JUECES 9 - Guarani Bible with DC

Abimelec oï mburuvicharä

1Jerobaal taɨ Abimelec, ojo Siquem pe imiari vaerä ichɨ jaɨe reta ndive, jei reve:

2—Pomoñera pemiari vaerä opaete Siquem pegua reta ndive, ¿jaekavi ra ñogüɨnoi peruvicharä setenta vae Jerobaal taɨ reta, ani metei kuimbaeño? Pemaendúa che jae ko perëtara ete metei tugüɨ rupi vae.

3Jare ichɨ jaɨe reta omombeu jókuae ñee opaete kuimbae Siquem pegua reta pe, jare opaete vae ipɨa oñono Abimelec kotɨ, echa jei reta: “Ñanerëtara ko.”

4Jare Baal-berit itupao güi oekɨ reta setenta reare korepoti pegua omee Abimelec pe. Jókuae korepoti pe Abimelec omboepɨ kuimbae reta yogüɨrekoiño vae pe yogüɨraja vaerä jupíe

5jare yogüɨraja reta jupíe Ofra pe, tu Jerobaal oikosea pe, jare opa oyuka tɨkeɨ setenta vae reta meteia ita reño; ërei Jotam oñemi jare oasayepe, jae ko Jerobaal taɨ taɨkuegua ete.

6Jayave opaete Siquem pegua reta oyemboatɨ Milo pegua reta ndive ɨvɨra encina jare ita oïa pe, jare omboguapɨ reta Abimelec mburuvicha guasurä.

7Jotam oikuaa yave oyeupi ɨvɨtɨ Gerizim re, jare joko güi täta osapúkai opaete vae oendu vaerä:

“¡Peyeapɨsaka cheré opaete kuimbae Siquem pegua reta! ¡Jare jökorai Tumpa toyeapɨsaka peré!

8Metei ara ɨvɨra reta oyomboatɨ oiparavo juvicha guasurä, jare jei reta olivo pe:

—Eiko oreruvicha guasurä.

9Ërei olivo jei:

—¿Aeyata ra cheasaite Tumpa oyemboete pɨpe vae jare kuimbae reta vae, aja vaerä aiko ɨvɨra reta juvicha guasurä?

10Jayave ɨvɨra reta jei ɨva pe:

—Eiko oreruvicha guasurä.

11Ërei ɨva jei:

—¿Aeyata ra cheia kavi jare jëe ngatu vae, aja vaerä aiko ɨvɨra reta juvicha guasurä?

12Jayave ɨvɨra reta jei uva pe:

—Eiko oreruvicha guasurä.

13Ërei uva jei chupe reta:

—¿Aeyata ra vino omboyerovia Tumpa jare kuimbae reta vae, aja vaerä aiko ɨvɨra reta juvicha guasurä?

14Jare mbaetɨ ye ma yave ɨvɨra reta jei yuu pe:

—Eiko oreruvicha guasurä.

15Jare yuu jei:

—Añetete ko peipota aiko peruvicha guasurä yave, opaete vae peiko jaegüe rupi, jare mbaetɨ yave oëta tata chegüi opa vaerä oapɨ ɨ̈vɨrare reta ɨvategüe Líbano pegua.

16Jare añave che aparandu peve: ¿Pemboete jare pepɨa jupi reve kavi pa ko pemboguapɨ Abimelec mburuvicha guasurä? ¿Jökorai pa Jerobaal jare jo pegua reta re pemae, jae peparareko rami?

17Echa cheru oñemoë perekovia pe jare oñeraro, jökorai omee jekove peyora vaerä Madián iñemuña reta ipo güi;

18ërei ngatu pe reta peñemopüa cheru jo pegua reta re, opa peyuka taɨ reta setenta vae meteia ita reño; jare perëtara Abimelec pemboguapɨ mburuvicha guasurä Siquem pegua reta re.

19Ërei che jae peve añave: Pe reta peyapo kavi yave jupi vae jare pemboete kavi Jerobaal, jare jo pegua reta, peiko kavita Abimelec ndive, jare jae pe ndive;

20ërei mbaetɨ yave, ¡Abimelec güi toë peve tata opa vaerä Siquem pegua reta jare Milo pegua reta omokañɨtei; jare Siquem güi jare Milo güi toë tata opa vaerä omokañɨtei Abimelec!”

21Jotam opa güire jei kuae ñee, otekuarai jare ojo oiko Beer pe, echa okɨɨye tɨkeɨ Abimelec güi.

22Abimelec oiko mburuvicharä Israel iñemuña reta re mboapɨ año rupi yave,

23Tumpa ombou yemongeta ikavimbae Abimelec pe jare Siquem pegua kuimbae reta pe, jare Siquem pegua reta opüa Abimelec re,

24jökorai Abimelec pe jekovia vaerä setenta Jerobaal taɨ reta opa oyuka vae, jare vi Siquem pegua reta oporomborɨ katu vae pe.

25Jare Siquem pegua reta omondo oñemi okätɨro ñogüɨnoi ɨvɨtɨ re jare kia oasa jokoropi vae güi opɨ̈ro reta imbaembae. Jare kuae oikuaa Abimelec.

26Jare Gaal, Ebed taɨ oasa jëtara reta ndive Siquem rupi, jare Siquem pegua reta güɨrovia katu jese reta,

27kuae reta ñogüɨnoe oipoo uva ko pe jare oyapo reta vino, oyapo reta vi arete tuicha vae, oike okaru jare okau reta itumpa-raanga reta jo pe, jei reve ñee kavimbae Abimelec kotɨ.

28Jare Gaal, Ebed taɨ jei: “¿Mbae mbatee pa Abimelec, Jerobaal taɨñoä pa ko, Zebul jaeä pa imborɨa? ¿Kia pa Siquem oiko vaerä Abimelec jeia re? Yayeokuai Hamor pe, jae ko kuae tëta omboɨpɨ vae, jare agüɨye yaiko Abimelec, Jerobaal taɨ jeia re.

29¡Che peruvicharä aiko yave mona, aramoete ko anoeta amombo Abimelec!” Jare jei ye: “¡Abimelec, ekua emboatɨ ndesundaro reta jare eyu ñañoraro!”

30Zebul, tëta guasu juvicha oikuaa yave jókuae Gaal, Ebed taɨ jei vae, iyarasɨ yae

31jare omondo vɨari kuae ñee Abimelec pe tëta Aruma pe: “Gaal, Ebed taɨ yogüeru jëtara reta ndive Siquem pe, jare omboarasɨuka ñogüɨnoi ndekotɨ tëta pegua reta.

32Jáeramo ekua pɨ̈tu yave ndesundaro reta ndive peñemi peï.

33Jare köe yave pepüa tëta re, jare Gaal oë tëta pegua reta ndive oñoraro pe ndive yave, eyapo chupe rerovia jae kavita vae.”

34Jökorai Abimelec jare opaete isundaro reta ñogüɨnoe pɨ̈tu yave jare oñemi kavi okätɨro reta tëta Siquem ikupe rupi, irundɨ yemboyao pe.

35Jare Gaal, Ebed taɨ oë yave tëta guasu jöke pe, Abimelec jare isundaro reta ñogüɨnoe jókuae oñemi okätɨro ñogüɨnoia güi.

36Gaal oecha yave, jei Zebul pe:

—¡Mase, ɨvɨtɨ güi ogüeyɨ yogüeru sundaro!

Zebul jei:

—Mbaetɨ ko, ɨvɨtɨ iküaraɨa ko sundaroecha ndeve.

37Ërei Gaal jekuae jei:

—¡Ɨvɨtɨ rupi joko vi ogüeyɨ yogüeru sundaro! ¡Jare ïru yemboyao joko yogüeru maratuta vae imombeúa reta ɨvɨra encina kotɨ tape ojo vae rupi!

38Zebul jei chupe:

—¡Emoë neñee añave, reyemboete reve mbae rerese vae! ¡Nde rerese, Abimelec mbaeä etei ko, yaiko vaerä jëia re! Joko ñogüɨnoi sundaro reta reroviambae vae. ¡Ekua, eñeraro añave jae reta ndive!

39Jare Gaal oë Siquem pegua reta jenonde, jare oñoraro Abimelec ndive.

40Ërei Abimelec omoña, jare Gaal otekuarai chugüi. Jeta yae omano vae, ojoi oväe tëta guasu jöke pe.

41Jare Abimelec opɨta Aruma pe; jare Zebul opa omoë omombo Gaal jëtara reta ndive, agüɨye vaerä ma yogüɨreko Siquem pe.

42Pɨareve pe Siquem pegua reta ñogüɨnoe ikatu pe kaa pe. Abimelec oikuaa yave,

43mboapɨ yemboyao oyapo isundaro reta jare oñemi kavi okätɨro reta kaa pe; jare oecha reta yave Siquem pegua reta oë tëta güi oporepeña reta jese.

44Jae jare jupiegua reta oporepeña tëta guasu jöke re jare opɨ̈ro, ïru mókoi yemboyao reta oporoyuka ramboeve ikatu rupi.

45Jare Abimelec oñoraro tëta guasu pegua reta ndive opaete jókuae ara, jare opɨ̈ro, opa oyuka jókuae tëta pegua reta jare omoai yukɨ pɨpe.

46Kuae oikuaa yave o ɨvate Siquem pe ñogüɨnoi vae reta, opa oñepɨ̈ro itumpa Berit itupao pe.

47Jare Abimelec oikuaa oime ko oyemboatɨ ñogüɨnoi joko pe yave,

48ojo opaete isundaro ndive ɨvɨtɨ Salmón pe, jare metei yɨɨ pe oyasɨa ɨvɨra jäka, jare oñono iyatiɨ re, jare jei opaete isundaro reta pe oyapo reta vaerä aramoete jae oyapo rami.

49Opaete oyasɨa ɨvɨra jäka jare yogüɨraja reta Abimelec jaɨkue, yogüɨraja regua oväe reta tupao oñekësea pe, joko pe omboatɨ reta jókuae ɨvɨra jare oyatapɨ reta jese, jökorai opa oyuka o ɨvate Siquem pegua reta, oupitɨ ñogüɨnoi mil rupi kuimbae jare kuña reta.

50Jaɨkue rupi Abimelec oporepeña tëta Tebes re, opa oñova javoi opɨ̈ro.

51Jókuae tëta mbɨte pe oime metei o ɨvate, joko pe oñemi opaete jókuae tëta pegua reta, kuimbae jare kuña reta jare opaete mburuvicha reta. Oyokenda reta öke omotäta reve japɨpe kotɨ jare oyeupi reta o iárambo;

52ërei Abimelec ojo oväe jókuae öke pe yave oporepeña jese. Oyatapɨta ma jese yave,

53metei kuña oitɨ jese ita trigo oyeyoso pɨpe vae jare oyoka iñäka.

54Abimelec oenɨi aramoete imborɨa yeopiaka ovoɨ chupe vae, jare jei chupe: “Eekɨ ndekɨsepuku jare cheyuka, echa mbaetɨ aipota jei reta vae: ‘Metei kuña pe ko oyeyukauka.’ ”

55Israel iñemuña reta oecha yave Abimelec omano, opa ye yogüɨraja jëta jëta ae kotɨ.

56Jökorai Tumpa omboepɨuka Abimelec pe oporoyuka vae, echa oyapo ikavimbae tu kotɨ, opa oyuka setenta tɨkeɨ reta vae rupi.

57Jare Tumpa omee vi Siquem pegua reta omboepɨ vaerä iporoyuka. Jökorai Jotam iyepopeyu ou oyembopo, jae ko Jerobaal taɨ.