JEREMÍAS 4 - Guarani Bible with DC

Yemboarakuaa oyeeya vaerä teko ikavimbae

1YandeYa jei:

“Israel, reyerova ye ko yave,

eyerova ye chekotɨ.

Rembosɨrɨ yave netumpa-raanga reta

ikavimbae yae vae cheróvai güi

jare mbaetɨta ma resɨrɨ chegüi yave,

2ndepuere rere cheree re,

añetete vae, jupi vae jare sɨmbi vae.

Jayave tëtaguasu reta peguarä cheree oïta,

mborerekua jare mbaemboetea peguarä.”

3YandeYa jei opaete Judá pegua

jare Jerusalén pegua kuimbae reta pe:

“Peara peko peyeupe,

agüɨye pemaetɨ yuu pɨte rupi.

4Judá pegua jare Jerusalén pegua reta,

peyembocircuncida pepɨa pe yandeYa pe,

agüɨye chearasɨ tijendɨ pekotɨ tata rami,

javoi mbaetɨ kia ipuere ombogüe vaerä,

pereko reta ikavimbae vae jeko pegua.

Judá iyemomburu oyemboai vaerä jërakua

5Emoërakua kuae Jerusalén pe jare Judá pe ere:

Pemoñee mimbɨguasu opaete kuae ɨvɨ rupi,

pesapúkai täta, jare pere:

‘¡Peyemboatɨ! ¡Yaike vaerä

tëta guasu oñekëse kavi yae vae pe!’

6Pemopüa bandera Sión pe;

¡petekuarai, agüɨye pepɨta!

Echa ɨvɨtuguasu kotɨ güi aruta susere jare kañɨtei.

7Yaguapope oë ma ikua güi,

tëtaguasu reta imboaia oë ma oguata;

iɨvɨ güi oë ndeɨvɨ omboai vaerä,

nerëta guasu reta omboaita jare ipombae opɨtata.

8Jáeramo peyemonde temimonde mbɨatɨtɨ pegua pe,

peyaeo jare peräse pepɨatɨtɨ güi,

echa yandeYa iyarasɨ

mbaetɨ osɨrɨ oï yandegüi.”

9YandeYa jei:

“Jókuae ara oväe yave,

mburuvicha guasu reta jare mburuvicha reta ipɨakɨɨyeta,

sacerdote reta kïrii ngatuta ipɨakañɨ güi,

jare ñeemombeúa reta ipɨakañɨta.”

10Jare jae: “¡Atataɨ cheYa,

rembotavɨ ete kavi opaete vae reta,

kuae Jerusalén pegua reta!

Mbɨakatu rerökuavee chupe reta,

ërei jae reta oiporara yae ñogüɨnoi.”

11Jókuae ara rupi jei retata opaete vae reta pe,

kuae Jerusalén pegua reta pe.

“Ɨvɨtuakuvo ñuu kotɨgua oyepeyu cherëta kotɨ,

mbaetɨ ko mbae oyembopiriri vaerä

ani mbae oyetɨo vaerä ave;

12che ambouta ɨvɨtu vae,

täta yaeta ko jókuae ɨvɨtu güi,

echa jaema aiporaraukata chupe reta.”

Tovaicho reta oimama Israel

13Mase, ko tovaicho reta yogüeru amapɨtu rami,

ikäretou ñeraro pegua kusumirou rami,

ikavayu reta iñäkua yae güɨraké güi.

¡Atataɨ, jaema ñakañɨtei!

14Jerusalén, ndepɨa eitɨo ikavimbae güi

reasayepe vaerä,

¿kërai yave regua pa remaeñota oiko,

yemongeta ikavimbae ndepɨa pe?

15Echa Dan kotɨ güi jare ɨvɨtɨ Efraín kotɨ güi,

jërakua ñee ikavimbae:

16“Pere tëtaguasu reta pe jare Jerusalén pe:

‘Matɨ güi yogüeru ma tovaicho reta,

jäsémbai osapúkai reta ñeraro pegua,

tëta guasu reta Judá pegua kotɨ.

17Oimama retata tëta guasu reta Judá pegua,

ko reta re oyangareko vae reta rami,

echa oyembopɨapochɨ reta chekotɨ.

Che ndeYa jae kuae.

18Ndereko jare nderembiapo jeko pegua ko kuae ou ndeve;

jae ko kuae ikavimbae reyapo vae jekovia,

ndepɨa pe jasɨ yaeta vae.’

Jeremías ipɨatɨtɨ yae jëta re

19¡Chepɨa jasɨ chepɨatɨtɨ güi!

¡Chepɨa ikaviä yae!

¡Mbaetɨ chepuere chekïrii!

Aendu mimbɨguasu iñee,

jare täsémbai sapúkai ñeraro pegua vae.

20Oyoaɨkue yoaɨkue jërakua susere;

echa tëtaguasu opaetei oyemboai oï.

Aramoete opa oyemboai chero reta,

jendagüe opɨta chero guakapi pegua.

21¿Kërai yave regua pa aechata

bandera ñeraro pegua,

ani kërai yave pa aendu poita

mimbɨguasu iñee ñeraro pegua?”

22YandeYa jei:

“Tëta chembae vae yarakuaambae ko,

mbaetɨ chekuaa.

Jae ko cheraɨ reta oyemongetambae,

mbaetɨ omae reta iyeupe vae;

ikavimbae oyapo vaerä yarakuaa katu yae,

ërei ikavi vae oyapo vaerä, mbaetɨ.”

Jeremías oecha kañɨtei oimeta vae

23Amae ɨvɨ re, jare aecha ipombae oï;

amae ara re, jare mbaetɨ aecha tembipe.

24Amae ɨvɨtɨ reta re,

jare aecha okana ñogüɨnoi;

opaete ɨvɨtɨ reta orɨrɨi.

25Amae, jare aecha mbaetɨ etei ma kuimbae,

jare opaetei güɨra reta ave yogüɨraja.

26Amae, jare aecha ɨvɨ kavi ipombae oï,

jare opaete tëta guasu reta oyemboai.

YandeYa iyarasɨ yavaetegüe opa omboai kuae reta.

27YandeYa jei:

“Opaete ɨvɨ oyemboaita,

ërei ngaraa opaetei amokañɨtei.

28Ɨvɨ jare ara ipɨatɨtɨ yaeta.

Echa jae ma ko, ngaraa ma aipoepɨ cheyemongeta;

ayapo ma, ngaraa ma aja ye cheraɨkue kotɨ.

29Sundaro kavayu regua reta

jare uvɨ regua reta oyeendu yave,

opa otekuarai tëta guasu pegua reta;

oñemi reta kaa tëɨ vae rupi

jare oyeupi reta ɨ̈vavira re.

Tëta guasu reta opɨta ipombae,

mbaetɨ kia ave opɨta pɨpe.

30Nde, tëta reyemboai reï vae ¿mbae pa reyapota?

Yepe tëi reyemonde temimonde pɨ̈ta vae pe,

yepe tëi reñemopöra kavi oro pe,

yepe tëi rembojovɨ nderesakua.

Ërei mbaetɨ eteita osirive ndeve

jókuae reñemopöra kavi vae,

nderaɨuse vae reta nereröɨro ma,

ndeyuka vaeräño ma ndereeka reta.

31Kuña jaeramo imembɨ vae oyekuaku yave

jäse vae rami, aendu täse,

jae ko Sión pegua reta jäse vae,

jäse, ipo reta oupi reve jei:

‘¡Atataɨ! ¡Jaema cheyukata oporoyuka vae reta!’ ”