ECLESIÁSTICO 24 - Guarani Bible with DC

Mbaemboete arakuaa pegua

1Arakuaa jaeiño ko oyemboeteuka,

imiari yembotuicha ndive jeta ipo reta ipɨte pe;

2ɨvate ete pe oï vae iporomboatɨ jóvai

jare araɨgua reta jóvai, jei yembotuicha reve:

3“Che aë ko ɨvate ete pe oï vae iyuru güi

jare ayasoi ɨvɨ ɨvɨtɨ rami.

4Ara re anoi chero;

cheguapɨa oï ko metei amapɨtu jɨsɨ vae iárambo.

5Che aeño amboapɨ aguata ara oasavigüe

jare aasa oasavi vae má tɨpɨ vae.

6Aporookuai ɨguasu iárambo opaetei ɨvɨ pe

jare opaete tëta reta rupi jare tëta guasu reta rupi.

7Opaete jokoropi aeka metei o,

metei ipombae joko pe aiko vaerä.

8Jökorai yave cheapoa jare ïru mbaembae reta iyapoa

jei kia pe ko che aikota vae, jare jei cheve:

‘Eñono reiko vaerä Israel pe,

Jacob oikoa pe.’

9Jae ko cheapo iyɨpɨ yave, ndei ɨvɨ oiko mbove,

jare ngaraaí cheapi aikove.

10Ayeokuai chupe tupao pe,

jare Sión aiko ete.

11Oñono aiko vaerä tëta guasu oaɨu vae pe,

jaema Jerusalén pe ko oï che oporookuai.

12Ayeatɨka kuae tëta ipöragüe vae pe,

yemombae Tumpa oiparavogüe.

13Akuakuaa ɨvɨra Líbano pegua rami,

ciprés ɨvɨtɨ Hermón pegua rami,

14karandaɨ En-gadi pegua rami,

mbaepotɨ renda Jericó pegua rami,

olivo ikavigüe ñuu pegua rami;

akuakuaa castaño rami.

15Amoai ipiche kavi vae canela ɨvɨra rami,

täkuaree ipiche kavi vae jare mirra oyeparavogüe rami,

mbaeyaɨsɨ täta ipiche vae rami,

incienso tupao pe oyeapi vae rami.

16Amoai cheräka ɨvɨra terebinto rami:

Jäka ikavigüe jare jovusu vae.

17Chereeñɨi kavi uva rami,

jare chepotɨ reta chea reta täta ko ikavi jare jeta vi.

19Peya cheré chepota vae reta,

jare peu pepuere rupi cheagüe reta,

20echa chekuaa vaerä oasa ete ko ei güi jëe,

jare cherenoi vaerä, oasa ete ko ei rɨru güi jëe.

21Kia chereu vae oipotata ko chereu ye,

jare kia oɨu cheré vae oipotata oɨu ye cheré.

22Kia che jaegüe oyapo vae ngaraa osusere;

kia ñavo oyereroata arakuaa ndive vae ngaraa iyoa.”

23Opaete kuae jae ko tembikuatía ñemoïru pegua Tumpa ɨvate ete pe oï vae güi,

mborookuai Moisés omoërakua yandeve vae,

Jacob jeta ipo reta pe oipotagüe.

25Kuae mborookuai tɨnɨe ko oï arakuaa pe ɨ̈aka Pisón rami,

ani ramo Tigris oï arapotɨ pe rami;

26oñäka-soi arakuaa Éufrates rami,

ani ramo Jordán tuicha oï yave rami;

27omee yemboe jetagüe vae Nilo rami,

ani ramo ɨ̈aka Gihón iara pe tɨnɨe rami.

28Mbaetɨ tenondegua güi iyapɨ pe,

oikuaa kavi ete arakuaa,

29echa iyemongeta reta oupitɨ ɨguasu güi kutɨ yé

jare imae má ko tɨpɨ ɨvɨsoro tuicha vae güi.

30Che, cheyegua, metei ɨrape ɨ̈aka güi ou rami ko che,

metei ɨrape ɨ güɨraja mbaepotɨ renda pe rami ko che.

31Jae: “Tamboɨu che mbaepotɨ renda,

tamoäkɨmbe chekapii renda.”

Jare cheɨrape oyeapo ɨ̈akarä,

jare cheɨ̈aka oyeapo metei ɨguasurä.

32Tayapo che oporomboe tomboesape yasɨtata guasu rami,

jare omoembipegüe tojo matɨ toupitɨ;

33tamee che oporomboe ñeemombeúa reta rami

jare taeya kuri pegua reta peguarä.

34Pemae mbaetɨ ko cheyeupe aeño aparavɨkɨ,

opaete arakuaa oeka vae reta pegua ko.