1Efraín iñemuña pegua reta iyarasɨ jare oyoaka reta Gedeón ndive, echa jae mbaetɨ omondo omombarandu reta yogüɨraja yave oñeraro Madián iñemuña reta ndive.
2Ërei jae jei chupe reta:
—¿Mbaetɨ yera peikuaa pe reta peyapogüe tuicha yae ko che ayapo vae güi vae? Michiecha peyapo vae ko tuicha yae ore reta royapo vae güi.
3Tumpa omee pepo pe Oreb jare Zeeb, Madián iñemuña juvicha reta, ¿mbae pa che ayapo amboyovake vaerä kuae peyapogüe?
Kuae ñee reta Gedeón güi oendu reta yave, Efraín iñemuña reta iyarasɨ poi reta ikotɨ.
4Gedeón jare tresciento kuimbae reta yogüeru oväe Jordán pe jare oasa reta jovaicho pe, yepe tëi ikangɨ yae reta ërei jekuaeñoi oporoaɨkuemoña reta.
5Jare jei Sucot pegua reta pe:
—Peyapo ikavi vae, pemee mbae yepe tou che ndive yogüeru vae reta, echa ikangɨ yae reta. Roaɨkuemoña ko royu Zeba jare Zalmuna, Madián iñemuña reta juvicha guasu reta.
6Jare Sucot pegua mburuvicha reta jei:
—¿Opa ma yera peipɨɨ Zeba jare Zalmuna romongaru vaerä ndesundaro reta?
7Jare Gedeón jei chupe reta:
—¡YandeYa opa omee Zeba jare Zalmuna chepo pe güire, ayu yeta jare opata ponupa ñurati ñuu rupigua pe!
8Joko güi ojo Peniel pe, jare oiporu vi Sucot pegua reta pe oiporu rami. Ërei Peniel pegua reta jei, Sucot pegua reta jei rami etei,
9Gedeón jei chupe reta:
—¡Ayerova ye aporomoamɨría güi yave, opata amboai kuae o ɨvate!
10Zeba jare Zalmuna ñogüɨnoi Carcor pe quince mil sundaro ndive, jaeño ma jókuae sundaro reta kuaraɨ oëa kotɨgua jembɨregüe, echa opa omano chugüi reta ciento veinte mil kuimbae ñeraro regua.
11Gedeón ojo tape ñuu jembeɨ rupi ojo vae rupi. Noba jare Jogbeha güi kuaraɨ oëa kotɨ, jare oë chupe reta mbaetɨ oyangareko ñogüɨnoi yave.
12Zeba jare Zalmuna opa oë otekuarai, ërei Gedeón oaɨkuemoña jare oipɨɨ jókuae mókoi Madián iñemuña juvicha reta jare isundaro reta opa oñemoai moai.
13Gedeón, Joás taɨ oyerova ye ñeraroa güi, ndei pɨ̈tu mbove.
14Jayave oipɨɨ metei kunumi Sucot pegua, jare oparandu chupe mburuvicha reta re; jare jókuae kunumi oikuatía omee setenta y siete mburuvicha reta jare tenondegua vae reta Sucot pegua jee.
15Jayave Gedeón ojo Sucot pe jare jei jókuae tëta pegua reta pe:
—¿Pemaendúa pa kërai pepuka cheré Zeba jare Zalmuna jeko pegua? ¿Pemaendúa pa peäteɨ pemongaru chesundaro reta ikangɨ yae yogüeru yave pere oreve mbaetɨño roipɨɨ vae? ¡Añave, ko ñogüɨnoi!
16Jayave Gedeón oipɨɨ ñurati ñuu rupigua jare pɨpe oinupa Sucot pegua tenondegua vae reta.
17Opa oitɨ o ɨvate Peniel pegua jare opa vi oyuka jókuae tëta guasu pegua reta.
18Jaɨkue rupi oparandu Zeba jare Zalmuna pe:
—¿Kërai pa jókuae kuimbae reta peyuka Tabor pe vae?
Jae reta jei chupe:
—Nde rami etei reta, metei ñavo mburuvicha taɨ retaecha.
19Jayave Gedeón jäse osapúkai:
—¡Cherɨkeɨ reta ko! ¡Chesɨ imembɨraɨe reta ko peyuka! ¡YandeYa jee re tae peve, peyukaä yave mona, ngaraa tëi poyuka!
20Jare jei taɨrɨpɨ Jeter pe:
—¡Epüa jare opa eyuka!
Ërei Jeter mbaetɨ oekɨ ikɨsepuku jɨru güi, echa taɨrusu yae vɨteri ko.
21Jayave Zeba jare Zalmuna jei reta Gedeón pe:
—¡Nde oreyuka! ¡Jökorai yaikuaa kuimbae jëia ko vae nde!
Jayave Gedeón opüa jare opa oyuka, Zeba jare Zalmuna icamello reta ipoɨ opa oekɨ.
22Jayave Israel iñemuña reta jei Gedeón pe:
—Eiko oreruvicharä nde jare neñemuña reta, echa oreyora Madián iñemuña reta ipo güi.
23Ërei Gedeón jei chupe reta:
—Che, ani cheñemuña reta ave ngaraa roiko peruvicharä YandeYa ko peruvicha.
24Jaeño aipota pemee cheve moäka-vera reta pepɨ̈rogüe.
Echa Madián pegua reta omomora yae oro, jae ko ismaelita reta.
25Israel iñemuña reta ipɨakatu reve oipɨso ɨvɨ re ñeapevaka, jare metei ñavo oñono pɨpe moäka-vera reta opɨ̈rogüe, jare jei reta Gedeón pe:
—¡Ko oï!
26Jare opaete moäka-vera oyemboatɨgüe oupitɨ seri diecinueve kilo oro, oyepapambae reve mbae ipöra vae jare mbae jepɨ vae, temimonderä pɨ̈ta vae mburuvicha guasu reta Madián iñemuña pegua reta omonde vae jare camello yayu regua reta ipoɨ.
27Jókuae oro güi Gedeón oyapo tumpa-raanga, jare oñono Ofra pe, jae jëta pe, jare opaete Israel iñemuña reta yogüɨraja joko pe jókuae tumpa-raanga jeko pegua jare opia reta Tumpa güi; kuae rupi ou yemboavai Gedeón pe jare jo pegua reta pe.
28Jökorai Madián iñemuña reta oñemomichiuka Israel iñemuña reta pe, jare mbaetɨ ye ma oñemopüa reta. Gedeón oikove oiko ramboeve oime mbɨakatu jókuae ɨvɨ pe cuarenta año.
Gedeón imano29-30Jerobaal, jae ko Gedeón, ojo oiko jo ae pe, güɨnoi setenta taɨ, echa jeta yae ko jembireko.
31Metei kuña güɨrekoiño vae Siquem pegua, imembɨ vi chupe, jare jókuae taɨ ombojee Abimelec.
32Gedeón, Joás taɨ omano indechi yae pe, jare oñotɨ reta tu Joás jɨvɨa Ofra pe oïa pe, Abiezer iñemuña reta iɨvɨ pe.
33Gedeón omano güire Israel iñemuña reta jekuae oyerova ye Tumpa güi omboete vaerä baal reta, jare oiparavo reta itumparä Baal-berit.
34Jare mbaetɨ imaendúa Israel iñemuña reta yandeYa Tumpa re, opaete jovaicho reta ipo güi oyora vae,
35mbaetɨ vi omboyekuaa reta ipɨakavi Jerobaal jo pegua reta re, jae ko Gedeón, jókuae ikavi vae oyapo Israel iñemuña reta vae re.
Who We AreWhat We EelieveWhat We Do
2025 by iamachristian.org,Inc All rights reserved.
