JUDIT 4 - Guarani Bible with DC

Israel-ɨgua reta oyeapo kavi oyeepɨ vaerä

1Israel-ɨgua reta Judea pe yogüɨrekose vae oikuaa yave Holofernes, mburuvicha guasu Asiriaɨgua Nabucodonosor isundaro ruvicha tuicha vae, oyapo ou oiko ïru tëta reta ndive vae, opaetei mbae re oyemombae yogüeru yogüeru vae jare opa tupao reta omboai güeru güeru vae,

2täta okɨɨye reta echa oyemongeta reta Jerusalén pe ipuereta vi jökorai oyapo reta vae, jare iTumpa itupao ndive.

3Jae reta ko ndei ave ɨma yogüeru ye ketɨ yogüɨrekoa güi, jare ndei mbovɨ ara opaete Judeaɨgua reta oyemboatɨ ye oñono yee vaerä Tumpa ipo pe tembiporu reta mɨmba oyeyuka oyeapɨ jese vae (mbota renda) jare tupao.

4Jare opoko omombarandu opaete rupi Samaria, Cona, Bet-horón, Ibleam, Jericó, Coba, Hasor jare ɨvɨtɨ päu Salem pegua pe,

5jare jaemai oyembotenonde reta ojo ñogüɨnoi ɨvɨtɨ ɨvate vae rupi; opoko oñono kavi reta opaete tëta raɨ raɨ reta oï jokoropi vae, omboatɨ reta tembíu iyeupe, jare jaema oï kavi ñogüɨnoi ñoraro pe. Ndei ave mbovɨ ara opa ombaarɨvo reta iyeupe.

6Joaquín, oiko jayave pai guasurä jare oime oï Jerusalén pe, oikuatía tupapire Betuliaɨgua reta pe jare Betomestaim pegua reta pe, jókuae oï ko Esdrelón jóvai, ñuu kutɨ ye köiño Dotán güi,

7jókuae kuatía pe jei chupe reta jae reta ojota ñogüɨnoi ɨvɨtɨ ɨvate vae reta rupi, Judea kotɨ yaikea kotɨ rupi, echa jokoropi mbaetɨta yavai oyopia reta vaerä tovaicho reta kuri, echa ko jókuae ipɨmii yae joko pe yaasa vaerä vae jaeño ma ipuereta jokoropi oasa mókoi mókoi rupi vae.

8Israel-ɨgua oyapo rai tenondegua Joaquín jei vae jare opaete ndechi Israel-ɨgua reta Jerusalén pe yogüɨreko vae jeigüe vae.

Israel-ɨgua reta oiporu yemborɨ Tumpa pe

9Opaete vae Israel-ɨgua reta täta osapúkai reta Tumpa pe jare oñemomichi kavi reta jóvai.

10Kuimbae reta, kuña reta, michia reta, mɨmba reta, ketɨgua reta joko pe yogüɨreko vae reta, oparavɨkɨ vae reta jare tembiokuai reta reve opaete vae omondo reta temimonde jaimbe vae.

11Opaete Israel-ɨgua reta yogüɨrekose Jerusalén pe vae, kuimbae reta, kuña reta jare michia reta, opaete reve iñäka oitɨ reta ñogüɨnoi Tumpa jóvai omee vaerä mbaemboete, jare oñono reta iñäka re tanimbu, jare oipɨɨso reta jemimonde jaimbe vae Tumpa pe.

12Jare oñono reta vi mɨmba reta oyeyuka jese vae re temimonde jaimbe vae, jare metei rami täta osapúkai reta Israel iTumpa pe oiporu reta agüɨye vaerä Tumpa omaeño, itumpa tee vae reta jae jeigüe oyapo, imichia reta opɨ̈ro chugüi reta, jare ikuña reta güɨraja chugüi reta, jare agüɨye jëta reta opa oyemboai chugüi reta, jare itupao re opoko reta.

13Jare Tumpa oendu isapúkai chupe reta oiparareko omae jese reta. Opaete Judea rupi jare Jerusalén pe, opaete tëta ipo reta oyekuaku ñogüɨnoi mbovɨ ara rupi iya imbaepuere vae itupao jóvai.

14Pai tenondegua Joaquín jare opaete pai reta, oyeokuai tupao pe vae, jare ïru reta oyeokuai iya pe vae reta, oyemonde yogüɨraja jemimonde jaimbe vae ndive mɨmba oyeyukagüe opa ara omee vaerä Tumpa pe, oyerure reta jare mbota omee reta ipɨakavi reve.

15Iñäka-regua re tanimbu oñono reta, iyapɨmbae reve oiporu reta Tumpa pe mboroparareko jare mboroaɨu opaete tëta Israel re.