ISAÍAS 5 - Guarani Bible with DC

Yembojaanga uvarupa regua

1Añave, atairarita chevɨa-ïru regua,

atairarita iuvarupa regua.

Chevɨa-ïru güɨreko metei uvarupa

ɨvɨtɨkúa re, ɨvɨ kavía pe.

2Oikëse iɨvɨ jare opa güɨnoe ita omombo,

jare oñotɨ uva iɨ ikavigüe.

Jare jemitɨ mbɨte pe omopüa maeka ɨvate vae,

jare oyapo vi uva oitɨami pɨpe vaerä.

Chevɨa-ïru oäro tëi iuva iagüe jëe kavi vaerä,

ërei iuva iagüe jayasɨ yae chupe.

3Jayave uvarupa iya jei:

Añave, Jerusalén pegua reta, Judá pegua reta,

pere, ¿kia pa güɨnoi teko,

che pa ani cheuvarupa pa?

4¿Mbae ye ra ayapota tëi cheuvarupa pe?

¿Oime ra mbae oata ayapo vaerä chupe?

Che aäro tëi ia jëe vaerä,

ërei, ¿maera ra jayasɨ yae?

5Tamombeu peve,

mbae ko ayapota cheuvarupa pe vae:

Opata aekɨ chugüi ikësea, opa vaerä okañɨtei;

opata ayoka chugüi ikësea, opa vaerä opɨ̈ro jese vae;

6amombota aeya.

Ngaraa ma oitɨo vae jare ombokatu vae,

titɨnɨe yuu pe jare ñana pe.

Amapɨtu ave ayokuaita agüɨye vaerä omongɨ jese.

7Jókuae yandeYa Imbaepuere yae ete vae iuvarupa,

jae ko Israel iñemuña reta,

jare temitɨ ikavi vae, jae ko kuimbae Judá pegua reta.

YandeYa oäro tëi chugüi reta jupi vae,

ërei jeieteño ikavimbae,

oäro tëi chugüi reta jupi vae,

ërei jeieteño jäse oiporara vae reta.Jeko kavimbae reta iyemomburu

8¡Peparavete!, pe jekuae güɨrave pegua o peyeupe vae reta,

jare jekuae güɨrave pegua ko peyeupe vae reta,

opaetei ma pegua.

¿Peño pa pekɨ̈reɨ peiko kuae ɨvɨ pe?

9YandeYa Imbaepuere yae ete vae jei cheve,

kërai jeta o reta opɨtata ipombae;

yepe tëi tuicha jare ipöra,

mbaetɨta kia oiko vaerä pɨpe.

10Treinta tarea uva oñeotɨ vae güi, omeeta veintidó litroño vino,

jare payandepo urupuku temitɨ jäi oñeotɨ vae, omeeta metei urupukuño.

11¡Peparavete!, pe reta ndeimboveasɨ güive pepüa ye peyembosavaɨpo vaerä vae,

jare pepɨare katúi jökorai.

12Pearete pe oime arpa, ngitara, tambora, mimbɨ jare jeta vino;

ërei mbaetɨ pemae yandeYa oyapogüe re,

mbaetɨ pemae jembiapo reta re.

13Jáeramo, tëta chembae vae mbaetɨ oipota chekuaa vae jeko pegua oyererajaukata tembipɨɨrä.

Jare opaete vae reta, juvicha reta ndive,

yɨmbɨaɨ jare ɨuve opata oyuka.

14Jáeramo, omanogüe reta ñogüɨnoia oyembopɨguasuta,

iyuru tuicha opopirata mbaeporou rami,

omókoi vaerä tëta chembae vae jare juvicha reta,

jókuae kuimbae reta kau rupi yogüɨreko vae jare iyapirai pɨpe vae reta.

15Jare opaete kuimbae reta oñemomichiukata;

jare ipɨayemboete vae reta iñäkatindɨta opɨta.

16YandeYa Imbaepuere yae ete vae oyembotuichaukata iporojäa rupi;

Tumpa Iyoambae oechaukata iyoambae ko vae, jupi vae oyapogüe rupi.

17Jare tëta guasu reta oyemboaita vae

jendagüe rupi okaruta vecha jare kavara reta;

ketɨgua reta omboaita oikokatu vae reta iko.

18¡Peparavete!, pe reta peiko ikavimbae rupi vae,

apu rupi peru mbaeyoa peyeupe, kia omoata käretou vae rami.

19Pe reta pere: “Tumpa toyapo, jae oipota oyapo vae,

yaecha vaerä;

Israel pegua Tumpa Iyoambae toyapo jarembae pegua iyemongeta,

yaikuaa vaerä.”

20¡Peparavete, pe reta pere

ikavimbae pe “ikavi vae”,

jare ikavi vae pe pere “ikavimbae”;

tembipe peipoepɨ pɨtumimbi pe,

jare pɨtumimbi peipoepɨ tembipe pe;

iro vae peipoepɨ jëe vaerä,

jare jëe vae peipoepɨ iro vaerä!

21¡Peparavete!, pe reta peyererovia pearakuaa katu ko vae,

peyeupe oime penoi arakuaa katu.

22¡Peparavete!, pe reta perëia yae peu vaerä vino vae,

perëia yae pemboyea vaerä vino peyeupe.

23Peipɨɨ vɨari korepoti vae rupi mbaetɨ pemboeko, jeko tëi vae,

jare mbaetɨ peñono kavi teko, jekombae vae peguarä.

24Jáeramo, tata oapɨ kapii vae rami

jare ñana joogüe rami,

jökoraita opa pekañɨtei,

temitɨ japo opa ichuumbi vae

ipotɨ opa osururu vae ramita ko.

Echa peröɨro yandeYa Imbaepuere yae ete vae iñee,

jare Iyoambae Israel pegua iporookuai.

25Jáeramo, yandeYa iyarasɨ tëta imbae vae kotɨ,

jare omopüa ipo ikotɨ reta oinupa vaerä.

Ɨvɨtɨ reta okana,

jare tëogüe reta oyoa kaye rupi.

Ërei yandeYa iyarasɨ mbaetɨ iröɨsa;

oimeño ipo omopüa güɨnoiIs 9.12,17,21; 10.4. oporonupa vaerä.

26YandeYa omopüata metei bandera,

jare oenɨita itɨvɨñee pe metei tëta matɨ oï vae;

jare outa oväe jarembae pegua voi;

27mbaetɨta jae reta ipɨte pe metei ave ipɨtu vae ani ikangɨ vae,

mbaetɨta metei ave oke vae ani jopeɨ vae,

mbaetɨta metei ave ikuakuaa okúe güɨnoi vae,

ani ipɨapaa iïcha oso güɨnoi vae.

28Juvɨ reta jakuaroviasɨta,

igüɨrapa oñemoataasɨta,

ikavayu reta ipɨ ita ramita täta,

ikäretou reta iruera kusumirou ramita;

29yaguapope oñee rami, osapúkai retata,

yaguapope raɨ oñee rami,

ombokɨrɨrɨuta jäi oipɨɨ jembia vae rami,

güɨraja jare mbaetɨta kia ipuere opɨ̈ro chugüi rami.

30Jare ou oväe jókuae ara yave,

jókuae tëtaguasu jɨaputa ɨguasu rami

oporepeña Israel kotɨ;

jare kia omae yave Israel re

oechata pɨtumimbi oñova

amapɨtu pɨtumimbi vae.