ÉXODO 8 - Guarani Bible with DC

1Jayave yandeYa jei Moisés pe:

—Eike Faraón oïa pe jare ere chupe: “CheYa Tumpa jei körai: Emaeño toyogüɨraja tëta chembae, chemboete vaerä.

2Mbaetɨ remaeño yogüɨraja yave, che aiporaraukata opaete ndeɨvɨ pe pïteAp 16.13. jeta yae vae rupi.

3Oñemuñata pïte ɨ̈aka rupi, kuae reta oëta jare yogüeruta oike ndero pe, rekea iárambo jare nderupa re, nderembiokuai reta jo re, nerëta pegua reta re, nde horno pe jare opaete mbaembae ikavigüe reta reñovatúa pe.

4Jare pïte reta oyeupita nderé, nerëta pegua reta re jare opaete nderembiokuai reta re.”

5YandeYa jei Moisés pe:

—Ere Aarón pe: “Eropövee ndepopoka ɨ̈aka reta re, ɨ̈aka raɨ reta jare ɨupa reta re, joko güi oë vaerä pïte reta opaete ɨvɨ Egipto re.”

6Jayave Aarón güɨropövee ipopoka opaete ɨ Egipto pegua re, jare oë pïte opaete ɨvɨ Egipto rupi.

7Jare imbaekuaa vae reta oyapo vi jökorai imbaekuaa rupi, omboyekuaa reta vi jeta pïte opaete ɨvɨ Egipto rupi.

8Jayave Faraón oenɨi Moisés jare Aarón, jare jei chupe reta:

—Peyerure peYa kotɨ oekɨ vaerä chegüi pïte reta jare cherëta güi, javoi amaeñota yogüɨraja nerëtaɨgua reta, omee reta vaerä mɨmba oyeyukagüe peYa pe.

9Jare Moisés jei Faraón pe:

—Ere cheve kërai yave ayerure vaerä nderé, jare nderembiokuai reta re jare nerëta pegua reta re, opa ye vaerä pïte reta yogüɨraja ndegüi jare nerëta pegua reta güi, jare toñogüɨnoi reta ɨ̈aka rupiño.

10Jare Faraón jei:

—Pɨareve.

Jare Moisés jei:

—Toyeapo nde rere rami, reikuaa vaerä mbaetɨ ye kia oreYa Tumpa rami vae.

11Jare pïte reta yogüɨrajata ndegüi, ndero güi, nderembiokuai reta güi, jare nerëta pegua reta güi, opɨta retata ɨ̈aka rupiño.

12Jayave Moisés jare Aarón ñogüɨnoe Faraón oïa güi. Jare Moisés oyerure yandeYa pe Faraón re, pïte reta ombou vae re.

13YandeYa oyapo Moisés oiporu rami, jare omano pïte reta o rupi, oka rupi jare ñana rupi ñogüɨnoi vae.

14Jare omboatɨ mboatɨ etei reta pïte jëogüegüe, jare iine yae otimbo opaete ɨvɨ rupi.

15Ërei Faraón oecha jaekaviño ma oputuu ye yave, omotäta ipɨa jare mbaetɨ oipota oyeapɨsaka jae reta iñee re, yandeYa jei rami.

Kɨ́ reta regua

16Jayave yandeYa jei Moisés pe:

—Ere Aarón pe: “Eropövee ndepopoka jare eiporu ɨvɨkúi re, oyeapo vaerä kɨrä opaete kuae tëta guasu Egipto pe.”

17Jare jae reta jökorai oyapo; Aarón omopüa ipo, jare oiporu ipopoka ɨvɨkúi re, jare jókuae ɨvɨkúi oyeapo kuimbae reta ikɨrä jare opaete mɨmba reta ikɨrä vi; jökorai opaete ɨvɨkúi oyeapo kɨrä opaete tëta guasu Egipto pe.

18Jare imbaekuaa vae reta jökorai vi oyapo tëi, imbaekuaa rupi oyapo vaerä kɨ́; ërei mbaetɨ ipuere oyapo reta. Jare ikɨ opaete kuimbae reta jare opaete mɨmba reta.

19Jayave imbaekuaa vae reta jei Faraón pe:

—¡Tumpa imbaepuere ko kuae!

Ërei Faraón ipɨa oñemotäta, mbaetɨ oipota oyeapɨsaka jae reta iñee re, yandeYa jei rami.

Mberu reta regua

20YandeYa jei Moisés pe:

—Ndeimbove epüa jare ekua Faraón jóvai; mase, jae ojota ɨ̈aka pe, jare ere chupe: “OreYa jei körai: ‘Emaeño toyogüɨraja tëta chembae, chemboete vaerä.

21Echa mbaetɨ remaeño yogüɨraja reta yave, che amondota ndeve, jare nderembiokuai reta pe, opaete nerëta pegua reta pe jare ndero pegua reta pe jeta mberu oyopara para vae; jökorai opaete Egiptoɨgua reta jo tɨnɨeta jeta oipotagüe mberu pe, jare opaete ɨvɨ rupi jae reta ñogüɨnoia rupi.

22Ërei jókuae ara che añono teeta ɨvɨ Gosén, echa joko pe tëta chembae oiko; agüɨye vaerä metei mbae nunga mberu ave oï jókuae ɨvɨ pe, reikuaa vaerä che ko peYa jókuae ɨvɨ pe oï vae.

23Jare che aepɨta chembae vae retaño ndembae vae reta güi. Pɨareve oyeapota kuae mɨakañɨ.’ ”

24Jare yandeYa oyapo jökorai, ombou jeta ye oipotagüe mberu oporomoambeko yae ete Faraón jo pe vae, jare jembiokuai reta jo pe, jare opaete tëta guasu Egipto re; jare opaetei ɨvɨ oikomegua kuae mberu reta jeko pegua.

25Jayave Faraón oenɨi Moisés jare Aarón, jare jei chupe reta:

—Pekua, pemee mɨmba oyeyukagüe peTumpa pe kuae ɨvɨ peño.

26Ërei Moisés jei chupe:

—Mbaetɨ orepuere royapo vaerä körai, echa jökorai yave romeeta ko oreYa Tumpa pe Egiptoɨgua reta pe pɨ̈chɨi yae vae. Jare Egiptoɨgua reta omboete mɨmba vae royuka romee jae reta jóvai yave ¿ngaraa pa jae reta oreapi oreyuka ita pe?

27Mboapɨ ara roguatata ñuu rupi, jare romeeta mɨmba oyeyukagüe oreYa Tumpa pe, jae oreokuai rami.

28Jare Faraón jei:

—Amaeñota peo pemee vaerä mɨmba oyeyukagüe peYa Tumpa pe ñuu kotɨ, ërei agüɨyeta peo mombɨrɨ ete; jare peyerure cheré.

29Jare Moisés jei:

—Mase, kuae nderóvai güi aë ñoete, amoñerata cheYa pɨareve opa vaerä omondo nde Faraón güi, jare nderembiokuai reta güi jare tëta pegua reta güi oipotagüe mberu reta; ërei nde Faraón agüɨye ndeapu ye, reyopia vaerä Israel iñemuña reta yogüɨraja vaerä omee mɨmba oyeyukagüe oreYa pe.

30Jayave Moisés oë Faraón jóvai güi, jare oyerure yandeYa pe.

31Jare yandeYa oyapo Moisés oyerure rami, opa omokañɨ jókuae mberu reta Faraón güi, jembiokuai reta güi, jare opaete jëta pegua reta güi, mbaetɨ ye metei mberu ave opɨta.

32Ërei ngatu Faraón omotäta yeño ipɨa, jare mbaetɨ omaeño yogüɨraja tëta yandeYa imbae.