JUDIT 9 - Guarani Bible with DC

Judit iyerure

1Judit itindɨ omboya jesɨva ɨvɨ re, oñono iñäka re tanimbu, jare oechauka jemimonde jaimbe vae omonde güɨraja vae; jókuae kaaru Jerusalén tupao pe incienso oyeapɨ oï yave, Judit täta osapúkai yandeYa pe, jare jei:

2“CheYa, chetenondegua Simeón iTumpa, jae ipo pe reñono kɨsepuku reiporarauka vaerä ketɨgua reta pe Dina re opoko reta yave, kuñatai imembae oiko vae omonandi reta mbae oyapo vaerä chupe, opoko reta jese; ërei ko nde reyopia jókuae nunga agüɨye vaerä oyeapo, ërei jae reta oyapo.

3Jókuae jeko pegua itenondegua reta reyuka chugüi reta, jókuae tupa jae reta kuñatai re opokoa pe, joko pe vi jae reta mano oväe iyeupe echa jökorai vi jae retaiño oyembotavɨ. Opa remoamɨri tembiokuai reta iya reta reve, jare mburuvicha guasu reta iguapɨa reve reve.

4Jare ikuña reta opa reñono ïru vae reta ipo pe, jare tayɨ reta opa rerajauka tembipɨɨrä, jare imbaembaegüe reta opa remboyao yao nderaɨ reaɨu vae reta pe, oñemoägüɨro reta ndekotɨ jare iyarasɨ reta jeindɨ oasagüe vae re, jare oiporu reta yemborɨ ndeve. ¡CheRu Tumpa, cheRu Tumpa, eendu cheve, che ko imemano vae!

5Nde ko reyapo jayave oasa vaerä vae, jare tenonde ma oiko vae jare taɨkue rupi oiko vae; nde rere vae oasa oï añave jaeramiño outa vi taɨkue rupi oiko vaerä nde ko reyapo kuae añave oiko vaerä vae jare kuri oikota vae, jare opaete reyapo vaerä vae oyeapo.

6Opaete nde reyapo vaerä vae oyeapo nderóvai, jare jei reta: ‘¡Ko kuae pe roï!’ Nde ko opa reñono kavi mbae oyeapo vaerä vae, jare opaete mbae oiko vaerä vae ndeko opa ma reikuaa tenondeve.

7Emae joko Asiriaɨgua reta oyemboatɨ ñogüɨnoi opaete mbaepuere ndive, täta oyembotuicha ñogüɨnoi ikavayu reta re jare kavayu regua reta re, oyerovia vi ñogüɨnoi isundaro ɨvɨ rupigua reta re, iyeopiaka jare juvɨ reta re. Mbaetɨ etei ndekuaa reta nde, CheYa, ndeko jae ndepuere ñoraro opa remboapɨ vae;

8nderee jae ko ‘cheYa’. ¡Ndembaepuere pe opa imbaepuere emboai chugüi reta, jare ndepuere remboai mbaepuere ndearasɨ pe! Jae reta iyemongeta jae ko opa vaerä omboai ndetupao, omongɨa vaerä nderé oyemboete renda, jare opa vaerä vi omboai mɨmba oyeyuka oyeapɨ jese vae.

9Emae ipɨayemboete re, eitɨ jese reta ndearasɨ, jare emee cheve, che ko jae imemano vae, oyeapo vaerä cheyemongeta.

10Emee cheve che tambotavɨ reta, opa vaerä tembiokuai reta opaete juvicha reta reta reve jare opaete tembiokuai reta reve, metei kuña topa tomokañɨtei chugüi reta iyembotuicha.

11Echa nde ndembaepuere mbaetɨ ko oeka jeta oiko vaerä, ani ramo kuimbae jëia oiko vaerä vae. Ndeko jae oiporara vae reta iTumpa, jare iñamɨri vae reta jepɨa, jare ipɨtu vae imborɨa, jare oyeeyagüe reta iyokoka, jare mbaetɨ mbae re vae reta güɨroasayepe vae.

12Jökorai, cheRu iTumpa, Israel reta iTumpa, ara jare ɨvɨ iYa, ɨguasu iyapoa, opaete nderembiapo reta juvicha guasu ko nde, eendu cheve cheyerure:

13emee cheñeerä chepuere vaerä ambotavɨ ombosusere vaerä jare oyuka vaerä, echa jae reta oime güɨnoi yemongeta ikavimbae vae, ndetupao re, mbaemboete renda, tëta re jare ɨvɨ re.

14Eikuaauka opaete pe jare tëta guasu reta pe ndeko jae Tumpa, Tumpa imbaepuere vae ipɨ̈rata vae, ndegüi mbaetɨ yé kia ipuere vaerä oepɨ kia Israel-ɨgua reta.”