ECLESIÁSTICO 49 - Guarani Bible with DC

Mburuvicha guasu Josías jare ñeemombeúa Jeremías

1Josías jee incienso ipiche kavi vae rami ko

kia yembopichea ipoki oyapo vae rami vae;

yemomaendúa jesegua jee ngatu etei ko ei rami

ani ramo temimbɨñee aretea pegua rami.

2Echa jae oyembopɨatɨtɨ vi yandetavɨ vae re

jare opa omboai tumpa-raanga reta yaipotambae vae reta.

3Oñemee Tumpa pe ipɨa reve

jare täta iporoparareko tekorai iara pe.

4David oyepapa mbae reve, Ezequías jare Josías,

jare ïru vae mburuvicha guasu reta Judá pegua

yogüɨreko kaviä

jare opa oeya reta ɨvate ete pe oï vae iporookuai.

5Jókuae ramo Tumpa omee imbaepuere ïru vae reta pe,

jare imbaeyekou opa oasa ïru vae tëta guasu ambuaeɨgua iyarakuaa mbae vae pe,

6opa oapɨ reta tëta guasu ikɨambae vae

jare opaetei omokañɨtei jëta ipäu rupigua jape reta.

7Jökorai ma tenondeve omoërakua Jeremías,

ñeemombeuarä ou ndei oa mbove ma vae,

oekɨ vaerä, omboai vaerä, omokañɨtei vaerä jare ombongúi vaerä,

jare vi oyapo ye vaerä, oyatɨkata jare ombopɨauta;

ërei kuimbae reta opa güɨrokomegua.

Ezequiel jare ïru vae ñeemombeúa reta

8Ezequiel opaɨu

jare jei kërai ko oecha Tumpa ikäretou pe oiko vae reta.

9Jare jei vi Jacob regua,

jae jekuaeño oiko yepi rami aeño jupi rupi.

10Oime vi ñogüɨnoi doce ñeemombeúa reta:

¡Ikägüe reta jekuae güɨrave toyembopɨau tɨvɨa pe!

Echa jae reta ko omokɨ̈reɨ Jacob jeta pegua reta

jare opa güɨroasayepe reta añetegüe vaerä oäro reta vae jeko pegua.

Oyemombo jaɨkue rupi

11¡Këraita pa ko yandepuere ñamee mbaemboete Zorobabel pe,

moäka-vera yandeakatu kotɨgua re jaekavi rami vae,

12jare Josué, Josadac taɨ!

Jae reta ko omopüa ye mɨmba oyeyuka oyeapɨ jese vae

jare omopüa reta vi tupao ikɨambae vae

güɨrekota tëi yerovia opambae vae.

13Nehemías, jae ko yemomaendúa ikavigüe vae,

jae ko omopüa ye ñanerëta guasu opa oyemboaigüe vae,

opa oyapo kavi ye ñekësea oyemboaigüe vae

jare omojöke jare oñono iyokendaa retarä.

Iyɨpɨ ete ndechi reta

14Mbovɨño oime ɨvɨ pe Enoc rami vae:

Jae vi ko oyererajauka kuae ɨvɨ güi.

15Mbaetɨ ko oa metei kuimbae José rami vae,

tɨkeɨ reta juvicha jare jeta ipo reta iyerovia;

jetegüe oñeotɨ mbegüe kavi ko.

16Sem, Set jare Enós reta päve ko güɨnoi yemboete,

ërei Adán iyerovia ko má tuicha

opaete oikove vae reta güi.