1Elifaz Temán pegua jei chupe:
2¿Rerovia pa kuimbae iyarakuaa katu yae güi,
Tumpa ipuere oiporu?
3¿Oyerovia ra Imbaepuere yae vae reyembojupiuka vae re?
Ani, ¿mbaerä ra ikavita chupe rembojupi yae ndereko yave?
4Ndembosɨmbɨ yave, nejäa yave,
mbaetɨ ko jupi reyeokuai chupe ramo.
5Echa jeta yae ikavimbae reyapo,
jeta yae ndeyoa.
6Repɨ̈ro mbae nerëtara reta güi jupimbae reve,
repɨ̈ro temimonde paravete vae güi jare reeya jetegüɨrai.
7Iɨuve vae pe mbaetɨ remee ɨ,
yɨmbɨaɨ vae mbaetɨ remee okaru.
8¡Echa nde ndembaepuere jare imboetea vae,
reyererovia nde ko jae ɨvɨ iya vae!
9Imemano vae reta ipogüɨrai remondo,
tɨ̈reɨ reta re reyuvanga katu.
10Jáeramo añave mbae ikavimbae oyere nderé,
jare nemongɨɨye yae.
11Opaete oyembopɨtumimbi ndeve,
mbaetɨ ndepuere reecha,
ɨ oguata vae ndeasoi.
12Tumpa oï ɨvate yae ara pe;
yasɨtata reta ɨvate yae ñogüɨnoi vae opɨta jae ipɨ igüɨ pe.
13Jare nde rere: “¿Këraita pa Tumpa oikuaa kuae re?
¿Këraita pa oporojäa pɨtumimbi rupi.
14Amapɨtu reta oñova mbaetɨ ipuere omae,
jare ara iyapɨ rupi ojo oguata?”
15¿Reipota pa remomoe teko pɨ̈chɨi,
arakae güive ipɨapochɨ vae reta yogüɨreko rami?
16Jae reta omano jarembae,
ɨporu opa imbaembae güɨraja rami.
17Jei reta Tumpa pe: “¡Esɨrɨ katu oregüi!
¿Mbae pa ndepuere reyapo oreveguarä Imbaepuere yae ete vae?”
18Jae ko omee mbaembae omotɨnɨe vaerä jo reta.
¡Mombɨrɨ toï chegüi kuae nunga yemongeta!
19Jupi vae reta oecha yave oyerovia,
jekombae reta oyóyai yóyai, jei reve:
20“Opa okañɨtei yanderovaicho reta,
opa tata omokañɨtei chugüi reta imbaeyekou.”
21Eñemoïru ye Tumpa ndive, jare renoita mbɨakatu,
kuae reyapo yave reiko kavi yeta.
22Eipɨɨ añave jae iporookuai,
jare eñono jae iñee ndepɨa pe.
23Reyerova ye yave Imbaepuere yae ete vae kotɨ,
reï kavi pɨau yeta,
jare ombosɨrɨta ndero güi mbɨatɨtɨ.
24Jeta yaeta renoi oro ɨvɨkúi rami,
jare oro Ofir jee vae ita reta ɨ̈aka pe rami.
25Imbaepuere yae ete vae ndereepɨta,
jae etei ko oro jare korepoti ramita ndeve.
26Echa jayave reyekouta Imbaepuere yae ete vae re,
jare ndepuereta nderovaɨva Tumpa kotɨ.
27Reyerure yave jae oenduta ndeve,
jare nde remeeta reñererökuavee vae.
28Mbae nekɨ̈reɨ reyapo vae, reyapota,
nderape oesapeta ndeve tembipe.
29Echa Tumpa omomichi oyembotuicha vae,
jare ombotuicha oñemomichi vae.
30Jae ndereroasayepeta, mbaetɨ ndereko yave,
jare reyetɨo ndeyoa güi yave.
Who We AreWhat We EelieveWhat We Do
2025 by iamachristian.org,Inc All rights reserved.
