SABIDURÍA 6 - Guarani Bible with DC

Tëta ruvicha reta toeka arakuaa

1Peyeapɨsaka, mburuvicha guasu reta, jare peikuaa;

peikatu, opaete vae juvicha reta;

2pemae ngatu, pe jeta vae re oyangareko vae reta

jare oeka tëta ruvicharä yogüɨreko vaerä vae reta.

3Tumpa, Ɨvate ete pe oï vae Tumpa,

omee chupe mbaepuere jare mborookuai;

jae ko oechata mbae peyapo vae

jare oekata mbae ko peipota vae,

4echa, peiko ramboeve Tumpa iporookuai rupi,

mbaetɨ mbae peyapo jupi rupi, jare mbaetɨ peyapo mborookuai,

mbaetɨ peiko Tumpa oipota rami.

5Tumpa outa ko peve

güɨramoiño jare jasɨ katu rupi,

echa jae oyapo ko mbae tuichagüe reta pe añetegüe rupi.

6Oiparareko omae paravete vae reta re jare iñɨ̈rota chupe,

ërei ipɨ̈rata vae reta pe oiporuta mbae oyapogüe añetegüe rupi.

7Jae ko opaete vae iTumpa jaema jae mbaetɨ ko oporoparavo,

echa jae mbaetɨ ko okɨɨye tuicha vae güi.

Jae ko oyapo tuicha vae reta jare michi vae reta,

jaema opaete vae pe ko oyemoambeko;

8ërei tuicha vae reta re ko ma omae.

9Kuae jae peve, mburuvicha reta,

peecha vaerä arakuaa jare agüɨye vaerä peyembojopa.

10Kia ñavo jupigüe rupi oyapo mborookuai ikɨambae yave,

oyepapata ko tëta ipo ikɨambae vae reta ndive;

kia ñavo oyemboeuka chupe vae,

oväeta ko kërai oyeepɨ vaerä.

11Penoi, vi, täta kɨ̈reɨ cheñee re;

peeka ikavi rupi jaema jayave penoita arakuaa.

12Arakuaa täta ko jembipe mbaetɨ ko ikɨa;

kia ñavo oaɨu vae, oväeta ko yavaimbae reve,

jare kia ñavo oeka yave, oväeta vi chupe;

13jaeiño vi ko oyekuaauka kia oipota vae reta pe.

14Kia ñavo okeä ojo oeka vae ngaraa ikangɨ:

jare oväeta chupe jöke pe oguapɨ oï yave.

15Jesei iyemongeta oñono vae jaemai ko oväe oï chupe;

kia ñavo oväe regua ipɨare katu vae,

jarembae pegua ma ko opa oasa chugüi iyemoambeko reta.

16Jae ojo vi ko kotɨ kotɨ

oeka kia ko jae chupeguarä vae;

jare tape rupi oyeechaukata chupe ipɨakavi reve

jaema oikota vi ko chupe iyemongeta.

17Arakuaa iyɨpɨ

jae ko täta ñanekɨ̈reɨ mbae yaikuaa vae;

yaipota yae mbae re yayemboe vae jae ko arakuaa yaipota vae;

18yaaɨu vaerä jae ko yayapota jeigüe vae;

jare yayapo jeigüe yave jae ko omeeta yandeve ñamano mbae vaerä,

19jare ñamano mbae vae ko ñaneñonota köiño Tumpa güi.

20Jaema, kia ñavo arakuaa oipota vae

jae ko jókuae mburuvicha guasurä añetete pegua oiko vae.

21Tëta ruvicha reta,

peaɨu perenda ikavigüe vae jare mbae pepo pegua yave,

peyeaeä arakuaa re,

peiko vaerä peiko mburuvicharä.

Arakuaa kërai ko vae

22Jaeta peve kërai etei ko vae

jare ketɨ güi ko ou vae,

mbaetɨ reve mbae aikuaku pegüi.

Yajata yayu iyɨpɨ güi

jare aikuaauka kavita peve,

mbaetɨ reve yaasa añetegüe iárambo rupi.

23Mbaetɨta amee iporomotareɨ vae jeigüe oiko vaerä,

echa jókuae ko ngaraa oikuaa arakuaa re.

24Opaete ɨvɨ ipuere güɨnoi yemboasa iyarakuaa vae jeta yave,

jare mburuvicha iyarakuaa katu vae oyapota ko jeta oiko kavi vaerä.

25Jayave, pemaeño kuae cheñee tapemboe

jare jaekavita ko peve.