NÚMEROS 11 - Guarani Bible with DC

YandeYa güɨrökuavee soo Israel ñemuña reta pe

1Jare Israel iñemuña reta iñeenguru yandeYa kotɨ; yandeYa oendu jare iyarasɨ yae, jare ombou tata chupe reta, jare opa oapɨ teyupa metei jembeɨ.

2Jayave opaete vae osapúkai Moisés pe, jare Moisés oyerure yandeYa pe, jare tata ogüe.

3Jare ombojee jókuae ɨvɨ Tabera, echa joko pe yandeYa omoendɨ tata jese reta.

4Ketɨgua reta oyea Israel iñemuña reta ndive vae, imaendúa reta jembíu reño, jare Israel iñemuña reta oyaeo vi jae reta rami, jare jei reta: “¡Kia mona omee soo yau vaerä!

5¡Oremaendúa kërai jevae ɨ rupigua rouse Egipto pe romboepɨmbae reve vae re! Jare vi pepino, melón, puerro, cebolla jare ajo re;

6ërei añave orerovaruruta ma; echa mbaetɨ etei mbae, jaeño ete kuae maná rou vaerä.”

7(Maná, temitɨ culantro jee vae jäɨ rami ko, jare iyuasɨ kavi ɨvɨra iyaɨsɨ rami.

8Jare tëta oñemoai omonoo, jare güeru reta oyoso angúa pe, amogüe reta oyapaso ita re, jare omboyɨ reta yapepo pe, amogüe reta oyapo mbɨyape; jare ipiche katu mbɨyape oyeapo asaite ipɨau vae pe rami.

9Pɨ̈tu yave ɨsápɨi oa teyupa iárambo yave, oa vi maná.)

10Jare Moisés oendu oyaeo opaete vae, jo pegua ñavo ndive, metei ñavo vae jo guakapi pegua jöke rupi; jayave yandeYa iyarasɨ yae ete; jaeramiño vi Moisés pe mbaetɨ ipöra.

11Jare Moisés jei yandeYa pe:

—¿Maera pa reyapo ikavimbae che nderembiokuai pe? ¿Maera pa mbaetɨ ndepɨakavi cheve, reñono chepo pe opaete kuae tëta iyemoambeko?

12¿Che pa ko jae tu ani ichɨ, rerajauka vaerä cheve, avoɨ vaerä araja michia raɨ okambu vae oyevoɨ rami, ɨvɨ rerökuavee nderee re iñemuñagüe reta pe vae pe?

13¿Ketɨ güi pa aväeta soo, opaete vae peguarä? Echa oyaeo reta cheve, jei reve: “Emee soo rou vaerä.”

14Che aeño mbaetɨ chepuere araja vaerä kuae tëta, yavai yae ko cheveguarä.

15Jare jökoraiñota cherereko yave, romoñera rembou vaerä cheve mano, ndepɨakavi ko remae cheré yave; agüɨye vaerä aecha mbae ikavimbae ou cheve vae.

16Jayave yandeYa jei Moisés pe:

—Emboatɨ cheve setenta kuimbae, Israel iñemuña reta itenondegua, nde reikuaa tenondegua reta ko tëta pe vae, mburuvicha reta; jare eru reta tupao guakapi pegua jöke pe, tacheräro reta joko pe nde ndive.

17Jare che agüeyɨta chemiari nde ndive joko pe, jare aekɨta espíritu oï nderé vae güi, jare añonota jese reta; jare güɨroata reta vaerä vi nde ndive kuae tëta iyemoambeko. Jökorai mbaetɨta reroata nde aeño pe.

18Ërei opaete vae pe rereta: Peñeñono tee pɨareve peguarä, jare peuta soo; echa peyaeo reta oendu yandeYa, jare pere: “¡Kia mona omee soo yau! ¡Añetete Egipto pe ikavi yae ko yaiko tëi!” Jayave che ameeta peve soo jare peuta.

19Ngaraa ko metei araño peu, ani mókoi ara, pandepo, payandepo, ani veinte,

20metei yasɨ kavi etei ko peuta, jae jaeño peau regua jare peyuguaru chugüi regua, peröɨro peYa pe ndive oiko vae jeko pegua, jare peyaeo jóvai pere reve: “¿Maera ra yayu kuae kotɨ Egipto güi?”

21Jayave Moisés jei:

—Seisciento mil kuimbae ipɨte pe ko aï; ¡ërei nde rere: “Soo ameeta chupe reta, jare jou retata metei yasɨ rupi!”

22¿Oyeyuka yave jeta vecha jare guaka, oupitɨta pa chupe reta? ¿Ani oyemboatɨta ra opaete jevae reta ɨguasu rupigua, oupitɨ vaerä chupe reta?

23Jayave yandeYa jei Moisés pe:

—¿Che ndeYa mbaetɨ pa chepo? Añave reechata oyembopota ra cheñee, ani mbaetɨta ra vae.

Setenta tenondegua reta omombeu Tumpa iñeemombeúa reta rami

24Jayave Moisés oë, jare jei yandeYa iñee opaete vae pe; jare omboatɨ setenta kuimbae opaete Israel iñemuña itenondegua reta. Jare oñono tupao guakapi pegua iyɨ́vɨri rupi.

25Jayave yandeYa ogüeyɨ amapɨtu re, jare omomiari; jare oekɨ espíritu oï jese vae güi, jare oñono jókuae setenta kuimbae tenondegua reta re; jare espíritu ogüeyɨ iárambo reta yave omboɨpɨ omombeu reta Tumpa iñee jókuae ara osondombae etei, ërei jókuae güire mbaetɨ ye.

26Mókoi kuimbae yepe opɨtaño teyupa pe, metei jee Eldad jare ïru jee Medad, kuae reta re ogüeyɨ vi espíritu; kuae reta jee oï vi setenta vae ipɨte pe, ërei mbaetɨ yogüeru tupao guakapi pegua pe; ërei omombeu vi jae reta Tumpa iñee teyupa pe.

27Jare metei kunumi osɨi ojo omombeu Moisés pe, jei körai:

—¡Oime Eldad jare Medad omombeu reta Tumpa iñee teyupa pe!

28Jayave Josué, Nun taɨ, Moisés pe taɨrusu güive omborɨ vae jei:

—¡Cheya Moisés, eyopia reta!

29Jare Moisés jei chupe:

—¿Nerägüɨro pa cheré? ¡Mbae mona opaete vae, kuae tëta yandeYa imbae omombeu Tumpa iñee, jare yandeYa oñono iespíritu metei ñavo vae re!

30Jayave Moisés jare opaete Israel iñemuña itenondegua reta yogüeru ye teyupa pe.

YandeYa ombou jetagüe inambu

31Jayave yandeYa ombou ɨvɨtu, jare jókuae ɨvɨtu güeru jeta yae vae inambu ɨguasu kotɨ güi, jare güeru oeya teyupa iyɨ́vɨri; teyupa güi metei ara yaguata vae omotɨnɨe metei jembeɨ kotɨ, jare jökorai vi ïru jembeɨ kotɨ, opaete teyupa iyɨ́vɨri rupi inambu reta yatɨ metei metro seri ɨvɨ iárambo.

32Jayave opaete vae ñogüɨnoe omonoo vaerä jókuae ara, opaete jókuae pɨ̈tu, jare pɨareve pe ye, omonoo reta jeta inambu; jare mbovɨño omonoo vae, jae ko payandepo atɨ; jare omoai omotini reta vaerä iyeupe teyupa echa joko pe oñotɨ reta tëta imbaepotarai vae.

35Kibrot-hataava güi ñogüɨnoe Hazerot kotɨ, jare joko pe opɨta reta.