2 CORINTIOS 12 - Guarani Bible with DC

Tumpa oechauka Pablo pe vae

1Mbaetɨta jaekavi ayembotuicha vaerä che aeño, ërei tamombeu peve kërai yandeYa oechauka jare oikuaauka cheve vae.

2Aikuaa metei kuimbae Cristo re güɨrovia vae. Oasa ma catorce año oyereraja mboapɨa ara ɨvategua ete pe. Mbaetɨ aikuaa ojo ra jete reve ani mbaetɨ ra. Tumpaño oikuaa.

3Che aikuaa jókuae kuimbae (mbaetɨ aikuaa ojo ra jete reve ani mbaetɨ ra, Tumpaño oikuaa),

4oyereraja ara pe, joko pe aendu ñee reta yaikuaambae jare ñajäa rapembae vae.

5Jókuae kuimbae chepuere ambotuicha. Ërei che aeño ngaraa ayembotuicha. Jaeño ayembotuichata chepɨ̈ratambae re.

6Ërei ngatu, aipota ayembotuicha yave ngaraa chemiari iyarakuaambae vae imiari rami, echa chemiarita ko añete vae re. Ërei ngaraa chemiari jese, agüɨye vaerä kia oasa ete chembotuicha chereecha vae güi jare chereendu vae güi.

7Jáeramo, yandeYa oechauka cheve mbaembae tuichagüe vae rupi agüɨye vaerä oasa ete ayembotuicha, ou cheve metei yuu yanderete re oï vae rami vae, jae ko Satanás jembiokuai oiporarauka cheve vae.

8Jókuae re mboapɨ ye ma amoñera tëi yandeYa oekɨ vaerä chegüi;

9ërei yandeYa jei cheve körai: “Chepɨakavi oï nde ndive vae jaekavi ma ko. Echa chembaepuere oyekuaa ko ipɨ̈ratambae re.” Jáeramo, ayerovia reve ayembotuichata chepɨ̈ratambae re, Cristo imbaepuere oyekuaa vaerä cheré.

10Jáeramo, ayerovia chepɨ̈ratambae re, yekura rupi, mbae oata vae rupi, tembiporara rupi, mbɨatɨtɨ rupi; echa ayandu mbaetɨ chepɨ̈rata yave ko, chemomɨ̈rata yae.

11Ayeapo metei iyarakuaambae vae rami ayemboete vae rupi, pe reta etei peyapouka jókuae cheve. Pe reta ko chemboeteta tëi. Echa jókuae temimondo añetembae tuichagüe reta güi, mbaetɨ ayandu chemichi yae, yepe tëi mbaeä etei ko che.

12Jeseve opaete mbɨaguasu rupi jare mɨakañɨ reta oyeapo pepɨte rupi vae oikuaauka che ko jae temimondo añetete vae.

13¿Mbae pe pa mbaetɨ peyovake ïru oporogüɨrovia vae reta ndive? Jae ko mbaetɨ pomoambeko mbae re vae, peɨ̈ro cheve jókuae re.

Pablo omoërakua ojo yeta mboapɨa ma vae

14Mase, añave ayeapo katu aï aja ye vaerä pépɨri mboapɨa ma. Mbaetɨta pomoambeko mbaembae re, echa mbaetɨ ko aeka pembaembae, pe etei ko poeka. Echa tu reta ko oñovatu taɨ reta peguarä, mbaetɨ ko taɨ reta oñovatu tu peguarä.

15Chekɨ̈reɨ ngatu reve aiporuta chembaembae, che etei añemeeta poaɨu vae jeko pegua. Yepe tëi che poaɨu yae reve pe reta mbaetɨ cheraɨu ete.

16Che mbaetɨ pomoambeko mbae re, ërei amogüe reta jei: “Añete, Pablo mbaetɨ yandemoambeko mbae re, ërei oime ko aipo kërai yandembotavɨ.”

17¿Pombotavɨ pa jókuae amondo pépɨri vae reta rupi?

18Amoñera Tito jare ïru yanderɨvɨ ojo vaerä pépɨri. ¿Tito pembotavɨ pa? ¿Jae oyapoä yera ikɨ̈reɨ ngatu reve che rami?

19Güɨramoi peyemongeta kuae oremiari vae royeepɨ vaeräño ko. Ërei jökoraiä ko. Oremiari körai Tumpa jovake Cristo re rogüɨrovia ramo. Cherɨvɨ reta, royapo ko opaete kuae pepɨ̈rata vaerä peporogüɨrovia pe.

20Aipoɨu aja ye yave pépɨri, güɨramoi aechata mbaetɨ peiko che aipota rami, jare güɨramoi pe reta chereechata mbaetɨ peipota rami. Aipoɨu peyoaka oyoupii, peakatúä oyoe, peyomboarasɨ, peyemboyao oyougüi, peñeeasɨ katu oyoupe, peñeenguru oyoupe, pɨapochɨ, tekorai.

21Güɨramoi Tumpa chemomaraita peré, güɨramoi chemboyaeoukata jeta jókuae mbaeyoa oyapo vae reta re, mbaetɨ oyerova teko pɨ̈chɨi vae güi, aguasa jare kuña pota güi ani mbɨa pota güi.