JUDIT 6 - Guarani Bible with DC

Aquior oñemeeuka Israel-ɨgua reta pe

1Jare opa ma oporomboarakuaa vae reta ikupe rupi ñogüɨnoi vae reta oñemokïrii yave, sundaro ruvicha guasu, Holofernes, jei Aquior pe jare opaete Moab pegua reta pe, jare opaete ketɨgua reta jovake:

2“¿Kia pa nde, Aquior, ndeyomborɨ katu ïru Efraín pegua reta ndive, añave joko reyu reyeapo reï oreve metei emombeu rami jare oremboarakuaa reï agüɨye vaerä rojo ropoko roï Israel-ɨgua reta re, echa iTumpa oepɨ retata ko vae? ¿Oime yee yera: iru tumpa Nabucodonosor güi? Jae ko omondota imbaepuere opa vaerä jókuae reta omokañɨtei kuae ɨvɨ güi, jare jae reta iTumpa ngaraa ipuere güɨroasayepe reta oregüi.

3Ore, Nabucodonosor jembiokuai reta, opata ko royakambɨ reta metei rami; ngaraa ipuere reta orekavayu regua reta re.

4Opata ko romokañɨtei reta. Iɨvɨtɨ reta romboesagüɨrɨta ko jugüɨ pe, jare ñuu tɨnɨeta ko jëogüe reta pe. Ngaraa etei ko ipuere oyemboɨ reta oreróvai. ¡Opa tai ko omano reta! ¡Jökorai etei ko jei mburuvicha guasu Nabucodonosor, opaete ɨvɨ iya! Jae ko jökorai jei, jaema jae iñee ngaraa oikombae.

5Jare nde, Aquior, Amón pegua omboepɨ ndeve vae, añave reyu rere reï kuae ñee ikavimbae vae, añave kuae güi tenonde kotɨ aipota ye ma reyu reyemboɨ cheróvai, opa regua oyepɨ jókuae Egipto güi opa osɨi vae reta re.

6Che ayerova yee yave, chesundaro reta jare cherembiokuai reta ndekutu retata imii pe, jare remanota Israel-ɨgua reta rami.

7Añave, cherembiokuai reta nde rerajata ɨvɨtɨ pe jare ndereeya retata oipotagüe tëta oï ɨvate vae pe.

8Añave remano potaä räri; jókuae reta ndive remanota.

9Ërei ndeɨvɨte pe reyemongetaño reï jae reta ngaraa ko iñamɨri vae yave, agüɨye mo ndepɨatɨtɨ. ¡Che jaema ko jae, metei äve jaegüe ngaraa oyeapombae!”

10Opa jókuae jei yave, jaema Holofernes omondo jembiokuai reta oipɨɨ vaerä Aquior, jare güɨraja reta Betulia kotɨ oeya vaerä Israel-ɨgua reta pe.

11Jaemai tembiokuai reta ojo oipɨɨ, jare güɨnoe reta teyupa güi güɨraja ñuu kotɨ, joko güi güɨraja reta ɨvɨtɨ kotɨ yogüɨraja reta oväe ɨesaɨ Betulia igüɨ pe oï vae pe.

12Jare jókuae tëta pegua kuimbae reta oecha oyeupi ɨvɨtɨ re yave, opa opoko reta jembiporu re, jare opa vi yogüɨraja oyeupi ɨvɨtɨ re, jare opaete tamamboka pe ipoki ita ojäa vae reta opoko oyapi itape, jare mbaetɨ omaeño reta oyeupi.

13Jaema jae reta, osɨrɨrɨ ɨvɨtɨ güi ɨvɨ kotɨ, jare oipokua reta Aquior, jare omombo reta oeya ɨvɨtɨ igüɨ kotɨ, jare oyerova reta yee itenondegua oïa pe.

14Jaema Israel-ɨgua reta ogüeyɨ jëta güi, jare ou reta oväe Aquior pe, jare oyora reta güɨraja Betulia pe, itenondegua reta pe.

15Jókuae ara yogüɨreko tenonde Ozías, Miqueas taɨ, Simeón iñemuña; Cabris, Otoniel taɨ jare Carmis Malquiel taɨ.

16Jaema jókuae reta oenɨi ma opaete ndechi reta jókuae tëta pegua, jare kunumi reta jare kuña reta opa yogüeru yatɨ. Jare Aquior oñono reta mbɨte pe, jare Ozías oparandu chupe mbae ko oasa vae.

17Jaema jae omombeu chupe reta opaete jei jei Holofernes vae, jare jae ko mburuvicha Asiriaɨgua reta jóvai jei vae, jare Holofernes iñeeasɨ Israel-ɨgua reta kotɨ.

18Jare opaete tëta ipo reta itindɨ Tumpa omboete, jare osapúkai reta:

19“¡CheYa, Tumpa ara pe reï vae, emae orerovaicho iya vae reta re, jare enoi mboroparareko oreré cheYa! ¡Emae oreré añave, echa ore jae ndembae!”

20Jare ombopɨa maia reta Aquior jare omboete reta.

21Jaema Ozías güɨnoe güɨraja yemboatɨa güi, jëta pe, jare omboarete ndechi reta. Jare opaete jókuae pɨ̈tu oiporu reta Israel iTumpa pe omborɨ reta vaerä.