PROVERBIOS 6 - Guarani Bible with DC

Yeandu katu agüɨye vaerä oime mbia

1Cheraɨ, ndevɨa-ïru remborɨ ipía vaerä yave,

ani reikuaambae re reñemoë ipía vaerä yave,

2nde aeño ko reñeapɨti neñee pe,

reyepɨɨ ko neñee reta pe aeño.

3Cheraɨ, eyeyora,

echa rea ko ïru vae ipo pe;

eyapo kuae: Eñemomichi jare emoambeko ndevɨa-ïru ipía re.

4Agüɨye ndepɨagüiveño eï,

agüɨye kërai ave yepe eputuu;

5etekuarai, guasu otekuarai omaepïaro vae güi rami;

ani güɨra ñuai pe oa vae ojoyepe vae rami.

Yemboarakuaa iyakɨ vae reta peguarä

6Iyakɨ vae, emae tasɨ reta re, emae iparavɨkɨ re jare ndearakuaa ndeyeupe:

7Jae reta mbaetɨ tëi itenondegua,

mbaetɨ vi juvicha guasu, jare mbaetɨ vi iyokuaía,

8ërei oeka jembiurä kuaraɨ guasu pe,

omboatɨ, oñovatu jembiurä mbaagüɨye iara pe.

9Iyakɨ vae, ¡agüɨye mo eke mbatee!

¡Agüɨye mo eyapakua reteiño!

10Echa reke ramboeve,

jare reï kavi kaviño reke kavi vaerä ramboeve,

11jökorai mboriau oväeta ndeve oguataiño vae rami,

jare mbaravete outa ndeve kuimbae oporepeña rami.Jeko kavimbae vae reta regua

12Jeko kavimbae, jeko oikomegua vae

jae ko añetembae re imiari avei vae;

13jesäɨ rupi, ipɨ rupi,

ani ipoäka rupi mbae jei vae;

14ipɨa ikavimbae kotɨño,

oyemongeta oyapo avei vaerä ikavimbaeño

jare oporomoñorarouka.

15Jáeramo, güɨramoi peguaño outa chupe mbaesusere;

güɨramoi peguaño oiporara yaeta, mbaetɨta ma moa chupeguarä.

YandeYa güɨröɨro vae regua

16Oime ova mbaembae yandeYa güɨröɨro vae,

jare chiúa pɨ̈chɨi yae ete jesa róvai; jae ko:

17Oyemboete yae iyé vae,

apu omomora vae, jekombae oyukaiño vae,

18ipɨa mbaembae

ikavimbae reño vae,

ikavimbae omomora yae oyapo vae,

19iyapu reve omboeko japicha vae,

oporomoñorarouka oyoupii vae.

Menda re oyuvanga vae isusere

20Cheraɨ, eñovatu nderu iporookuai reta,

agüɨye eeya ndesɨ iporomboarakuaa reta.

21Ereko avei ndepɨa pe, ereko ndeayu re mboɨ rami;

22ndereroatata reguata reiko yave,

ndeangarekota reke reï yave,

nemomiarita resareko ye yave.

23Echa mborookuai reta jare mboromboe reta tembipe rami ko,

yemboarakuaa reta tape tekove pegua ko.

24Ndeangarekota kuña jeko kavimbae güi,

jare iyaguasa pota vae iñee mbokere güi.

25Agüɨye ipöra güiño eipota emae jese;

¡agüɨye tandembotavɨ jesa omopöra vae rupi!

26Echa kuña iyaguasa pota vae ko, kuimbae güi oekɨ mbae vaeräño;

menda re oyuvanga vae ko oipɨɨ kuimbae jekove etei.

27¿Ipuere ra kuimbae oñono jäpapau pe tata,

okaimbae reve jemimonde?

28¿Ipuere ra kuimbae oguata tätapɨi iárambo rupi

okaimbae reve ipɨ reta?

29Jökorai ko japicha jembireko re opoko vae;

ngaraa opɨta jökoraiño oiporarambae reve jeko re.

30¿Mbaetɨ ra oñereröɨro imonda vae,

yepe tëi omaeñomi yɨmbɨaɨ jeko pegua?

31Ërei oyepokou ko yave,

omboekoviata opaete jókuae oñomigüe,

jare opaeteita omee jo pe mbaembae güɨnoigüe ave.

32¡Menda re oyuvanga vae mbaetɨ ko iyarakuaa!

¡Jökorai oiko vae, jae aeño ko oñemokañɨtei!

33Oiporarata jare oikota ñemomarai rupi,

ngaraai oyemboai chugüi jókuae ñemomarai.

34Echa kuimbae jägüɨro vae iyarasɨ yae ko,

ngaraa iñɨ̈ro iyepɨ iara oväe yave;

35ngaraa etei oipota mbae nunga mbaemboepɨ ave,

ngaraa etei vi oipota iñɨ̈ro, yepe tëi jeta jepɨ chupe.