SALMOS 147 - Guarani Bible with DC

SALMO 147Mbaemboete Tumpa ipɨakavi Jerusalén re vae

1¡Pemboete yandeYa!

¡Ikavi ko yatairari vaerä salmo reta ñaneTumpa pe!

Echa ikavi jare ipöra yae ko ñamee mbaemboete chupe vae.

2YandeYa omopüa pɨau ye Jerusalén;

güeru yeta Israel iñemuña reta opa iɨvɨ güi oyererajagüe.

3Jae ombopɨakatu ipɨatɨtɨ vae reta,

jare oipoano ipere reta.

4Jae oipapa yasɨtata reta,

jare metei metei ñavo ombojee.

5Tuicha yae ko yandeYa,

jare imbaepuere yae,

iyarakuaa yamboapɨ rapeä etei.

6YandeYa ombotuicha oñemomichi vae reta,

jare omoñemomichi iyoa vae reta.

7Petairari yandeYa pe,

tairari mbaemboete pegua,

petairari ñaneTumpa pe arpa ndive.

8Jae ko oyasoi ara amapɨtu pe,

jae ko oñono kavi ama okɨ vaerä ɨvɨ re,

jae ko ombokuakuaa ñana ɨvɨtɨ guasu reta re.

9Jae ko omongaru mɨmba reta,

omongaru chucha imembɨ reta oñee yave yɨmbɨaɨ güi.

10Kavayu reta ipɨ̈rata,

mbaetɨ omboyerovia yandeYa,

ani kuimbae reta isɨrɨkɨ,

mbaetɨ vi omboyerovia.

11YandeYa omboyerovia oipoɨu chugüi vae,

jare oäro iporoparareko re vae.

12Jerusalén pegua reta,

pemboete peYa,

Sión pegua reta,

pemboete peTumpa.

13Echa omotäta neröke reta imotätaa,

nderapɨpe yogüɨreko vae re iporerekua.

14Jae güeru mbɨakatu ndeve,

omee ndeve jeta trigo ikavigüe.

15Jae ombou iñee ɨvɨ pe,

jarembae pegua oñemoai iñee.

16Omee oa iroɨ vecharaagüe rami,

morotï omoai tanimbu rami.

17Oitɨ iroɨ amandau rami,

jókuae iroɨ ombou vae, ¿kia pa güɨropɨata?

18Ombou iñee yave tɨkui,

ɨvɨtu ombou yave oipeyu, jare ɨ oë chugüi.

19Jae oikuaauka iñee, iporookuai reta jare iporojäa reta,

tëta Israel, Jacob iñemuña reta pe.

20Mbaetɨ etei jökorai oyapo ïru tëtaguasu reta ndive;

jae reta mbaetɨ oikuaa yandeYa iporookuai reta re.

¡Aleluya!