1Josafat mburuvicha guasu Judá pegua, ou ye ikavi oväe jo iporookuaía pe Jerusalén pe.
2Jare mbae re oecha voi vae Jehú, Hanani taɨ oë oövaiti jare jei chupe: “¿Maera pa remborɨ jeko kavimbae, reñemoïru güɨröɨro yandeYa vae reta ndive? Kuae jeko pegua yandeYa iyarasɨ ndeve.
3Ërei oime vi mbae ikavi vae oyekuaa nderé, echa ko remboai Asera iä reta kuae ɨvɨ pe, jare reñeñono ndepɨa reve kavi reeka vaerä Tumpa”.
Josafat oñono mburuvicha oporojäata vae reta4Josafat oiko Jerusalén pe, ërei oë ñoi opou tëta pegua reta rupi Beerseba güive ɨvɨtɨ Efraín kotɨ, omboyerova ye vaerä yandeYa kotɨ, iñemuñagüe reta iTumpa kotɨ.
5Jare oñono mburuvicha oporojäa vae reta opaete tëta guasu reta jëguambaea ñavo Judá pegua rupi.
6Jei chupe reta: “Pemae kavi peyapo vae re, echa mbaetɨ ko peporojäa kuimbae reta jee re, yandeYa jee re ko, echa jae oï pe ndive peporojäa yave.
7Jayave peipoɨu yandeYa güi, pemae kavi peyapo vae re, echa yandeYa Tumpa jupi vae ko, mbaetɨ oporoparavo ani mbaetɨ vi oipɨɨ vɨari korepoti ani mbae.”
8Jaeramiño vi Josafat oñono Jerusalén pe amogüe levita reta, sacerdote reta jare tenondegua jëtara pe vae reta Israel pe vae, oporojäa vaerä yandeYa pe oyeokuai vae reta re jare ñeapo reta re Jerusalén pe.
9Jare oyókuai reta körai: “Peporojäa peipoɨu reve yandeYa güi, peyapo añete vae jare jupi reve kavi.
10Oipotagüe perëtara reta yogüeru yave pekotɨ tëta guasu reta güi, oñeapo vaerä peve oporoyuka vae re, ani mborookuai reta jei vae re, pemombeu kavi chupe reta agüɨye vaerä iyoa reta yandeYa kotɨ, agüɨye vaerä yandeYa iyarasɨ pekotɨ jare perëtara reta kotɨ. Kuae peyapo yave ngaraa peyoa.
11Mase, sacerdote tenondegua Amarías oïta tenondeguarä opaete yandeYa pe oyeokuai vae reta peguarä, jare Zebadías, Ismael taɨ Judá iñemuña itenondegua, oïta opaete mburuvicha guasu iparavɨkɨ re; jare levita reta oyeokuaita pemborɨ vaerä. ¡Peñemoäta ngatu peparavɨkɨ vaerä! ¡YandeYa oïta jókuae oparavɨkɨ kavi vae ndive!”
Who We AreWhat We EelieveWhat We Do
2025 by iamachristian.org,Inc All rights reserved.
