DANIEL 2 - Guarani Bible with DC

Daniel oikuaa mburuvicha guasu Nabucodonosor ipaɨu regua

1Nabucodonosor mokoía año ma oiko mburuvicha guasurä yave opaɨu, jókuae ombopɨa jopa jare ipuereä oke.

2Jayave mburuvicha guasu omondo oenɨiuka ichoropa vae reta, yasɨ pɨau re jare yasɨtata re güɨrovia vae reta jare mbae oasata vae oikuaa vae reta, jae ko Caldeaɨgua iyarakuaa vae reta, oikuaauka vaerä chupe ipaɨu regua. Jayave yogüeru mburuvicha guasu jóvai.

3Jare mburuvicha guasu jei chupe reta:

—Che apaɨu, jare chepɨaä yae, aipota tëi aikuaa jesegua.

4Jayave Caldeaɨgua iyarakuaa vae reta omomiari mburuvicha guasu ñee arameo pe:

—¡Eikove katu avei oreruvicha guasu! Emombeu ndepaɨu oreve, jare roikuaaukata ndeve mbae ko oipota jei vae.

5Mburuvicha guasu jei Caldeaɨgua iyarakuaa vae reta pe:

—Pemombeu chepaɨu cheve; ërei mbaetɨ peikuaauka cheve chepaɨu jare mbae ko oipota jei vae yave, opata peyembojaɨ jaɨuka, jare pero opata opɨta ɨtɨapɨrä.

6Ërei peikuaauka cheve chepaɨu jare mbae ko oipota jei vae yave, peipɨɨta chegüi mbota reta jare jeta mbaembae jare mboromboete tuicha vae. Jayave peikuaauka cheve chepaɨu jare mbae ko oipota jei vae.

7Jare jei reta ye chupe mokoía ma:

—Oreruvicha guasu, emombeu ndepaɨu ore nderembiokuai reta pe, jare roikuaaukata ndeve mbae ko oipota jei vae.

8Jare mburuvicha guasu jei ye chupe reta:

—Añetete che aikuaa ko pe reta peyapo kuae, ara pembopuku vaeräño; echa peecha peï cheakañɨ ko chugüi vae.

9Mbaetɨ yave peikuaauka cheve chepaɨu, oime meteiño yemongeta oï pekotɨ. Echa peñomomiari päve peï peapu vaerä jare pere vaerä cheve jupimbae vae, pemboasauka vaerä ara reta. Pemombeu cheve chepaɨu, jökorai aikuaata pepuere ko peikuaauka cheve vae.

10Caldeaɨgua iyarakuaa vae reta jei mburuvicha guasu pe:

—Mbaetɨ ko metei ave kuimbae kuae ɨvɨ pe ipuereta omombeu nde mburuvicha guasu reipota reikuaa vae; jare mbaetɨi vi metei mburuvicha guasu ave, ani metei mburuvicha ani kia nunga iya ave oparandu kuae nunga re metei ichoropa vae pe, yasɨtata re oyemboe vae pe, Caldeaɨgua iyarakuaa vae reta pe.

11Echa kuae nde mburuvicha guasu reparandu vae yavai ko, jare ngaraa kia ipuere omombeu ndeve; jaeño tumpa reta ipuereta; ¡ërei jae reta mbaetɨ ko yogüɨreko kuimbae reta ipɨte rupi!

12Jáeramo mburuvicha guasu iyarasɨ jare pochɨ yae reve omee mborookuai oyukauka vaerä opaete Babilonia pegua yarakuaa katu vae reta.

13Jare mborookuai oñemee vae oñemoërakua, oyeyukauka vaerä opaete yarakuaa katu vae reta; jare oeka reta Daniel jare iñeïru reta

21Jae oipoepɨ ara reta jare año reta;

jae oekɨ jare jae oñono mburuvicha guasu reta,

arakuaa omee yarakuaa vae reta pe

arakuaa katu omee yarakuaa katu vae reta pe.

22Jae oechauka mbae yavai yae vae jare oyekuaambae vae;

jae oikuaa mbae oime oï pɨtumimbi pe vae,

echa jae ko oikuaa opaete mbaembae.

23Ndeve, cheñemuñagüe reta iTumpa,

amee yasoropai ndeve jare romboete,

echa chemboarakuaa jare chemomɨ̈rata;

añave reikuaauka cheve roeka ndeve vae,

reikuaauka cheve mburuvicha guasu omoambeko yae güɨnoi vae.”

24Kuae jaɨkue rupi Daniel ojo Arioc pɨri, jae ko mburuvicha guasu oñono opa vaerä oyuka Babilonia pegua yarakuaa katu vae reta vae, jare jei chupe körai:

—Agüɨye eyuka Babilonia pegua yarakuaa katu vae reta; chereraja mburuvicha guasu jóvai, jare che aikuaaukata chupe mbae ko oipota jei ipaɨu vae.

25Jayave Arioc iyandeko voi güɨraja Daniel mburuvicha guasu jóvai, jare jei chupe körai:

—Aväe metei kuimbae Judá güi oyererugüe reta ipɨte pe, jae oikuaaukata ndeve cheruvicha guasu, mbae ko oipota jei ndepaɨu vae.

26Jare mburuvicha guasu jei Daniel pe, jókuae Beltsasar pe ombojee vae pe:

—¿Ndepuere pa nde reikuaauka cheve chepaɨu, jare mbae ko oipota jei vae?

27Daniel jei mburuvicha guasu jóvai:

—Kuae yaikuaambae vae nde mburuvicha guasu reipota reikuaa vae, ngaraa ipuere oikuaauka ndeve yarakuaa katu vae, yasɨtata re oyemboe vae, ichoropa vae ani maratuta vae imombeúa reta ave.

28Ërei oime metei Tumpa ara pe, jae oechauka yaikuaambae vae, jae ko oikuaauka nde mburuvicha guasu Nabucodonosor pe mbaembae ko oasata kuri vae. Mase, kuae ko jae ndepaɨu, nderupa pe reï yave reecha vae reta.

29Nde cheruvicha guasu, nderupa pe reï yave, ou ndeve jeta yemongeta reta reikuaa vaerä maratuta ra ko kuri vae; jare yaikuaambae vae oikuaa vae oikuaauka ndeve oikota kuri vae.

30Jare Tumpa oechauka cheve kuae yaikuaambae vae, mbaetɨ ko chearakuaa yae ïru reta güi jeko pegua; jaeño ko nde mburuvicha guasu pe oikuaauka vaerä mbae ko oipota jei ndepaɨu vae, reikuaa vaerä reyemongeta yae jese vae.

31Mburuvicha guasu, nde reecha metei kuimbae iä rami vae, tuicha yae vae. Tuicha yae jare jembipeasɨ yae vae, nderóvai oyemboɨ oï jare yavaetegüe.

32Kuae kuimbae iä rami vae iñäka, oro oyeambae vae pegua; ipɨtía jare iyɨva, korepoti pegua; jɨe jare iu reta, jiero iyu vae pegua;

33itɨmaka reta, jiero pegua; ipɨ reta, jiero oyea ñaeu oyɨgüe ndive vae pegua.

34Jare remae reï ramboeve oa ɨvate kotɨ güi metei ita, mbaetɨ kia oyoka reve, jare ou oa jókuae kuimbae iä rami vae ipɨ jiero oyea ñaeu oyɨgüe ndive vae pegua re, jare opa omonguruvi.

35Jayave opa vi ikuruvi jiero, ñaeu oyɨgüe, jiero iyu vae, korepoti jare oro, jare opa okañɨ kuaraɨ guasu pe trigo oyembopiriri vae javiyugüe ave opaetei ɨvɨtu güɨroveve rami, mbaetɨ etei mbae ave opɨta chugüi rami. Ërei jókuae ita ou oa jese vae oyeapo metei ɨvɨtɨ guasurä, opaetei omotɨnɨe ɨvɨ.

36Kuae ko jae ndepaɨu; jare mbaembae ko oipota jei vae, aikuaaukata vi ndeve mburuvicha guasu.

37Mburuvicha guasu, nde jae ko mburuvicha guasu reta juvicha guasu; echa Tumpa ara pe oï vae ko omee ndeve mborookuaía, mbaepuere, mɨ̈rata jare ndemboetea yae vaerä.

38Jare oipota rupi oime ñogüɨnoi kuimbae reta vae, mɨmba reta ñana rupigua, güɨra reta, jae ko omee ndepo pe, jare omee ndeve opaete vae re renoi vaerä mbaepuere; nde ko jae jókuae kuimbae iä rami vae iñäka oro oyeambae vae.

39Jare nderaɨkue rupi opüata mburuvicha guasu iporookuaía mbaetɨ tuicha mbatee ndeporookuaía güi vae; jare jaɨkue rupi opüata mboapɨa mborookuaía jiero iyu vae pegua, kuae güɨnoita mbaepuere opaete ɨvɨ re.

40Jare opüata irundɨa mborookuaía täta yae jiero rami vae; jiero omonguruvi jare oyoka opaete mbaembae vae rami, omonguruvita jare oyokata opaete mbae.

41Jare ipɨ reta jare ipɨ̈sa reta reecha vae, jiero oyea ñaeu oyɨgüe ndive oñaeu-apo vae jembiapo rami vae; jae ko, metei mborookuaía oyemboyaota vae; ërei oimeta jese täta ave jiero rami, jókuae jiero reecha oyea ñaeu oyɨgüe ndive rami vae.

42Jare ipɨ̈sa reta oyea jiero jare ñaeu oyɨgüe ndive ramo, jókuae mborookuaía oimeta täta vae, ërei oimeta vi mbaetɨ etei täta vae.

43Jókuae jiero reecha oyea ñaeu ndive rami, oimeta oyea reta ñemoïru rupi vae; ërei mbaetɨta ipuere oyea ete kavi, jiero mbaetɨi ipuere oyea ñaeu ndive rami.

44Jare kuae mburuvicha guasu reta iara rupi, Tumpa ara pe oï vae omopüata metei mborookuaía mbaetɨ eteita oyemboai vae, jare mbaetɨta kuae mborookuaía oyeeya ïru tëta ipo pe; omonguruvita jare omokañɨteita opaete kuae mborookuaía reta, ërei jae oikota jekuae avei,

45jókuae ɨvɨtɨ güi reecha oa metei ita vae rami, mbaetɨ kia ipo pe oyoka reve, jókuae omonguruvi jiero, jiero iyu vae, ñaeu, korepoti jare oro. Tumpa tuicha yae vae oechauka ndeve mburuvicha guasu, maratuta oasa kuri vae; kuae mbaɨu añetete ko, jare mbae oipota jei vae jupigüe ko.

46Jayave mburuvicha guasu Nabucodonosor oyetavatɨka itindɨasɨ ɨvɨ re jare oñemomichi Daniel jóvai, jare oporookuai oñemee vaerä chupe mbota jare ikäti kavi vae incienso omboete vaerä Tumpa.

47Jare mburuvicha guasu jei Daniel pe:

—Añetete yepe peTumpa güɨnoi mbaepuere tumpa reta güi, jare imbaepuere yae mburuvicha guasu reta güi, jare jae oikuaauka yaikuaa rapeä vae, echa ndepuere reikuaauka cheve kuae aikuaa rapeä vae.

48Jayave mburuvicha guasu ombotuicha Daniel, omboeteuka yae, jare omee chupe jeta mbota tuichagüe, jare oñono mburuvicharä opaete tëta reta Babilonia pegua re, jare opaete Babilonia pegua yarakuaa katu vae reta juvicha tenondegua eterä.

49Jayave Daniel oiporu mburuvicha guasu pe, omee vaerä chupe oñono vaerä Sadrac, Mesac, jare Abed-nego mburuvicharä Babilonia pe tëta reta re. Jare Daniel oiko mburuvicha guasu iporookuaía pe.