1Jare jókuae pɨ̈tu Tumpa oyapo mburuvicha guasu agüɨye vaerä oke, jare jókuae ramo omondo jembiokuai mbaekuatía regua vae güeru vaerä chupe tembikuatía rɨru, opaete mbae tëta pe oasa vae oï pɨpe vae, jae ojäauka vaerä iyeupe.
2Jare joko pe oväe chupe miari kërai Mardoqueo oecha mókoi poroäro vae reta juvicha reta oyemongeta mburuvicha guasu Artajerjes oyuka vaerä tëi vae.
3Jare jökorai rupive mburuvicha guasu oparandu:
—¿Mbae pe pa ko jókuae yamboekovia ma Mardoqueo pe yamboeteuka vaerä mo?
—Mbaetɨ etei ko mbae —jei chupe jembiokuai reta.
4Jaema jökorai mburuvaicha guasu oparandu ramboeve oï mbaembae ko Mardoqueo oyapo chupe vae re, Amán oike ou mburuvicha joka pe.
—¿Kia pa ko aipo oiko oka rupi vae? —jei oparandu mburuvicha guasu.
Jökorai rupive Amán oike ou oiporu vaerä Mardoqueo oyeyuvɨ vaerä jae oime yeyuvika oyapouka chupe vae pe.
5—Amán ko —jei chupe jembiokuai reta.
—¡Pembou toike! —jei güirave mburuvicha guasu.
6Jaema oparandu chupe:
—¿Mbae pa chepuereta ayapo kuimbae aipota amboeteuka vae pe?
Jare Amán jei iyeupe aeño: “¿Kia ye patu omboeteukata mburuvicha guasu che ñotai ko?”
7Jare jei chupe:
—Jókuae kuimbae peguarä
8mburuvicha guasu jembiokuai reta ko güeruta chupe temimonde lino pegua vae cheruvicha omonde vae, jare metei kavayu cheruvicha ipoa.
9Jaema jókuae temimonde jare kavayu oñeñonota ko metei mburuvicha guasu ivɨaka omboete yae vae ipo pe, jae omboyemonde vaerä jókuae kuimbae mburuvicha guasu oɨau güɨnoi vae jare jae güɨroataata vaerä tëta joka rupi, körai jei reve: “¡Körai oyeapo kuimbae mburuvicha guasu oipota omboeteuka vae!”
10Jaema jayave mburuvicha guasu jei Amán pe:
—Jókuae rere rami etei, jökoraita reyapo Mardoqueo pe, jae ko judío cheroka rupi oyeokuai vae. Agüɨye eyapombae opaete jókuae rere rami vae.
11Jare Amán oipɨɨ temimonde reta jare kavayu, jaema omboyemonde Mardoqueo, joko güi ombopo kavayu re jare opoko güɨroata tëta joka rupi, osapúkai reve körai: “¡Körai oyeapo kuimbae mburuvicha guasu oipota omboeteuka vae!”
12Jaema Mardoqueo ou ye mburuvicha joka pe, jare Amán janiño ojo jëta kotɨ, ipɨatɨtɨ jare iñäka oitɨ reve ojo.
13Joko pe opa imiari jembireko pe jare ivɨaka reta pe mbae ko oasa vae re, jare jókuae reta jei chupe:
—Jókuae Mardoqueo judío ko yave, jaema ko remboɨpɨ remokañɨ ndeporookuai mburuvicha guasu jóvai, jare jaema ko rekañɨtei ete kavita. Ngaraa ma ndepuere remoamiri, echa Tumpa oikove vae ko oï jókuae ndive.
14Ndei opa jökorai jei mbove, yogüeru ma oike mburuvicha guasu jembiokuai reta, güɨraja vaerä Amán aramoete pegua Ester arete oyapo oï vae pe.
Who We AreWhat We EelieveWhat We Do
2025 by iamachristian.org,Inc All rights reserved.
