1Torombotuicha cheTumpa, cheruvicha guasu,
amboeteta nderee jekuae avei rupi.
2Ara ñavo toromboete,
amboeteta nderee jekuae avei rupi.
3CheYa, ndembaepuere yae ko,
jupi ko reyemboeteuka yae vaerä,
ndembaepuere roipapa rapeä ko.
4Nderembiapo reta, oyemboeteta jekuae avei rupi,
oñemoërakuata ndembaepuere rupi reyapo vae.
5Ndeyemboetea ipöra yae vae re,
jare mɨakañɨ tuichagüe reyapo vae re che ayemongetata.
6Kuimbae reta imiarita opaete mbaravɨkɨ tuichagüe reyapo vae re.
Che amoërakuata ndembaepuere re.
7Omoërakuata imaendúa reta reve ndepɨakavi yae vae re,
jare otairari retata nde ko jupi vae re.
8YandeYa iyeaeä vae jare iporoparareko vae ko,
jae mbaetɨ iyarasɨ raivi vae ko,
iporoparareko yae vae ko.
9Ipɨakavi ko yandeYa opaete vae pe,
iporoparareko yae opaete jembiapo reta re.
10¡CheYa Tumpa,
tandemboete opaete nderembiapo reta!
¡Tandemboete ndembae vae reta!
11Timiari reta ndeyemboetea ikavi yae ndeporookuaía pe vae re,
tomoërakua reta ndembaepuere.
12¡Toikuaauka ndembaepuere kuimbae reta pe,
jare ndeyemboetea ikavi yae ndeporookuaía pe vae re!
13Ndeporookuaía opambae ko,
ndembaepuere jekuaekuae avei vae ko.
14YandeYa omborɨ opaete ogüɨapi vae,
jare omopüa opaete oiporara vae reta.
15Opaete vae ndereño oäro,
nde remee jembiurä iara pe kavi.
16Ndepo reyora,
ndepɨa kavi reve ndeporerekua opaete oikove vae re.
17Jupi ko yandeYa opaete oyapogüe rupi,
iporoparareko opaete oyapogüe rupi.
18YandeYa köiño oï oenɨi vae güi,
opaete añetete oenɨi vae güi.
19Oipoɨu chugüi vae jemimbota ombopota,
oenduta vi isapúkai, jare güɨroasayepeta.
20YandeYa oñovatu, opaete güɨnoi mboroaɨu ikotɨ vae reta,
ërei omokañɨteita opaete iyoa vae reta.
21¡Che amboeteta yandeYa!
¡Opaete vae tomboete yandeYa jee ikɨambae,
añave güive jekuae avei rupi!
Who We AreWhat We EelieveWhat We Do
2025 by iamachristian.org,Inc All rights reserved.
