ESTER (gr) 1 - Guarani Bible with DC

Mardoqueo ipaɨu

1aAra tenondegua vae Nisán iyasɨ re mókoi año ma Artajerjes oï mburuvicha guasurä yave, Mardoqueo opaɨu. Mardoqueo, Jair taɨ jae ko Simí jare Cis iñemuña jare jae ko Benjamín Judáɨgua ma,

1bjae ko metei judío Susa tëta pe oiko vae. Jae ko metei kuimbae tuichagüe vae mburuvicha guasu iporookuaía pe oyeokuai vae.

1cJae ko metei tembipɨɨ mburuvicha guasu Nabucodonosor Babilonia pegua güɨraja Jerusalén güi, Jeconías ndive vae, jae ko mburuvicha guasu Judá pegua.

1dJae ipaɨu körai jei: Oendu sapúkai reta, jäsémbai vae, ararɨapu, ɨvɨkana jare jeta mbae jaekavimbae vae ɨvɨ pe.

1eOecha vi mókoi dragón reta, oñoepeña yogüeru jaema opoko oyoe vaerä vae, jare yavaete ye ipüae yogüeru.

1fJare jókuae jɨapu vae oyeendu rupi, opaete tëta guasu reta opa oyeapo kavi opoko vaerä jupi vae reta jëta re.

1gJare jayave ou tëta ara oyembopɨtumimbi, oï mbɨatɨtɨ jare kɨɨye tuichagüe vae, tembiporara reta jare opaete mbae ikavimbae vae oï opaete ɨvɨ rupi.

1hJare opaete jupi vae reta tëta ipo ñogüɨnoi vae ou okɨɨye oendu yave jókuae mbae ikavimbae ou ikotɨ reta, jare opa oñeñono kavi reta omano vaerä; ërei osapúkai reta oiporu yemborɨ Tumpa kotɨ,

1ijare isapúkai reta rupi ou oyeapo chupe reta metei ɨesaɨ michi raɨ vae, jare jókuae oyeapo chupe reta meteɨ ɨ tuicha yae vaerä.

1jJare oë ou kuaraɨ jaema oï tembipe tätagüe vae. Jare jókuae opa ma iñamɨri ñogüɨnoi vae reta opa opüa jare opoko opa jou opaete jókuae yemboete pe ñogüɨnoi vae reta.

1kOpa jökorai opaɨu yave jare oecha ma jókuae Tumpa oipota oyapo vae yave, Mardoqueo opa; ërei oime imaendúa oï jókuae ipaɨu re jare, ndeimbove güive pɨ̈tu regua, oipotagüe mbae rupi, oeka tëi oikuaa vaerä ipaɨu re.

Mardoqueo oendu metei yemomburu

1lMardoqueo oiko mburuvicha iporookuai pe Gabata jare Tarra ndive, jókuae mókoi reta jae ko mburuvicha guasu güɨrovia katu vae reta jare jae reta ko jae jo järoa,

1mjaema jae reta oendu imiari. Oipota tëi oendu kavi ete mbae re ko imiari reta vae, jare oendu kavi ma mburuvicha guasu Artajerjes re ko oyemongeta reta ñogüɨnoi oyuka vaerä yave, jaemai jae ojo imiari mburuvicha guasu pe.

1nJare mburuvicha guasu oenɨi oparandu jókuae mókoi kuimbae güɨrovia katu vae reta pe, jare jae reta oyemombeu jaema jökorai opa oyeyukauka reta.

1oJaema mburuvicha guasu oikuatiauka jókuae jökorai oasa vae, agüɨye vaerä iñakañɨ chugüi vae; jare Mardoqueo oikuatía vi jókuae regua.

1pJókuae jaɨkue rupi mburuvicha guasu omboembiapo Mardoqueo jókuae iporookuaía pe, jare jae ikavi vae oyapo chupe vae rupi ombopota vi jeta mbaembae pe.

1qËrei Amán, Amedata taɨ jae ko Bugai iñemuña ma, jae ko täta mburuvicha guasu omboeteuka vae, jae opoko ma oeka kërai Mardoqueo omoipɨ̈chɨi vaerä opaete jëta ipo reta reve, jókuae mókoi kuimbae reta mburuvicha guasu güɨrovia katu vae mbae oasa vae jeko pegua.

Mburuvicha guasu Artajerjes iyarete

[

1rKuae ïru miari oiko Artajerjes iporookuai güɨreko ciento veintisiete provincia reta rupi yave, jae ko ojo India güive Etiopía pe iyapɨ,

2jare güɨnoi ko iporookuaía iyɨpɨ Susa tëta pe.

3Mboapɨa año ma oiko mburuvichara yave, mburuvicha guasu Artajerjes oyapo metei arete opaete ivɨaka reta peguarä, jae ko kuimbae reta ïru vae tëta pegua reta pe, kuimbae jërakua yae vae reta Persia jare Media pegua reta jare provincia rupigua mburuvicha reta pe.

4Año mbɨte etei ko oechauka oiko chupe reta imbaeyekou jare iyarete oasaete ikavi oyapo chupe reta vae.

5Jare opa rupive oyapo jókuae arete, mburuvicha guasu oyapoye ïru arete opaete kuimbae reta tëta mbuaeɨgua reta jókuae tëta pe ñogüɨnoi vae peguarä, ova ara ko oyapo ye jókuae jare oyapo ko iporookuaía jöka pe.

6Jókuae joka imopöra reta ko cortina lino pegua tïi vae pe jare mandɨyu pegua vae, jare oñemoïcha ko oï tïi vae pe jare morao vae pe jare osagüɨu ñogüɨnoi oro pegua vae jare korepoti pegua vae oñeñono oï vae re jare jókuae okɨta reta ko jae mármol jare ita pegua vae. Jare oñono reta vi tenda oro jare korepoti pegua vae, jare ɨvɨ iárambo oñono reta ko ita esmeralda pegua vae jare perla reta mármol ndive vae. Jare oï vi tenda iarambogua reta jësaka vae iyɨ́vɨri mbaepotɨ iä pe oñemopöra vae.

7Oime vi oï kopa reta oro jare korepoti pegua vae, jare oï metei vaso rubí pegua vae jae ko noventa millones siclo jepɨ vae. Jare oï vino, jeta vae jare ikavigüe vae, jae ko mburuvicha guasu jou vae etei jókuae.

8Jare mbaetɨ vi oñeñono mbovɨ etei ko oyeporuta jokuaeɨgua reta vae. Ërei ngatu, mburuvicha guasu omee mborookuai jembiokuai reta pe agüɨye vaerä kia oyaporai okau vaerä, jaeño ma oyapo retata mburuvicha guasu jeigüe vae jare mboupa reta jeigüe vae.

9Jare mburuvicha kuña Astin, jaeramiño vi, oyapo vi metei arete mboupa kuimbae jembireko reta peguarä mburuvicha guasu Artajerjes iporookuaía pe.

10Chiu ara ma oyeapo oï jókuae arete yave, mburuvicha guasu täta oyerovia oï, jaema jei Amán pe, Bazán pe, Tarra pe, Boraze pe, Zatolta pe, Abataza jare Taraba pe, jae ko chiu kuimbae güɨrovia katu vae reta ñogüɨnoi iporookuai pe vae,

11jae ko jae reta güɨrajata chupe mburuvicha kuña Astin, oyeechauka vaerä iñäka regua ikavigüe vae ndive jare mburuvicha reta opaete tëta ipo reta reve ipɨakañɨ vaerä omae jae ipöra vae re, echa añetete jókuae mburuvicha kuña oasa ete ikavi.

12Ërei jae mbaetɨ oipota ojo jókuae kuimbae mburuvicha guasu güɨrovia katu vae reta jupíe. Jaema jókuae güɨ mburuvicha guasu täta ipɨatɨtɨ opɨta, jare iyarasɨ güi

13jei ivɨaka reta pe:

—Peecha ma mbae jei Astin vae. Añave pe peecha jókuae re jare pe pere mbae peyapota körai ñaï vae pe.

14Jaema jayave ou ikotɨ reta Arceseo, Sarsateo jare Malesear, jae ko tuichagüe vae reta Persia jare Media pegua vae mburuvicha guasu ivɨaka reta jare mburuvicha tuichagüe vae reta ko opaete tëta pegua,

15jare jae reta jei chupe oyeapota ko mbae mburuvicha kuña Astin pe mborookuai reta jei oï rami vae, mbaetɨ ramo oyapo mburuvicha guasu omondo jeigüe chupe kuimbae güɨrovia katu vae reta ndive vae.

16Jaema Muqueo jei ma mburuvicha guasu pe jare ïru vae mburuvicha reta pe:

—Mburuvicha kuña Astin mbaetɨ ko mburuvicha guasuño omomarai, opaete kuae pe tëta ruvicha reta oï vae pe ko oyapo

17(jare mburuvicha guasu jei yeyé mburuvicha kuña jeigüe vae jare mbae etei ko jei mburuvicha guasu pe vae). Jaema jae jökorai ko jei mburuvicha guasu Artajerjes pe vae güi,

18añave voi ko opata oikuaa mburuvicha Persiaɨgua jare Mediaɨgua reta jembireko reta, kuae mbae ko jei mburuvicha guasu pe vae, jare jókuae güi ngaraa ma ime omboete reta.

19Jayave, mburuvicha guasu pe ipöra ko yave, toñemoërakua kuae mborookuai, jare toiko vi mborookuai reta ipɨte pe Persiaɨgua reta peguarä jare Mediaɨgua reta peguarä, echa mbaetɨ yé ko mbae oyeapo vaerä: “Mburuvicha kuña mbaetɨ yeta oyekuaa mburuvicha guasu jóvai.” Jare mburuvicha guasu tomee ñee ïru vae kuña pe oiko vaerä mburuvicha kuñarä.

20Jare jókuae mborookuai toñemoërakua opaete vae pe, jare jökorai opaete kuña reta omboete vaerä ime reta, yepe paravete vae ani ramo oikokatu vae.

21Jare jókuae Muqueo iyemongeta ipöra mburuvicha guasu pe jare opaete mburuvicha iyɨvɨrigua reta pe, jare jaemai mburuvicha guasu jökorai oyapo.

22Omondo tembikuatía opaete tëta ñogüɨnoi iɨvɨ japɨpe rupi vae rupi, jare jókuae rupigua reta iñee ñee pe ae omondo chupe, jare jókuae pe jei opaete kuña ime reta oyemboeteuka vaerä jëta rupi.