ECLESIÁSTICO 11 - Guarani Bible with DC

1Iyarakuaa vae, yepe paravete, jesɨva ɨvateta ko güɨraja

jare oguapɨta kuimbae tuichagüe reta ndive.

2Agüɨye kia emboete ikavi güi,

jare eröɨro kia pɨ̈chɨi güi.

3¡Mbaemɨmba michi vae jae ko karapúa,

ërei mbaetɨ yé mbae täta jëe ei oyapogüe güi!

4Agüɨye eyóyai kia temimonde ñɨmagüe omonde vae,

jare agüɨye epuka kia ara ikavimbae omboasa vae re.

Echa Tumpa oyapo mbae ñanemopɨakañɨ vae,

mbae kuimbae ipuere potaa oikuaa vae.

5Jeta ko oñemomichi vae reta oguapɨ tenda ikavi vae pe,

jare oyemongeta mbae reve oecha oyembopota ma vae.

6Jeta ko ɨvate ma oï vae oa susere pe vae,

jare güɨnoi reve yemboete opɨta reta ïru vae ipo pe.

7Agüɨye eporokura tenonde ndei reparandu mbove;

tenonde eecha, joko güi eikura.

8Cheraɨ michi, eyeapɨsaka ndei neñee remoe mbove,

jare ïru vae imiari yave agüɨye eiñeemondoo.

9Agüɨye eñono ñeapo, mbaetɨ reipota reve,

jare agüɨye eike iyurupochɨ vae reta iñoraro pe.

10¿Maera pa reñeapota reiko, cheraɨ michi?

Rerea yae yave, iyapɨta ndeve ñenupa pe.

Yepeta resɨi ngaraa mbae reupitɨ,

jare yepeta matɨ retekuarai ngaraa reasayepe.

11Oime amogüe osɨi, iyaraku, jare ikangɨ vae,

jare jökorai reve taɨkue ojo oväe.

12Ïru vae paravete jare oguata reteiño,

oiko opaete mbae oata reve jare oiko mbaerasɨ rupi,

ërei Tumpa omae jese oyapo vaerä ikavi vae chupe

jare güɨnoe ɨvɨkúi güi jare mbaravete güi,

13omboovaɨva jare omboɨvate,

jare jeta opɨta ipɨakañɨ vae.

14Tumpa güi ko ou mbae ikavi vae jare ikavimbae,

tekove jare mano, mbaravete jare mbaeyekou.

15Arakuaa mbota Tumpa omeegüe ko,

arakuaa katu jare mbaepoɨu,

mboroaɨu jare teko kavi vae.

16Arakuaambae jare pɨtumimbi oyeapo ko ikavimbae vae reta pegua,

jare ikavimbae oiko ko jeko kavimbae vae reta ndive.

17Tumpa iporombopota jeko kavi vae reta pegua ko;

jae oaɨu ko jare omeeñoita chupe oë kavi vaerä.

18Oime amogüe oyemboikokatu iparavɨkɨ rupi

ërei opɨta ipotambae.

19Jei: “Chepuere ma aputuu;

ayeroviata mbaembae anoigüe pe.”

Ërei mbaetɨ oikuaa mbovɨ ara ko oasata,

ndei omano mbove jare opata jókuae oeya ïru vae pe.

20Cheraɨ michi, eyapo ndeparavɨkɨ, eyemoambeko jese,

tanderupitɨ ndechi ndeparavɨkɨ reyapo reï reve.

21Agüɨye nepɨakañɨ jeko kavimbae reta oyapogüe re;

erovia Tumpa re jare eäro jembipe.

Chupeguarä yavaiä etei ko

paravete vae omboikatu vaerä jarembae pegua.

22Jeko kavi vae reta oipɨɨta mborerekua Tumpa güi,

imaeäro oyeapo kavita chupe iara yave.

23Agüɨye ere: “Oime anoi oata chevegüe,

mbaetɨ ye ma mbae oata.”

24Agüɨye ere: “Anoi ma aipota vae,

¿mbae ikavimbae pa ipuereta ou cheve?”

25Metei ara ikavi vae ñanemoakañɨ pɨ̈chɨi vae güi,

jare metei ara pɨ̈chɨi vae ñanemoakañɨ yerovia güi.

26Tumpa pe yavaiä ko omee kuimbae pe, omano yave,

mbae jae jeko pegua.

27Metei ara pɨ̈chɨi vae ñanemoakañɨ yerovia güi;

ërei iyapɨ pe oyekuaata kërai ko metei ñavo vae.

28Agüɨye ere yerovia kia pe nde omano mbove;

oväe iyapɨ yave yaikuaata kërai ko vae.

Yeandu ñochëi yaiparavo pegua

29Agüɨye eraja nerëta pe oipotagüe;

jekoasɨ vae jekoasɨ ñomai ko.

30Iyembotuicha vae ipɨa güɨra ñuai pe oï rami ko,

aguarayaɨmba jembia oäro rami ko.

31Iñee ndaye pota vae ikavi vae oipoepɨ pɨ̈chɨigüe pe,

jare omoai apu nde má reaɨu vae regua.

32Metei tatapiriri rai ipuere oyeapo tata tuichagüe,

jare metei jeko kavimbae oïndaivi ko oporoyuka vaerä.

33¡Eyeandu pɨ̈chɨi vae güi, echa pɨ̈chɨi vae mai ko!

¿Maera yera reyapo ndeyeupe yemboetembae?

34Agüɨye eyea jeko kavimbae ndive, echa ndereko omoapeta ko

jare ngaraa reyapo reregüe vae.