OSEAS 7 - Guarani Bible with DC

1Israel pegua reta aipoano yave,

oyekuaa Efraín jare Samaria ikavimbae oyapo vae.

Echa iyapu reta; imonda vae rami oike reta o pe,

jare omaepɨ̈ro reta ikatu rupi.

2Mbaetɨ oyemongeta reta che

chemaendúa ko opaete ikavimbae oyapo reta vae re.

Añave ngaraa ma oyemboapeuka reta jembiapo reta pe,

ñogüɨnoi cheróvai jembiapo ikavimbae reta.

Mburuvicha reta oyapo ikavimbae

3Chembae vae reta oyapo ikavimbae vae rupi omboyerovia mburuvicha guasu,

jare iyapu reta rupi omboyerovia mburuvicha reta.

4Opaete jae reta iyaguasa pota vae ko;

horno oyeatapɨ vae rami

mbɨyape iyapoa oatapɨ oeya horno, ovu ramboeve mbɨyaperä vae.

5Yanderuvicha guasu iaño iara pe,

mburuvicha reta ombosavaɨpo juvicha guasu ivino pe.

¡Javoi mburuvicha guasu oñemoïru oporoyóyai yóyai vae reta ndive!

6Jakuvo yae,

horno jakuvo iyatapɨa pe rami,

horno oatapɨ vae oke pɨ̈tu yave,

ërei ndeimbove yave jekuaeño jaku rai.

7Opaete vae jakuvo, horno jaku yae rami,

opa omokañɨtei reta juvicha oporojäa vae reta.

Opaetei mburuvicha guasu reta ogüɨapi,

mbaetɨ etei chugüi reta kia yepe oyerure cheve.

Tëta opia iTumpa güi vae

8Efraín pegua reta oyea ïru tëta pegua reta ndive.

Efraín pegua reta mbɨyape ikupe jovaichoño oyɨ rami.

9Ketɨgua reta opa omboai chugüi imbaepuere,

ërei jae mbaetɨ oikuaa.

¡Iñäkatï ma, ërei jae mbaetɨ oikuaa!

10Israel pegua reta ipɨapochɨ;

jókuae jeko imiarita jese reta.

Jeseve, mbaetɨ oyerova jare mbaetɨ chereeka reta.

11Pɨkasu mbaetɨ arakuaa güɨnoi rami ko Efraín,

oiporu yemborɨ Egipto pe,

javoi oyemboya Asiria re.

12Ërei yogüɨraja yave jokotɨ,

amombota jese reta chepɨsa;

aitɨta güɨra reta oa pɨsa pe rami,

aipɨɨta iyoa reta jeko pegua.

13¡Atataɨ! ¡Maera pa ko opia reta chegüi!

Opata amokañɨtei reta,

echa oyembopɨapochɨ reta chekotɨ.

Che, chekɨ̈reɨ aepɨ reta,

ërei jae reta iyapu reve imiari chekotɨ.

14Jupa pe ñogüɨnoi yave mbaetɨ osapúkai ipɨa ndive,

trigo jare vino oata yave

osapúkai reta oyembopere reve.

¡Oyembopɨapochɨ reta chekotɨ!

15Yepe tëi che amboe reta

amee mbaepuere chupe reta,

ërei jae reta oyemongeta oyapo vaerä ikavimbae cheve.

16Mbaetɨ oyerova reta Tuichagüe yae ete vae kotɨ;

metei güɨrapa oyepoka vae mbaetɨ uvɨ omondo kavi rami.

Ipɨapochɨ reta jeko pegua juvicha reta opata okañɨtei ñeraro pe,

jare Egipto pe oyóyai retata.