2 REYES 14 - Guarani Bible with DC

Amasías oiko mburuvicha guasurä Judá pe(2 Cr 25.1-28)

1Joás, Joacaz taɨ mókoi año ma oiko mburuvicha guasurä Israel pe yave, Amasías, Joás Judá pegua taɨ omboɨpɨ oï mburuvicha guasurä Judá pe.

2Amasías güɨnoi veinticinco año omboɨpɨ oï mburuvicha guasurä yave, jare oiko mburuvicha guasurä Jerusalén pe veintinueve año. Ichɨ jee Joadán, jae ko Jerusalén pegua.

3Amasías oyapo jupi vae yandeYa jesa róvai, yepe tëi mbaetɨ iñemuñagüe David rami; oyapo opaete mbaembae tu Joás oyapo rami.

4Ërei ngatu jeseve mbaetɨ omboai mbaemboete renda ɨvɨtɨ rupigua, echa opaete vae jekuaeñoi omee mɨmba oyeyukagüe jare oapɨ reta ikäti kavi vae incienso jokoropi.

5Amasías oñemomɨ̈rata kavi ma mburuvicha guasurä yave, oyuka opaete jókuae tu iyukaa reta.

6Ërei mbaetɨ oyuka oporoyuka vae reta taɨ, Moisés iporookuai pe oyekuatía oï rami, yandeYa oyókuai jei chupe yave: “Agüɨye kia tomano taɨ reta jeko re, ani tu reta jeko re, metei vae ñavo tomano iyoa ae re.”

7Amasías jae ko oyuka diez mil Edom iñemuña reta ɨvɨtɨ päu ipe kavi Yukɨ jee vae pe, jare opɨ̈ro tëta Sela, javoi ombojee Jocteel; jökorai jee añave rupi.

8Jayave Amasías omondo ñee jerajaa Joás, Joacaz taɨ pe, jae ko Jehú jɨmɨmino pe, mburuvicha guasu Israel pegua, jei chupe: “Eyu yayokuaa, ¿yaecha ra kia jëia?”

9Ërei Joás, mburuvicha guasu Israel pegua omondo ñee Amasías, mburuvicha guasu Judá pegua pe, jei: “Guambero Líbano pegua omondo jei ɨ̈vɨrare Líbano pegua pe: ‘Emee nderayɨ, cheraɨ jembirekorä.’ Ërei oasa mbaeporou jokoropi jare opa oakɨo oeya jókuae guambero.

10Añete, remoamɨri ko Edom iñemuña reta jare jókuae pe reyembotuicha. Eyembotuicha, ërei epɨta ndero pe. ¿Maera pa reyemoingeta mbaesusere pe, nde jare Judá pegua reta?”

11Ërei ngatu Amasías mbaetɨ güɨrovia. Jayave Joás, mburuvicha guasu Israel pegua ojo oñeraro Amasías ndive, Bet-semes pe, ɨvɨ Judá pe oï vae pe.

12Jare Judá pegua reta oñemoamɨriuka Israel pegua reta pe; metei ñavo otekuarai jo kotɨ

13Joás, mburuvicha guasu Israel pegua oipɨɨ tembipɨɨrä Bet-semes pe Amasías, mburuvicha guasu Judá pegua, javoi ojo Jerusalén kotɨ jare ombosururu ciento ochenta metro Jerusalén ikësea, öke Efraín jee vae güive öke Ekina jee vae pe oväe regua.

14Javoi güɨnoe opaete oro jare korepoti, opaete tembiporu reta yandeYa jo pe mbaembae jepɨ vae oñeñovatúa pegua, jare mburuvicha guasu jo pe mbaembae jepɨ vae oñeñovatúa pegua; oipɨɨ vi tembipɨɨrä mbovɨ kuimbae reta, javoi oyerova ye Samaria kotɨ.

15Ïru mbaembae Joás regua, mbae tuichagüe oyapo vae, jare kërai oñeraro Amasías, mburuvicha guasu Judá pegua ndive vae, oyekuatía oï tembikuatía pe, Israel pegua mburuvicha guasu reta regua oyekuatía oïa pe.

16Joás omano yave oñotɨ reta Samaria pe, Israel pegua mburuvicha guasu reta oñeotɨa pe. Taɨ Jeroboam oguapɨ jekovia pe mburuvicha guasurä.

17Amasías, Joás taɨ, mburuvicha guasu Judá pegua oiko ye quince año omano güire Joás, Joacaz taɨ, mburuvicha guasu Israel pegua

18Ïru mbaembae Amasías regua, oyekuatía oï tembikuatía pe, Judá pegua mburuvicha guasu reta regua oyekuatía oïa pe.

19Jerusalén pegua reta oñemopüa Amasías kotɨ, jare jae otekuarai Laquis kotɨ; ërei oaɨkuemoña reta jókuae tëta guasu kotɨ, joko pe oyuka reta.

20Javoi güeru reta metei kavayu re jare oñotɨ reta Jerusalén pe iñemuñagüe reta oñeotɨa pe, David Jëta guasu pe.

21Jayave opaete vae Judá pegua reta omboguapɨ Azarías, tu Amasías jekovia pe mburuvicha guasurä; jayave Azarías güɨnoi ma diecisei año.

22Jae omopüa pɨau ye tëta guasu Elat, opɨ̈ro ye ɨvɨ Judá peguarä, tu omano güire.

Ïru Jeroboam oiko mburuvicha guasurä Israel pe

23Amasías, Joás taɨ quince año ma oiko mburuvicha guasurä Judá pe yave, Jeroboam, Joás taɨ omboɨpɨ oï mburuvicha guasurä ɨvɨ Israel re; cuarenta y un año oiko mburuvicha guasurä Samaria pe.

24Ërei oyapo ikavimbae yandeYa jesa róvai, mbaetɨ oyembosɨrɨ Jeroboam, Nabat taɨ iyoa güi, Israel iñemuña reta pe oyavɨuka vae güi.

25Jeroboam opɨ̈ro ye ɨvɨ Israel jembeɨ reta, ɨvɨ Hamat pe yaikea güive ojo oväe regua ɨguasu Arabá pegua pe, yandeYa Israel iTumpa jei rami, omoërakua jembiokuai Jonás, Amitai taɨ rupi vae,Jon 1.1. ñeemombeúa Gat-hefer pegua.

26Echa yandeYa oecha Israel iñemuña reta oiporara yae ete vae; mbaetɨ etei kia ave ojoyepe, mbaetɨ kia omborɨ reta vaerä.

27YandeYa mbaetɨ jei opa vaerä omokañɨtei Israel jee kuae ɨvɨ güi; jáeramo oepɨ reta Jeroboam, Joás taɨ rupi.

28Ïru mbaembae Jeroboam regua, opaete oyapogüe reta, mbae ikavigüe oyapo vae reta, jare opaete ñeraro rupi oyapo vae, jare kërai Damasco jare Hamat opɨ̈ro ye Israel peguarä, jae ko Judá imbaegüe; kuaekuae regua oyekuatía oï tembikuatía pe, Israel pegua mburuvicha guasu reta regua oyekuatía oïa pe.

29Jeroboam omano yave, oñotɨ reta iñemuñagüe mburuvicha guasu reta Israel pegua oñeotɨa pe; jare taɨ Zacarías oguapɨ jekovia pe mburuvicha guasurä.