1Kuae mbaembae reta jaɨkue rupi, Artajerjes oiko mburuvicha guasurä Persia pe yave, oiko metei kuimbae Esdras jee vae Seraías taɨ, Seraías jae ko Azarías taɨ, Azarías jae ko Hilcías taɨ,
2Hilcías jae ko Salum taɨ, Salum jae ko Sadoc taɨ, Sadoc jae ko Ahitob taɨ,
3Ahitob jae ko Amarías taɨ, Amarías jae ko Azarías taɨ, Azarías jae ko Meraiot taɨ,
4Meraiot jae ko Zeraías taɨ, Zeraías jae ko Uzi taɨ, Uzi jae ko Buqui taɨ,
5Buqui jae ko Abisúa taɨ, Abisúa jae ko Finees taɨ, Finees jae ko Eleazar taɨ jare Eleazar jae ko Aarón sacerdote tenondegua ete taɨ.
6Kuae Esdras ou ye Babilonia güi. Jae ko mborookuai re oporomboe vae, oikuaa yae jese, yandeYa, Israel iTumpa omee Moisés rupi vae; jare mburuvicha guasu omee chupe opaete mbae oiporu vae, iYa Tumpa omborɨ ramo.
7Jare jae ndive yogüeru amogüe Israel iñemuña sacerdote reta, levita reta, otairari vae reta, öke iyangarekoa reta, jare ïru tembiokuai reta oyeokuai tupao guasu pe vae, chiu añoa re ma Artajerjes oiko mburuvicha guasurä yave,
8ou oväe pandepoa yasɨ pe chiúa año re ma Artajerjes oiko mburuvicharä yave.
9Echa tenondegua ara tenondegua yasɨ pe omboɨpɨ oë reta Babilonia güi, jare tenondegua ara pandepoa yasɨ pe yogüeru oväe Jerusalén pe, Tumpa iporomborɨ rupi.
10Echa Esdras oñeñono opaete ipɨa ndive oyemboe kavi vaerä yandeYa iporookuai re, jae oyapo vaerä jare omboe vaerä Israel iñemuña reta jókuae mborookuai reta re.
11Jae kuae tembikuatía ïru mburuvicha guasu Artajerjes omee sacerdote Esdras pe. Esdras jae ko oporomboe vae oikuaa katu kavi yae mborookuai reta yandeYa omee Israel peguarä vae.
12“Artajerjes mburuvicha guasu reta juvicha guasu, oikuatía sacerdote Esdras pe, oporomboe vae oikuaa katu kavi yae Tumpa ara pe oï vae iporookuai re vae: Mbɨakatu toï nde ndive.
13Che amee kuae mborookuai opaete cheporookuaía pe yogüɨreko tëta Israel pegua vae reta güi, jare isacerdote reta güi, levita reta güi ikɨ̈reɨ ojo nde ndive Jerusalén pe vae, tojo.
14Echa mburuvicha guasu jare chiu imboarakuaa reta ko ndemondo remae vaerä neTumpa iporookuai ndepo pe renoi vae jei rami, ɨvɨ Judá pegua reta re jare Jerusalén pegua reta re.
15Jare reraja vaerä korepoti jare oro mburuvicha guasu jare imboarakuaa reta omee ipɨa-kɨ̈reɨ ngatu reve Israel iTumpa oiko Jerusalén pe vae pe,
16jökoraiño vi opaete korepoti jare oro oyemboatɨ ɨvɨ Babilonia pe vae, jare mbota reta kia ipɨa-kɨ̈reɨ ngatu reve omee vae, jare sacerdote reta vi omee iTumpa jo peguarä vae, Jerusalén pe oï vae.
17Jókuae korepoti pe reikuaa rupi kavi egua toro taɨrusu vae reta, vecha kuimbae reta, jare vecha kuimbae taɨrusu vae, jare mbota reta temitɨ jäɨgüe, jare mbota vino oyepɨyere vaerä vae, mɨmba oyeyukagüe oyeapɨ jese vae re peTumpa jo pe Jerusalén pe oï re vae.
18Jókuae korepoti jare oro jembɨregüe pe, peyapo neïru reta ndive jaekavita peve vae, peyapo peTumpa jemimbota rupi kavi.
19Tembiporu reta oñemee ndepo pe neTumpa jo peguarä vae, eraja eñono ye nde etei neTumpa jóvai Jerusalén pe.
20Oipotagüe mbae oatata Tumpa jo pe vae, emee mburuvicha guasu peguarä oyekovara vae güi.
21Che mburuvicha guasu Artajerjes, amee kuae mborookuai mbae iñovatúa reta ɨ̈aka Éufrates jovaicho pe yogüɨreko vae pe, kërai opaete mbae oiporu sacerdote Esdras Tumpa ara pe oï vae iporookuai re oporomboe vae yave, toñemee voi chupe.
22Pepuereño pemee tres mil tresciento kilo korepoti, veintidó mil litro trigo, dos mil dosciento litro vino, dos mil dosciento litro olivo iasaite, jare yukɨ oiporu rupi.
23Opaete mbae oiporu Tumpa ara pe oï vae jo peguarä vae toñemee voi chupe, agüɨye vaerä Tumpa iyarasɨ ou mburuvicha guasu iporookuaía re jare taɨ reta kotɨ.
24Jare romombeu vi peve agüɨye vaerä kia okovara mburuvicha peguarä sacerdote reta pe, levita reta pe, otairari vae reta pe, öke iyangarekoa reta pe, tupao guasu pe oyeokuai vae reta pe, ani ïru tembiokuai reta tupao pe oyeokuai vae reta pe.
25Jare nde Esdras, neTumpa omee arakuaa ndeve rupi kavi eñono mburuvicha reta oporojäa vae reta, tëta re oyangareko vae reta, omae vaerä ɨ̈aka Éufrates jovaicho kuaraɨ oikea kotɨ yogüɨreko vae reta re; eñono opaete neTumpa iporookuai oikuaa vae reta re, jare mbaetɨ oikuaa vae nde emboe.
26Jare kia nunga vae mbaetɨ oyapo mburuvicha guasu jare neTumpa iporookuai yave, toñejäauka voi jare jeko oï rupi tomano, ani toyemombouka, tombaemboepɨ, ani toñeñono tembɨpɨɨrɨru pe.”
Esdras imbaemboete27Jayave Esdras ombaemboete körai: “Toyemboete yandeYa, ñaneñemuñagüe reta iTumpa, jae oñono kuae yemongeta mburuvicha guasu ipɨa pe, oyemboete vaerä yandeYa jo Jerusalén pe oï vae.
28Mburuvicha guasu jare imboarakuaa reta, jare opaete tëta itenondegua reta ombopɨakatu cheve, jare che añemoäta ngatu yandeYa imbaepuere rupi, amboatɨ opaete Israel iñemuña itenondegua reta yogüeru vaerä che ndive.”
Who We AreWhat We EelieveWhat We Do
2025 by iamachristian.org,Inc All rights reserved.