PROVERBIOS 18 - Guarani Bible with DC

1Jae aeño ipɨapotaa oeka vae, jae aeño oiko,

jare oyemoinge oipotagüe mbae pe.

2Yarakuaambae, mbaetɨ omomora yemboarakuaa katu;

oikuaagüe reño oipota oiko.

3Jupimbae ndive ou ñereröɨro;

yembotuicha ndive ou mboromboetembae.

4Kuimbae iñee reta, ɨ tɨpɨ yae vae rami ko,

ɨ oguata rami ko, arakuaa jenda.

5Mbaetɨ ko ikavi oporojäa vae reta oepɨ jupimbae,

omboeko vaerä jupi vae.

6Yarakuaambae, oyemoinge teko pɨ̈chɨi pe iñee rupi;

iñee kavimbae rupi aeño oeka iyeupe ñenupa.

7Yarakuaambae, iñee rupi aeño oyembosusere;

iñee aeño oyeapa jese.

8Indaye pota vae reta iñee reta, mbae jëe ngatu vae rami ko,

oike yandepɨ a pe etei.

9Ipokoseä iparavɨkɨ re vae,

jae ko mbae omokañɨtei vae jëtara.

10Ñepɨ̈roka jëguambae rami ko yandeYa jee,

jupi vae reta yogüɨraja oñepɨ̈ro jese.

11Oikokatu vae imbaeyekou, tëta guasu jëguambae rami ko chupe;

metei tëta guasu ikësea ɨvate yae vae rami ko chupe.

12Ndei susere mbove, oime pɨayembotuicha;

ndei oime yemboete mbove, oime susere.

13Arakuaambae ko jare ñemomarai ko

ndei mbae oendu kavi rupive iñee omoë voi vae.

14Imbaerasɨ vae opüa, oñemoäta ngatu ramo,

ërei ipɨatɨtɨ yae oï vae,

¿kia pa ipuereta omopüa?

15Yarakuaa vae, oväe arakuaa katu,

yarakuaa vae, oeka arakuaa.

16Kuimbae, mbota omee vae rupi oipea tape iyeupe,

jökorai oike mburuvicha reta pe ave.

17Jupiecha, jae räri voi oñeapo vae;

ërei ou jovaicho yave, oñeväe apu pe.

18Suerte, omboapɨ ñeapo reta,

jare mburuvicha reta opa oñono kavi.

19Oñoëtara ete vae oyomboarasɨ vae oñemoëguaä etei,

tëta guasu ikësea jëguambae vae güi.

Oñoëtara vae reta oñeapo oyoe vae,

mburuvicha jo ikësea oyeokenda avei vae rami ko.

20Kuimbae iñee reta, jókuae jekoviata chupe,

yangapɨɨ ta iñee reta rupi.

21Ñee güɨnoi mbaepuere, mano peguarä jare tekove peguarä,

iñee omoë vae, jókuae jekoviata chupe.

22Kuimbae oväe imenda ïrurä vae, oväe ko ikavi vae,

yandeYa ipɨa kavi ou chupe.

23Paravete vae, imiari oporomoñera reve,

ërei oikokatu vae, omboyevɨ iñeeasɨ katu reve.

24Kuimbae oime ivɨa-ïru reta yave, tijeko kavi jae reta ndive;

oime vɨa-ïru iporoaɨu yae tëtara ete güi vae.