2 CORINTIOS 2 - Guarani Bible with DC

1Jáeramo che añeñono agüɨye vaerä aja pombopɨatɨtɨ.

2Echa che pombopɨatɨtɨ yave, ¿kia ra chemboyeroviata? Jaeño pe, pombopɨatɨtɨ vae reta.

3Jáeramo aikuatía peve, agüɨye vaerä aja pépɨri yave chemboyerovia vaerägüe chembopɨatɨtɨ. Echa che arovia che ayerovia yave, pe reta vi peyerovia ko.

4Echa aikuatía peve chepɨatɨtɨ yae jare cheresaɨ reve. Mbaetɨ aikuatía peve pombopɨatɨtɨ vaerä, jaeño peikuaa vaerä kërai tuicha yae ko cheporoaɨu pekotɨ vae.

Pablo iñɨ̈ro ikavimbae vae oyapo chupe vae pe

5Jókuae iyoa vae, mbaetɨ cheño chembopɨatɨtɨ, opaete pe reta vi ko pembopɨatɨtɨ.

6Ikaviño ma ko jeko re peiporarauka chupe.

7Jáeramo ikavi ko peɨ̈ro jare pembopɨakatu. Agüɨye vaerä mo ipɨatɨtɨ yae oiko.

8Jáeramo che pomoñera peechauka vaerä peporoaɨu chupe kërai jekuaeño ko peaɨu vae.

9Echa kuae jeko pegua aikuatía peve, aikuaa vaerä peyapota ra opaete che jae peve peyapo vaerä vae.

10Pe reta peɨ̈ro yave kia pe mbae re, che vi cheɨ̈ro chupe. Echa cheɨ̈ro chupe, oime mbae re cheɨ̈ro vaerä yave, cheɨ̈ro ko chupe peré Cristo jóvai,

11agüɨye vaerä Satanás ñanemoamɨri, echa yaikuaa kavi ko jae iñuai.

Pablo oyemoambeko Troas pe vae

12Jare che aja aväe yave Troas pe amoërakua vaerä ñee ikavi vae Cristo regua, yepe tëi oyepea cheve tape aparavɨkɨ vaerä chupe,

13ërei chepɨakatúä etei aväeä yanderɨvɨ Tito joko pe ramo. Jáeramo che ayupavo jare aja ye chugüi reta MacedoniaHch 20.1. kotɨ.

Ñaporomoamɨri Cristo rupi

14Yasoropai Tumpa pe, echa jae jekuaeño oremborɨ roporomoamɨri vaerä Cristo Jesús rupi, jare omee oreve ñee ikavi vae roikuaauka vaerä opaete kerupi, mbae ikäti kavi vae otimbo kavi opaete rupi rami.

15Echa ore reta Cristo re, mbae ikäti kavi vae rami ko Tumpa pe. Jökoraiño vi oporogüɨrovia vae reta pe jare oporogüɨroviambae vae reta ipɨte pe.

16Oporogüɨroviambae vae reta pe kuae mano pegua ko, ërei oporogüɨrovia vae reta pe tekove pegua ko. Jare ¿kia pa ipuere oyapo kuae?

17Ore reta mbaetɨ Tumpa iñee re romongana, jeta ïru vae reta oyapo rami. Romoërakua ko jupi rupi Tumpa jóvai, jae oreokuai rami, Cristo re roï ramo.