2 SAMUEL 24 - Guarani Bible with DC

David oipapa opaete vae reta(1 Cr 21.1-27)

1YandeYa iyarasɨ ye Israel iñemuña reta kotɨ, jare omokɨ̈reɨ David ipɨa pe ikotɨ reta, oipapa vaerä Israel pegua reta jare Judá pegua reta.

2Jayave mburuvicha guasu oyókuai Joab, jae ko opaete vae sundaro reta itenondegua ete oï jae ndive vae, jei chupe:

—Opa emboapɨ eguata Israel iñemuña reta iɨvɨ, Dan güive Beerseba kotɨ, eipapa opaete vae, aikuaa vaerä mbovɨ oime vae.

3Ërei Joab jei mburuvicha guasu pe:

—NdeYa Tumpa tomoïru cien vese kuae tëta añave oime vae güi, eecha nde cheya, ërei ¿maera pa reipota reyapo kuae yepapa cheya?

4Ërei mburuvicha guasu iñee ipɨ̈rata yae, Joab jare ïru sundaro ruvicha reta jei tëi vae güi; jáeramo jae reta opa yogüɨraja mburuvicha guasu oïa güi oyapo vaerä yepapa Israel pe.

5Oasa reta ɨ̈aka Jordán jare yogüɨraja oyembojeyupa reta Aroer pe arayevɨ kotɨ tëta oï ɨvɨtɨ päu ipe kavi pe vae pe, Gad jare Jazer re katu.

6Jaɨkue rupi yogüɨraja reta Galaad kotɨ jare ɨvɨpe Hodsi kotɨ. Joko güi yogüɨraja reta Danjaán kotɨ jare ɨvɨ Sidón rupi.

7Javoi oasa reta Tiro kotɨ, jae ko tëta jëguambae oñekëse kavi yae vae, jare opaete heveo reta jare cananeo reta iɨvɨ rupi, ñogüɨnoe regua Judá güi arayevɨ kotɨ, Beerseba pe.

8Chau yasɨ jare veinte ara pe opa omboapɨ reta jókuae ɨvɨ, jayave oyerova reta ye, yogüeru oväe Jerusalén pe.

9Jare Joab omee mburuvicha guasu pe oipapagüe vae regua; opaete reve kuimbae reta Israel pegua ipuere ma ñeraro pe yogüɨraja vae, ochociento mil, jare Judá pegua reta quiniento mil.

10Ërei David opa güire oyapo kuae yepapa, ou jasɨ ipɨa pe kuae oyapogüe, jare oyemombeu Tumpa pe körai:

—CheYa, cheyoa ko tuicha ayapo ramboeve kuae. Ërei romoñera añave neɨ̈ro vaerä cheve cheyoa re, echa ayapo ko iyarakuaambae rami.

11Jare pɨareve pe David opüa ma yave, ou yandeYa iñee mbae re oecha voi vae Gad pe, jae ko David pe oyeokuai vae, jei chupe körai:

12“Ekua nemiari David pe, ere chupe: YandeYa jei körai: ‘Mboapɨ mbae añonota ndeve, jare eiparavo chugüi metei che ayapo vaerä.’ ”

13Gad ojo David pɨri jare oikuaauka chupe, jare oparandu chupe:

—¿Mbae pa reipota oyeapo ndeve: Chiu año karuai vae, ani mboapɨ yasɨ retekuaraita reiko nderovaicho reta güi vae, ani mboapɨ ara oimeta mbaerasɨ ovakatu vae ndeɨvɨ pe vae? Eyemongeta jare ere cheve mbae ra jaeta chembou vae pe.

14Jayave David jei Gad pe:

—Mbaetɨ aikuaa mbae ayapo vaerä. Ërei, yandeYa ipo pe yaa vae ko jaekavi, echa tuicha ko iporoparareko, agüɨye yaa kuimbae reta ipo pe.

15Jayave yandeYa ombou mbaerasɨ ovakatu vae Israel iñemuña reta re jókuae ndeimbove güive mboapɨ ara rupi; jare omano tëta pegua reta Dan güive Beerseba kotɨ, setenta mil kuimbae.

16Jare Tumpa iaraɨgua ipo omopüa Jerusalén kotɨ omboai vaerä yave jasɨ yandeYa ipɨa pe jókuae, jayave jei araɨgua oporoyuka oï vae pe: “¡Joko peño mo, agüɨye mo!”

Jókuae yandeYa iaraɨgua oï Jebús pegua Arauna itrigo oyembopiriría pe.

17David oecha araɨgua oyuka tëta pegua reta oï yave, jei yandeYa pe:

—¡Che ko cheyoa! ¡Che ko ayapo ikavimbae! ¿Mbae pa kuae jekombae reta oyapo? ¡Cheré jare chero pegua reta re eitɨ neporonupa!

David omopüa metei mɨmba oyeyuka oyeapɨ jese vae(1 Cr 21.18-27)

18Gad ou jókuae ara David pɨri, jare jei chupe omopüa vaerä metei mɨmba oyeyuka oyeapɨ jese vae, Arauna Jebús pegua itrigo oyembopiriría pe.

19Jayave David ojo oyapo, Gad omombeu yandeYa iñee chupe rami.

20Arauna omae tape re yave, oecha yogüeru ikotɨ mburuvicha guasu iyɨvɨrigua reta ndive. Jayave Arauna opüa ojo oövaiti jare oyetavatɨka itindɨ ɨvɨ re mburuvicha guasu jóvai,

21jare jei:

—¿Maera pa reyu repou chépɨri cheya?

Jare David jei chupe:

—Ayu ko agua ndegüi, ndetrigo oyembopiriría renda, ayapo vaerä joko pe mɨmba oyeyuka oyeapɨ jese vae yandeYa pe, osondo vaerä mbaerasɨ pɨ̈chɨi yae vae kuae yandeɨvɨ pe.

22Jare Arauna jei:

—Eipɨɨ cheruvicha, jare eyapo pɨpe ndeve jaekavi vae. Joko oï toro reta, oyeyuka opaetei oyeapɨ vaerä, ɨvɨra mbaembopiririka jare yuvo reta toï yepearä.

23¡Opaete kuaekuae tamee ndeve cheruvicha!

Jare jei ye vi Arauna:

—¡Mbae mona rembopɨakatu ndeYa Tumpa cheruvicha!

24Ërei mburuvicha guasu jei Arauna pe:

—¡Yasoropai Arauna! Ërei aguata ko ndegüi jepɨ rupi kavi, echa mbaetɨta amee cheYa Tumpa pe mɨmba oyeyukagüe opaeteita oyeapɨ vae, mbaetɨ etei reve kërai yepe amboepɨ.

Jayave David ogua Arauna güi jókuae trigo oyembopiriría renda jare toro reta cincuenta reare korepoti pegua pe,

25jare omopüa joko pe metei mɨmba oyeyuka oyeapɨ jese vae, jare omee jese mɨmba oyeyukagüe opaetei oyeapɨ vae jare mbota yembopɨakatu pegua. Jayave yandeYa oendu tëta isapúkai, jare osondo mbaerasɨ pɨ̈chɨi Israel pe.