2 SAMUEL 21 - Guarani Bible with DC

Gabaón pegua reta iyepɨ

1David oiko mburuvicharä yave oiko karuai mboapɨ año rupi. Jayave David oparandu yandeYa pe, jare yandeYa jei chupe: “Kuae karuai ou ko Saúl jare taɨ reta jare jëtara reta jeko pegua, echa oyuka reta tëta Gabaón pegua kuimbae reta.”

2Jayave mburuvicha guasu oenɨi Gabaón pegua reta, jare imiari jae reta ndive. (Gabaón pegua reta, mbaetɨ ko Israel iñemuña reta, amorreo reta iñemuñagüe ko, jókuae Israel iñemuña reta oyapo arakae ñererökuaveeJos 9.3-15. chupe vae reta agüɨye vaerä oyuka; kuae reta yepe Saúl opa pota tëi oyuka, Israel jare Judá pegua reta re jägüɨro ramo.)

3David oparandu Gabaón pegua reta pe:

—¿Mbae pa ayapota peve, ani mbae pe pa pombopɨakatuta pere vaerä ñee kavi tëta yandeYa imbae vae kotɨ?

4Jare Gabaón pegua reta jei:

—Mbaetɨ ko roñeapo roï Saúl re jare jo pegua reta re korepoti ani oro jeko pegua; jare mbaetɨ vi roipota omano metei kuimbae ave Israel pe.

David jei chupe reta:

—Pe pere chevegüe tayapo peve.

5Jare jae reta jei mburuvicha guasu pe:

—Jókuae kuimbae oipota tëi opa oreyuka vae, jókuae oyemongeta opaetei oremboai kuae tëta Israel güi vae,

6iñemuña reta güi emee oreve chiu, royuvɨ vaerä yandeYa jóvai Gabaa Saúl yandeYa jembiparavo jëta pe.

Jare mburuvicha guasu jei:

—Tamee peve.

7Mburuvicha guasu iñɨ̈ro Mefi-boset, Jonatán taɨ pe, jae ko Saúl jɨmɨmino. Jókuae ñererökuavee päve yandeYa jee re David jare Jonatán oyapo reta oyoupe vae.1 S 20.15-17; 2 S 9.1-7.

8Ërei oipɨɨ mókoi reve Rizpa, Aja tayɨ imembɨraɨe, kuae reta jae ko Rizpa imembɨ Saúl pe vae, jee reta Armoni jare Mefi-boset, jare pandepo Mical,1 S 18.19. Saúl tayɨ imembɨraɨe reta; kuae reta jae ko Mical imembɨ Adriel, Barzilai taɨ pe vae reta. Barzilai ko Mehola pegua,

9jare mburuvicha guasu opa omee Gabaón pegua reta ipo pe, jare jae reta opa oyuvɨ ɨvɨtɨ pe yandeYa jóvai; jökorai opa omano jókuae chiu reta, mbaarɨvo cebada ipoo oyemboɨpɨmí ramo yave.

10Jayave Rizpa, Aja tayɨ oipɨɨ metei temimonde jaimbe vae, jare oipɨso iyeupe metei ita guasu re, opɨta joko pe mbaarɨvo oyemboɨpɨ güive ou regua oväe ama iara, mbaetɨ omaeño chucha ogüeyɨ tëogüe reta re ani mɨmba pochɨ vae pɨ̈tu yave.

11Jare omombeu reta David pe Rizpa, Saúl amɨri güɨrekoiño kuña vae oyapo oiko vae yave,

12ojo güeru Saúl jare taɨ Jonatán ikägüegüe, kuimbae reta tëta Jabes ɨvɨ Galaad pegua reta güi, echa jae reta ko oñomi tëta Bet-sán joka güi, filisteo reta ombosavavaa güi; filisteo reta oyuka yave Saúl, Gilboa pe.1 S 31.8-13.

13Javoi David opa güɨrajauka joko güi Saúl jare taɨ Jonatán ikägüegüe, jare vi oyeyuvɨgüe reta ikägüegüe.

14Jare oñotɨ reta Saúl jare taɨ Jonatán ikägüegüe Zela pe, Benjamín iñemuñagüe reta iɨvɨ pe; oñotɨ tu amɨri Cis jɨvɨa oïa pe. Oyeapo opaete mburuvicha guasu jei rami. Javoi Tumpa ipɨakatu ye jókuae ɨvɨ pegua reta pe.

Abisai güɨroasayepe David jekove

15Filisteo reta jekuae yogüeru ye oñeraro Israel pegua reta ndive. Jayave David opaete isundaro reta ndive yogüɨraja oñeraro jae reta ndive. Jare David ikangɨ yae,

16javoi metei kuimbae ipuku yae vae oipota tëi oyuka; jókuae kuimbae ipuku yae vae jee Isbi-benob; imii jiero iyu vae pegua oasa treinta kilo ipoɨ, jare güɨreko vi ikúa re kɨsepuku ipɨau vae.

17Ërei Abisai, Sarvia imembɨraɨe ou omborɨ, ombopere jare oyuka jókuae filisteo. Jayave isundaro reta jeiuka chupe Tumpa jee re mbaetɨ yeta ma oë jae reta ndive ñeraroa pe vae, agüɨye vaerä ogüe rami Israel pe jërakua yae vae.

David isundaro reta oyuka kuimbae ipukugüe reta(1 Cr 20.4-8)

18Oime ye ïru ñeraro filisteo reta ndive Gob pe. Jayave Sibecai husatita oyuka Saf; kuae jae ko kuimbae puku vae reta iñemuñagüe.

19Jekuae oime ye ñeraro filisteo reta ndive Gob pe; jayave Elhanán oyuka Goliat, Gat pegua tɨvɨ;1 Cr 20.5. jókuae kuimbae imii iɨ ipoguasu, ɨvɨra asoya oyeapo jese vae ipoguasu rami. Elhanán jae ko Jaare-oregim Belén pegua taɨ.

20Jaɨkue rupi oime ye ñeraro Gat pe. Joko pe oiko metei kuimbae ipuku yae vae, doce ipɨ̈sa jare doce vi ipoäka; opaete reve veinticuatro; kuae jae vi kuimbae puku vae reta iñemuñagüe,

21jókuae kuimbae iñee jasɨ katu Israel kotɨ, ërei Jonatán oyuka. Kuae Jonatán jae ko Simea, David tɨkeɨ taɨ.

22Kuae irundɨ jae ko Gat pegua kuimbae puku yae vae reta iñemuñagüe, ërei opa oyeyukauka reta David pe jare isundaro reta pe.