PROVERBIOS 17 - Guarani Bible with DC

1Ikavi yae ko atikúi yepe yau vae, yaiko pɨagüive reve vae,

oime jeta tembiúa pe, oñeraro reteiño vae güi.

2Tembiokuai oyeandu katu reve oiko vae

ipuere oyemboeteuka, tu omboetembae güi,

ipuere vi güɨnoi mbaeyekou oporomboetembae tɨvɨ reta ndive.

3Oro jare korepoti, oyetɨ o kavi tata pe;

ërei yemongeta reta, ojäa yandeYa.

4Jeko kavimbae jare yapu yae vae,

güɨrovia katu ipɨapochɨ vae iñee reta.

5Paravete vae oyóyai yóyai vae, ikavimbae ko oyapo Iyapoa kotɨ;

japicha isusere re oyerovia omae vae, ngaraa opɨta oiporarambae.

6Ndechi reta iyemboetea, jae ko jɨmɨmino reta;

michia reta iyemboetea, jae ko tu reta.

7Yarakuaambae, mbaetɨ ipoki imiari jupi rupi kavi,

jökoraiño vi mburuvicha, mbaetɨ ikavi iyapu vaerä.

8Mbaemboepɨ vɨari omomora vae pe, ita ipöra yae vae rami ko jókuae,

echa oë kavi chupe opaete mbaembae oyapo vae.

9Japicha imbaeyavɨ mbaetɨ omoërakua vae, oyeaɨuka ko;

ërei omoërakua vae, ombosɨrɨ iyeugüi ivɨa-ïru.

10Yemboeta, ikavi yae yarakuaa katu vae pe,

yarakuaambae re cien chikote oyeporu vae güi.

11Ipɨarai vae, ñeraroño oeka,

ërei outa chupe ñee jerajaa ipɨa-pïrimbae.

12Jaekaviño ko ñañoövaiti mɨmba

imembɨmii vae imembɨ oñepɨ̈ro chugüi vae ndive, metei iyarakuaambae ndive ñañoövaiti vae güi.

13Mbae ikavi vae omboekovia ikavimbae pe vae,

jo pe oime aveita ikavimbae.

14Oporomoñorarouka vae, ɨ̈aka güi ɨ oyepɨyere rami ko;

ndei ñañererokomegua pɨpe mbove, yayembosɨrɨ chugüi.

15Jupimbae ombojupi vae jare jupi vae omboeko vae,

yandeYa pe ikaviä yae ko kuae reta.

16¿Mbaerä pa yarakuaambae oguata arakuaa, mbaetɨ etei reve iyarakuaa?

17Vɨa-ïru, oporoaɨu avei ko; tëtara ete rami ko, oime yave mbɨatɨtɨ.

18Mbaetɨ ko iyarakuaa oporomborɨ ipía vaerä vae;

ivɨa-ïru omborɨ ipía vaerä vae.

19Omomora jei ñeeasɨ katu vae, omomora ñeraro;

oyembotuicha yae vae, jae aeño ko oeka iyeupe mbaesusere.

20Ipɨapochɨ vae ngaraai oväe iyeupe ikavi vae;

oporomomburu vae oata mbaesusere pe.

21Yarakuaambae tu, mbɨatɨtɨ rupi ko oiko;

mbaetɨ ko oiko yerovia katu rupi.

22Yerovia katu, moa ikavi vae rami ko yanderete pe,

ërei mbɨatɨtɨ, oporomombaerasɨ ko.

23Iyoa vae, oipɨɨ mbaemboepɨ vɨari,

güɨ rokomegua vaerä jupi vae.

24Iyarakuaa katu vae re, oyekuaa arakuaa,

ërei yarakuaambae, oipotagüe rupiño oyemongeta.

25Iyarakuaambae, mbɨatɨtɨ yae ko

tu peguarä jare ichɨ peguarä.

26Mbaetɨ ko jupi oyemboeko vaerä jupi vae,

mbaetɨ vi jupi oñenupa vaerä kuimbae imboetea yae vae reta.

27Oyeandu reve iñee omoë vae, yarakuaa ko,

kuimbae oyeandu reve vae, yarakuaa ko.

28Yarakuaambae ave kïrii yave, oyepapa ma ko yarakuaa rami;

iyuru oyopia vae, yarakuaa ko.