1Jáeramo, yaeya mo yamboɨpɨ ramo yave yayemboe Cristo regua vae, yaja tenonde kotɨ yaikuaa kavi vaerä; agüɨye yamboɨpɨ pɨau ye tenonde yave yayemboe ma jese vae, jae ko peyepoepɨ pereko reta mano pegua güi vae re jare mborogüɨrovia ye Tumpa re vae,
2yemboe bautismo regua, ñañono yandepo ïru vae reta iñäka re vae, omanogüe vae oikove ye vae regua jare Tumpa iporojäa opambae vae regua.
3Kuae yayapota, Tumpa oipota yave.
4Echa metei oyeesape ma vae, jare jókuae oendu ma Tumpa omeegüe vae, jare oikuaa ma Espíritu Santo vae reta,
5oikuaa vi Tumpa iñee ikavi yae vae jare mbaepuere reta ara outa vae pegua regua,
6jare opa oa ye reta, yavai yae ko oyerova pɨau ye vaerä, echa oikutuuka ye Cristo rami ko jare oyoyaiuka ye rami.
7Echa okɨ avei vae pegua ɨvɨ, oparavɨkɨ vae pe okuakuaa kavi jemitɨ jökorai Tumpa iporerekua jese;
8ërei jókuae ɨvɨ pe oñemoña yave ñurati katuai, ɨvɨ iya jeita: “Mbaetɨ ikavi kuae ɨvɨ.” Tumpa oyepopeyutaGn 3.17-18. jese jare opata oyeapɨ.
9Ërei, cherɨvɨ aaɨu vae reta, yepe tëi chemiari ma peve körai, ërei aikuaa pe reta mbaetɨ ko pepia yemboasa güi.
10Echa Tumpa jupi vae ko, ngaraa iñakañɨ peyapo vae güi, jare peporoaɨu peechauka ikotɨ vae güi, echa peyeokuai oporogüɨrovia vae reta pe añave regua.
11Jare aipota metei ñavo pe reta peechauka peräta ngatu ko kuae re iyapɨ regua vae, peyerovia katu vaerä peäro peï vae re,
12agüɨye vaerä peakɨ, ërei peiko jókuae iporogüɨrovia rupi jare ipɨaguasu rupi omboresive ma Tumpa güɨrökuavee chupe vae reta rami.
13Echa Tumpa güɨrökuavee Abraham pe yave, mbaetɨ kia tuichagüe yae vae chugüi ramo jei iyé aeño,
14Jare jei: “Añetete cheporerekua yaeta nderé jare rombojeta yaeta.”Gn 22.16-17.
15Jare Abraham, oäro ipɨaguasu reve jare güɨnoi Tumpa güɨrökuavee chupe vae.
16Kuimbae reta oyapo yave morogüɨrökuavee oyoupe, oyapo ko tuicha yae chugüi vae jee re. Jare chupegua reta, oyapo yave jókuae nunga morogüɨrökuavee mbaetɨ ye ko yoaka.
17Tumpa oipota yae oikuaauka kavi iyemongeta oyepoepɨmbae vae jókuae oñererökuavee chupe reta ramo, oñererökuavee iyé aeño.
18Mókoi reve, Tumpa oñererökuavee vae jare jei jee re aeño oyepoepɨmbae re, Tumpa ngaraa etei iyapu, ñanoi mbɨakatu tuichagüe yande yaeka Tumpa iporomborɨ vae jare ñaäro yayerovia reve ñanoi vaerä Tumpa güɨrökuavee yandeve vae.
19Jókuae ñaäro ñaï yayerovia reve vae jae ko yandemborɨ agüɨye vaerä yapia Tumpa güi, oike asoya o imboyaoa japɨpe pe,Lv 16.2.
20jókuae Jesús räri oike tenonde yandeve, jare Tumpa oyapo ma sacerdote tenondegua eterä jekuae avei pegua MelquisedecSal 110.4. rami.
Who We AreWhat We EelieveWhat We Do
2025 by iamachristian.org,Inc All rights reserved.
