe, oenɨi jembireko,

12jare jei chupe: “Emondo metei tembiokuai tomae Tobías oimeño ra oikove oï vae. Jare omano ma yave, yaraja vaerä mo ñañotɨ kia oikuaambae reve.”

13Jaema omondo reta jembiokuai, omoendɨ mechero jare oipea öke. Jaema jókuae tembiokuai oike ojo, oecha oime Tobías Sara ndive täta oke ñogüɨnoi.

14Jaemai jókuae tembiokuai oë ye imiari Tobías oimeño oikove oï vae, jare mbaetɨ maratu oï.

15Jare Ragüel omee mbaemboete Tumpa ara pe oï vae pe: “¡Mbaemboete toiko ndeve cheYa, Tumpa ara pe reï vae! ¡Mbaemboete añetete pegua opaete arasa reta rupi!

16Mbaemboete toiko remee ramboeve cheve yerovia, jare mbaetɨ cheyemongeta oyeapo, jaimei ndepɨakavi oï che ndive.

17Mbaemboete toiko ndeve cheYa echa ndepɨakavi oiko kuae mókoi michia reta ndive. Ndeporoaɨu toiko jae reta ndive cheYa, eyangareko jese reta. Emee chupe reta tekove ikavigüe oiko vaerä.”

18Jayave omondo ye jembiokuai reta oyatɨ vaerä ɨvɨkua ndei köe mbove.

Oyeapo arete

19Jaema Ragüel jei jembireko pe oyapo vaerä jeta tembíu. Jare ojo mɨmba rókai güi güeru mókoi guaka jare irundɨ vecha kuimbae reta, jare oyukauka, jaemai omboɨpɨ oyemoambeko reta oï.

20Joko güi oenɨi Tobías jare jei chupe: “Añave repɨtata ko reï vaerä ore ndive, mókoi semana reopotaä etei ketɨ. Chero pe rekaruta jare reɨuta reï. Rembovɨata cherayɨ, echa tuicha yae ko oiporara oiko.

21Joko güi ameeta ndeve mbɨte rupi mbae anoi vae, javoi ekua ye ikavi nderu jëta pe. Joko güi che jare cherembireko ndive opa romano yave, jekuae ïru mbɨtegüe opɨta yeta peve mókoi peguarä. Enoi mborogüɨrovia, cheraɨ. Cheko jae añave nderu jare Edna jae ndesɨ. Añave güive jare jekuae aveita. ¡Enoi mborogüɨrovia, cheraɨ!”