ISAÍAS 58 - Guarani Bible with DC

Yekuaku tembíu güi añetete pegua

1YandeYa jei cheve:

“Esapúkai täta, reipoɨumbae reve,

neñeeäta mimbɨguasu iñee rami;

emboeta chembae vae reta Jacob iñemuña reta pe,

ipɨapochɨ re jare iyoa re.

2Ara ñavo chereeka reta

jare ikɨ̈reɨ yae oikuaa reta vaerä cheremimbota,

tëta jembiapo ikavi yae vae rami,

mbaetɨ cheporookuai güi opia vae rami;

mborookuai jei vae güi mbaetɨ opia vae rami,

oeka reta cheve morojäa jupi vae,

jare ikɨ̈reɨ yae yogüeru chekotɨ,

3ërei ngatu jei reta:

‘¿Maera pa yayekuakuta tembíu güi?

Tumpa mbaetɨ ko yandereecha.

¿Maera pa ñañemomichita?

Tumpa mbaetɨ ko oikuaa.’

Yekuaku tembíu güi iara pe,

peyapo pepɨa jemimbotaño,

jare perekoasɨ katu oyeokuai peve vae reta.

4Yekuaku tembíu güi iara pe,

peyoaka jare peñoraro vaeräño,

peporombopere püriete pe.

Agüɨye yekuaku iara pe peyapo jökorai,

echa ngaraa aendu peve peyerure reta.

5¿Jae pa kuae yekuaku tembíu güi vae

chembopɨakatu vae?

Pepɨatɨtɨ vae, peäkatindɨ käipepe rami vae,

peyepɨso temimonde jaimbe vae re vae,

ani tanimbu re vae.

¿Jókuae pe pa pere ‘yekuaku tembíu güi’,

jare ‘ara yandeYa omboyerovia vae’?

6Ambuae ko.

Yekuaku tembíu güi chembopɨakatu vae ko jae:

Yeyora jupimbae güi vae, yeyora tembiporara güi vae,

ipɨatɨtɨ vae re pemaeño ojo vae jare peporoyora oipotagüe mbae güi vae;

7pemboyao perembíu oata chupe vae ndive vae,

pemee oputuu vaerä paravete vae pero pe vae,

pemboemimonde mbaetɨ jemimonde vae,

jare mbaetɨ peikuaku mbae penoigüe perëtara güi vae.

8Jayave, reyekuaata

tembipe omboesape köembipe yave vae rami,

jare ndepere okuerata jarembae pegua,

jupi vae oikota nde ndive,

ndeYa Tumpa oikota nderaɨkue ndeangareko vaerä.

9Jayave, reyerureta jare ndeYa oenduta,

resapúkai yave, jae jeita: ‘Ko aï.’

Reeya yave reporogüɨrekoasɨ katu vae,

mbaetɨ yave reporomomburu ani rere ñee ikavimbae vae,

10remee nderembíu oata chupe vae pe yave,

remborɨ yave ipɨatɨtɨ vae,

jembipeta reyekuaa pɨtumimbía pe,

kuaraɨ ara mbɨte pe oï rami reyekuaata.

11YandeYa ndeangareko aveita,

mbaetɨ mbaea pe, omeeta nderembiurä,

jare nekägüe reta omopɨ̈ratata;

reikota ko raɨ oyemboɨu kavi vae rami,

ɨesaɨ tɨpambae vae rami.

12Nerëtaɨgua reta omopüa yeta o oyembosururugüe,

o iguapɨka ñɨma yae vae,

opaete vae pereenɨita ‘tëta ikësea omopüa ye vae’,

‘o oyembosururugüe omopüa ye vae’.

Ara mbutuu regua

13Emboete ara mbutuu pegua,

agüɨye eyapo ndeparavɨkɨ cheara oñeñono tee vae pe.

Kuae ara ereko, ara yerovia katu pegua,

che ndeYa peguarä oñeñono tee jare imboetea yae vae.

Emboete, agüɨye eeka nderemimbotaño

ani mbae ndeyeupeguaräño.

14Jökorai yave reväeta cheré yerovia katu,

jare ameeta reiko vaerä tenondeguarä ndeɨvɨ pe.

Ameeta reyekou neñemuñagüe Jacob imbaeyekou re.”

Che ndeYa etei jae kuae.