NEHEMÍAS 8 - Guarani Bible with DC

1Javoi oyomboatɨ opaete vae reta metei rami oka guasu pe, öke Ɨ Röke jee vae jóvai, jare jei reta Esdras mborookuai re oporomboe vae pe güeru vaerä tembikuatía Moisés oikuatía mborookuai reta pɨpe vae, yandeYa omee Israel iñemuña reta pe vae.

2Jare sacerdote Esdras güeru jókuae mborookuai, oyemboatɨ vae reta jóvai, jae ko kuimbae reta, kuña reta jare opaete michia ipuere ma oikuaa vae reta; jae ko tenondegua ara, yasɨ chiúa pe.

3Jare omongeta tembikuatía oka guasu jóvai, öke Ɨ Röke jee vae jóvai, ndeimboveasɨ güive kuaraɨ ara mbɨte regua, opaete kuimbae reta jare kuña reta jóvai, jare opaete michia ipuere ma oikuaa vae reta jóvai.

Jare opaete vae kïrii oyeapɨsaka mborookuai oyekuatía oï vae re.

4Jare Esdras, mborookuai re oporomboe vae, oyemboɨ oï ñemoñee renda ɨvɨra pegua re, jókuae peguarä oyeapo vae re, iyakatu kotɨ ñogüɨnoi jae ndive: Matatías, Sema, Anías, Urías, Hilcías, jare Maasías. Jare iyasu kotɨ ñogüɨnoi: Pedaías, Misael, Malquías, Hasum, Hasbadana, Zacarías jare Mesulam.

5Esdras oipea tembikuatía opaete vae reta jesa róvai, echa ɨvate oï opaete vae güi; jare oipea yave opaete yatɨ vae reta oñemokïrii.

6Jayave Esdras omboete yandeYa Tumpa tuicha ete vae, jare opaete vae jei: ¡Amén! ¡Amén! Oupi reve ipo reta; jare oñemomichi reta jare omboete reta yandeYa Tumpa oyetavatɨka itindɨasɨ reve ɨvɨ re.

7Jare levita reta Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán jare Pelaía, oikuaauka kavi reta mborookuai opaete vae pe; jare opaete vae kïrii ngatu oyeapɨsaka jenda jenda ae pe,

8omongeta reta mbegüe pe kavi jókuae tembikuatía Tumpa iporookuai oï pɨpe vae, jare omombeu kavi mbae ko oipota jei vae, opaete vae ipuere vaerä oikuaa kavi jókuae oyemongetagüe.Dt 31.11-13; 2 R 23.2.

9Jare mburuvicha Nehemías jare sacerdote Esdras mborookuai re oporomboe vae, jare levita reta omombeu kavi opaete vae pe vae, jei reta opaete vae pe: “Kuae ara oñeñono tee yandeYa Tumpa pe vae ko; agüɨye pepɨatɨtɨ, agüɨye peyaeo.” Echa opaete vae oyaeo oendu ramboeve ñee reta mborookuai regua.

10Jaɨkue rupi jei chupe reta: “Pekua, peu soo ikɨra kavi vae jare vino jëe kavi vae, jare pemee vi tokaru mbaetɨ güɨnoi vae reta; echa ara oñeñono tee yandeYa pe vae ko; agüɨye pepɨatɨtɨ, echa yandeYa Tumpa pegua yerovia ñanemomɨ̈rata vae ko.”

11Jare levita reta omokïrii opaete vae, jei reve: “Pekïrii, echa ara oñeñono tee Tumpa pe vae ko; agüɨye peyaeo.”

12Jayave opaete vae reta yogüɨraja okaru jare oɨu, oyombopota reta tembíu pe, ovɨa katu jare oyerovia yae reta, echa oikuaa kavi ñee reta omboe reta jese vae.

O ñairaka pegua reta iyarete

13Pɨareve pe oyemboatɨ opaete tëtara ñavo itenondegua reta, opaete vae reta güi, sacerdote reta jare levita reta, Esdras mborookuai reta re oporomboe vae jóvai, oikuaa kavi reta vaerä ñee reta mborookuai regua.

14Jare oväe reta mborookuai pe oyekuatía oï, kërai yandeYa Tumpa oporookuai Moisés rupi, ñogüɨnoi vaerä opaete Israel iñemuña reta o ñairaka pegua pe,Lv 23.33-36,39-43; Dt 16.13-15. yasɨ chiúa pe, arete mbaemboete pegua oyeapo yave;

15jare oikuaauka reta vaerä omoërakuauka reta opaete tëta ñavo rupi, jare Jerusalén pe, jei reve: “Peë kaa kotɨ, jare peru ɨvɨra olivo jäkagüe, ɨvɨra Arrayán jee vae jäkagüe, karandaɨ jare oipotagüe ɨvɨra iküaraɨa kavi vae jäkagüe, peyapo vaerä o ñairaka pegua; mborookuai pe oyekuatía oï rami.”

16Jare oë opaete vae, jare güeru reta ɨvɨra jäkagüe jare oyapo reta o ñairaka pegua, metei metei ñavo vae jo iárambo, joka pe, Tumpa jo joka pe, öke Ɨ Röke jee vae joka guasu pe, jare öke Efraín jee vae pe.

17Jare opaete vae oyerova ye tembipɨɨ güi vae reta oyapo o ñairaka pegua, jare pɨpe ñogüɨnoi; echa Josué, Nun taɨ omano güire mbaetɨ oyeapo kuae rami etei vae. Jare oiko yerovia tuicha yae vae.

18Oyapo reta arete mbaemboete pegua chiu ara, jare Esdras omongeta Tumpa iporookuai reta tembikuatía pe oï vae ara ñavo, tenondegua ara güive chiu ara regua; jare juri araa pe oiko yemboatɨ guasu mbaemboete pegua, oyaposeñoi rami.