ECLESIÁSTICO 22 - Guarani Bible with DC

Iyarakuaambae jare iyakɨ vae

1Iyakɨ vae metei ita ɨkua vae rami ko;

opaete vae ko güɨröɨro jeko.

2Iyakɨ vae mbae repoti yatɨ vae rami ko,

kia ñavo opoko jese vae, omotumo ko ipo.

3Metei michia oyemboe kavimbae vae tu omomaraiuka vaerä ko;

jare tayɨ ko yave, omokañɨteiukata ko.

4Metei tayɨ iyarakuaa vae oväeta ko imerä;

ërei imarambae vae tu ombopɨatɨtɨta ko.

5Metei tayɨ iporomboetembae vae omboeteä ko ime jare tu

jare mókoi reve güɨröɨrota.

6Metei ñemoñee jaekavimbae vae omano vae oñeotɨa pe mbaembopu ipöra vae oï rami ko;

ërei tembiporara jare yeapo kavi jaeñoi ko güeru yemboarakuaa.

9Metei iyarakuaambae vae yamboe vae metei yapepo opugüe yaipota yamboya rami ko

ani ramo kia täta oke oï vae yamomba rami ko.

10Metei yarakuaambae ndive ñanemiari vae metei opa iyeí oï vae ndive ñanemiari rami ko;

echa iyapɨ pe oparanduta: “¿Mbae ye ra?”

11Eäpiro metei omano vae, echa tembipe oata chupe;

eäpiro metei iyarakuaambae vae, echa mbaetɨ iyarakuaa;

mbovɨño eäpiro omano vae, echa jaema ko oputuu;

yarakuaambae jekove oyapɨraa yé mano.

12Mbɨatɨtɨ omano vae reta regua oiko ko chiu ara;

yarakuaambae reta re jare pochɨ vae reta re ko, opa ara rupi jekove pe.

13Agüɨye nemiari mbatee metei yarakuaambae ndive,

jare agüɨye epou metei ipɨarakuaa katu vae pɨri.

Eyeandu chugüi, agüɨye vaerä renoi yemboavai reta

jare agüɨye vaerä maiaa ndembokɨrau oñemotumo yave.

Eñemoata chugüi, jaema reiko pɨagüiveta

jaema ngaraa ma ndemoambeko iyarakuaambae.

14¿Oimeta ra mbae má ipoɨ plomo güi vae?

Jäa, “yarakuaambae vae” jae jókuae jee.

15Má ko yavaiä yavoɨ vaerä ɨvɨkuitï, yukɨ ani ramo metei apüa jiero,

metei yarakuaambae pe yandepɨaguasuta vae güi.

16Ɨvɨra oyekutu oï ovapetea re vae

ngaraa oyeekɨ jarembae pegua ɨvɨkana yave;

jökorai vi ko metei temimbota oya oï ipɨarakuaa vae iyemongeta re

jaema ngaraa okɨɨye susere oime yave.

17Mbae yaiparavogüe oï mbae jeko pegua vae ani pɨarakuaa jeko pegua vae

oï ko mbae jembipe vae ovapetea re oï vae rami.

18Metei kesemba oñeñono ivɨa ɨvɨtɨ iyapɨte re vae

ngaraa ipɨ̈rata ɨvɨtu pe,

jare metei kia ipɨakɨɨye vae tɨnɨe oï yemongeta jaekavimbae pe

vae ngaraa ipɨ̈rata oipotagüe yemomburu pe.

Jupi rupi oñochëi vae

19Tesa ipere yave, oë tesaɨ reta;

yandepɨa ipere yave, oyekuaa mbɨatɨtɨ reta.

20Güɨra reta yayapi ita pe yave, opa oveve;

jare yamboarasɨ metei ñochëi vae yave jaema yamboai ñañochëi vae.

21Reekɨ ndekɨsepuku metei nechëi vae pe yave,

agüɨye eyembopɨtu: Ndepuereño reñono ye jɨru pe.

22Ñee peño remboarasɨ metei nechëi vae yave,

agüɨye ndepɨatɨtɨ: Ndepuereño reo reï kavi ye.

Ërei yomboarasɨ, ñogüɨröɨro, yaecha vɨari reta vae

jare kupe rupi yoavɨkɨ vae,

jae ko mbae reta ombosɨrɨta oipotagüe ñochëi vae.

23Eiko jupi rupi nechëi pe mbaravete pe oï yave,

reyekou vaerä vi kuri jae ndive mbaeyekou pe rei yave.

Agüɨye eeya yemboavai pe oï yave,

penoi päve vaerä kuri jae ndive imbaembae reta güɨnoi ma yave.

24Horno pe tenonde ko tätati joko güi jendɨ;

jökoraiño vi, tenonde yomboarasɨ jare joko güi tugüɨ ma.

25Ngaraa chemara aepɨ metei chëi vae,

jare ngaraa añemi chugüi.

26Jaema mbae pɨ̈chɨi vae aasa jae jeko pegua yave,

opaete jókuae oikuaa vae reta oyeanduta chugüi.

Yerure

27¡Mbae mona che anoi metei oporoäro vae cheyuru pe

jare metei sello oporomokïrii vae cherembe re,

agüɨye vaerä kuae reta chereitɨuka

jare chekü äve oiko chemokañɨtei vaerä!