JOB 4 - Guarani Bible with DC

Elifaz omboeta Job pe

1-2Jayave Elifaz Temán pegua jei Job pe:

Romboɨpɨ oremiari ndeve yave jasɨ katuta ndeve;

ërei mbaetɨ chepuere chekïriiño apɨta.

3Mase, nde remboese jeta vae reta;

jare remomɨ̈ratase yepi ipɨtu vae reta;

4neñee pe remoäta ngatu yepi ogüɨapi vae,

jare ipɨtu vae reta remomɨ̈ratase,

5ërei ngatu añave ou yave ikavimbae ndeve reyemboakɨ;

jare ou yave oväe ndeve, ndepɨatɨtɨ.

6Nde, ¿Tumpa güi reipoɨu vae reñoä pa reyeko?

¿Jupi rupi reiko vae reñoä pa ndepɨa reñono?

7Añave nemaendúa:

¿Okañɨtei pa jekombae?

Jare, ¿sɨmbi rupi yogüɨreko vae okañɨtei pa?

8Che aecha rami,

mbaeyoa jare ikavimbae oyapo vae reta, oarɨvo ko.

9Okañɨtei reta Tumpa ipɨ̈túe rupi,

jare iyarasɨ rupi opa oyemboai.

10Yepe tëi yaguapope rami iñee reta iyarasɨ güi,

ërei Tumpa opa omopë jäi reta.

11Yaguapope indechi vae omano, oata ramo jembiurä,

jare yaguapope kuña imembɨ reta opa oñemoai.

12Ñee ou oväe cheve, kia ñanemomiari yandeapɨsa pe rami,

ayeapea aendu jókuae ñee.

13Pɨare yave kuimbae reta jopeɨ yae ma yave,

chepaɨu chembokepegua.

14Kɨɨye yavaetegüe ou cheve,

opaete cherete omborɨrɨi.

15Ɨvɨtu chepeyu yave,

chepirechɨɨ cheapo.

16Oyemboɨ cheróvai mbae iä,

mbaetɨ chepuere aecha jova.

Kïrii ngatu opɨta. Javoi aendu jei:

17“¿Ipuere ra kuimbae jupi yae Tumpa güi?

¿Ipuere ra oiko ikɨambae iyapoa jóvai?

18Mase, iaraɨgua reta re ave mbaetɨ güɨrovia mbatee,

oväe teko iaraɨgua reta re ave.

19¡Vɨtei pa kuimbae, imbaepuerembae vae,

o tuyuapo pegua oñemopüa ɨvɨkúi re vae ramiño vae,

oñepɨ̈rota jese, kupii re ñapɨ̈ro rami!

20Ndeimbove yave oime oï,

ërei kaaru yave opa okañɨ,

okañɨtei jekuae avei pegua, mbaetɨ ye kia imaendúa jese.

21Okañɨtei, ipöra yae tëi reve,

omano yarakuaambae reve.”