ISAÍAS 28 - Guarani Bible with DC

Samaria oñejäata vae regua

1¡Paravete Samaria,

Efraín pegua savaɨpo regua reta oyemboete jese vae;

oñemopöra mbaepotɨ ipiru katu pe vae rami vae,

iɨvɨpe kavi jembeɨ ɨvatea re oï vae,

vino iua reta jëta!

2YandeYa oime güɨnoi metei jëia yae vae,

imbaepuere yae ɨvɨtuai amandau reve vae rami vae,

okɨ rai vae mbae omboai vae rami vae,

ɨporu rami vae,

opaeteita mbae oitɨ oeya ɨvɨ pe rami vae,

3ipɨ pe opata oumbiri,

kuae ɨvɨ Efraín pegua savaɨpo regua reta oyemboete jese vae.

4Jare jókuae mbaepotɨ ipirugüe pe oñemopöra vae,

iɨvɨpe kavi jembeɨ ɨvatea re oï vae,

ɨva tenonde ete ia yagüɨye vae ramita,

echa kia oecha yave, jae ma voi oekɨ jou vaerä.

5Jókuae ara yandeYa Imbaepuere yae ete vae oïta tëta imbae vae jembɨregüe reta peguarä äka-regua yemboete pegua rami,

jare mbae imopöraka ikavi yae vae rami,

6jare oporojäa vae reta ipɨa pe oñonota jupi vae,

jare sundaro reta oepɨ tëta guasu vae pe omeeta mɨ̈rata.

Yeandu katu jare morogüɨrökuavee Jerusalén peguarä

7Ërei kuae reta oyavɨ vi vino jeko pegua,

mbae oporombosavaɨpo vae omombia iyemongeta kavi güi:

Sacerdote jare ñeemombeúa reta oyembosavaɨpo,

vino omombia reta iyemongeta kavi güi,

oyemboesagüɨrɨuka reta mbae oporombosavaɨpo vae pe,

osavaɨpo reve imiari mbae oasata vae re,

osavaɨpo reve oporojäa reta.

8Echa güëegüe pe yavaete mesa,

mbaetɨ kërai yepe ikɨambae.

9Iñeeasɨ katu reta chekotɨ, jei reta:

“¿Oremboeta pa arakuaa re,

oremboeta pa mbae ko Tumpa jei vae re,

michia raɨ reta rami;

10jókuae michia reta jaeramo etei oyemboe:

a, e, i, o, u jei vae re ñogüɨnoi vae rami?”

11Ërei, mbaetɨ oipota reta oendu yave,

Tumpa omomiarita ñee yavai yae vae rupi,

ketɨgua ñee rupi.

12Echa chupe reta Tumpa jei tëi:

“Kuae pe peiko pɨagüive,

ikangɨ vae, toputuu.”

Ërei jae reta mbaetɨ oipota oyeapɨsaka jese.

13Jáeramo, yandeYa omomiarita michia raɨ rami,

jaeramo etei oyemboe a, e, i, o, u jei vae re ñogüɨnoi rami.

Jae reta oguatata, ërei oyatuaka retata,

oñemopë retata, mbaetɨta ipuere omɨi,

oa retata tembipɨɨrä.

Jerusalén iyemombarandu

14Jáeramo, peyeapɨsaka yandeYa iñee re,

pe, kuimbae oporoyóyai yóyai vae reta,

kuae tëta Jerusalén juvicha reta.

15Pe reta pere:

“Oremiari kavi mano ndive jare omanogüe reta ñogüɨnoia ndive.

Jayave mbaesusere ou yave ngaraa maratu roasa,

echa roeka royepɨɨ vaerä apu re,

jare roñemi vaerä yembotavɨ re.”

16Jáeramo yandeYa jei:

“Mase, ko añonota Sión pe metei ita,

ita oyeparavogüe, ikavi yae vae,

o ekina iguapɨka,

o iguapɨka okúembae,

jese güɨrovia vae toiko pɨagüive.

17Jókuae o re aiporuta jupi vae, plomada rami,

jare sɨmbi vae, nivel rami.”

Amandau opata omboai jókuae apu, peeka peñepɨ̈ro jese vae,

jare peñemi pɨpe vae, ɨ opata omboai pegüi.

18Jare jókuae miari kavi peyapo mano ndive vae,

jare omanogüe reta ñogüɨnoia ndive vae oyemboaita pegüi.

Jare ou mbaesusere yave, ngaraa pemomara chugüi.

19Ou ñavo, otupeita peré,

pɨareve ñavo outa,

ara pe jare pɨ̈tu yave.

Peendu ou yave, jae ma pemboɨpɨta perɨrɨi.

20Yavai yaeta, tupa michi vae pe mbaetɨ yandepuere yayepɨso vae rami,

ani asoya michi yae vae pe yayeasoi rami.

21Echa yandeYa oyapota ɨvɨtɨ Perazim2 S 5.20; 1 Cr 14.11. pe rami,

ɨvɨtɨ päu ipe kavi vae GabaónJos 10.10-12. pe rami iyarasɨta,

oyapo vaerä jembiapo, jembiapo ambuaeyee vae,

oyapo vaerä jembiapo yaikuaa rapembae vae.

22Jayave, ¡agüɨye mo pepuka puka!,

agüɨye vaerä jeiete ikaviä teko peve;

echa aendu yandeYa Imbaepuere yae ete vae,

jei ma opa vaerä oyemboai kuae ɨvɨ.

23Peyeapɨsaka, peendu kuae jae vae,

peendu kavi kuae ñee:

24Oparavɨkɨ vae, iko pe omaetɨta yave,

mbaetɨta oaraiño oeya iɨvɨ,

ani omongúiño ɨvɨkɨ̈ta ani omboatɨiño oeya ɨtɨ.

25Opa güire ombosɨmbi kavi iko,

¿mbaetɨ pa omoai temitɨ eneldo jee vae jäɨ jare comino jäɨ,

ani trigo ombojɨsɨ kavi oñotɨ,

javoi cebada jare avena oñotɨ jembeɨ rupi?

26Echa Tumpa ko omboe kavi kërai oyapo vaerä.

27-28Echa eneldo jare comino mbaetɨ ko oyembopiriri trigo rami;

trigo oyembopiriri mbae ipoɨ vae pe ani käretou iruera oñemopɨ̈ro jese,

ërei mbegüe pe kavi, agüɨye vaerä opa omonguruvi;

ërei eneldo jare comino oyembopiriri vaerä oñenupa ko ɨvɨra pe.

29Jökorai ko yandeYa Imbaepuere yae ete vae yarakuaa katu,

oyapo vaerä opaete kuae mbaembae,

jare oyapo iyarakuaa katu rupi kavi.