1 SAMUEL 28 - Guarani Bible with DC

1Jare jókuae ara rupi mburuvicha filisteo reta omboatɨ isundaro reta oñeraro vaerä Israel iñemuña reta ndive, jare Aquis jei David pe:

—Nde jare nderupiegua kuimbae reta peikuaa kavi voi peï, peota che ndive ñeraroa pe vae.

2Jare David jei Aquis pe:

—Añave reechata che nderembiokuai chepuere ko mbae oyapo vae.

Jare Aquis jei David pe:

—Jáeramo che roñonota reiko avei vaerä cheangarekoa reta juvicharä.

Saúl jare kuña Endor pegua maratuta vae imombeúa

3Jókuae ara rupi Samuel mbaetɨve ma oiko, omano ma, jare opaete Israel iñemuña reta oäpiro jare oñotɨ reta jëta Ramá pe.

4Filisteo reta oyemboatɨ jare yogüeru oyembojeyupa Sunem pe; jare Saúl omboatɨ opaete Israel iñemuña reta, jare jae reta oyembojeyupa Gilboa pe.

5Ërei Saúl oecha yave filisteo reta jeyupa, ou okɨɨye yae ete.

6Jayave oparandu yandeYa pe; ërei yandeYa mbaetɨ omombeu chupe mbaɨu rupi, UrimNm 27.21. rupi, ani ñeemombeúa reta rupi ave.

7Jayave Saúl jei iyɨvɨrigua reta pe:

—Peeka cheve metei kuña güɨnoi mbaepuere oenɨi vaerä omanogüe jekove vae, che aja vaerä ípɨri jare jókuae kuña rupi aparandu vaerä.

Jare iyɨvɨrigua reta jei chupe:

—Endor pe oime metei kuña güɨnoi mbaepuere oenɨi vaerä omanogüe jekove vae.

8Jare Saúl oyemonde ambuaeyee, jare ojo mókoi kuimbae ndive pɨ̈tu yave jókuae kuña oïa pe, jare jei chupe:

—Romoñera reenɨi vaerä cheve omanogüe vae reta jekove, jare tou jókuae che amombeuta ndeve vae.

9Jayave jókuae kuña jei chupe:

—Reikuaa ko reï Saúl opa omombouka iɨvɨ güi, maratuta vae imombeúa reta jare omanogüe vae iä oenɨi vae reta. ¿Maera pa nekɨ̈reɨ chemoinge teko pe cheyukauka vaerä?

10Jayave Saúl jei chupe:

—YandeYa jee re tae ndeve, mbaetɨta maratu reiko kuae reyapota vae re.

11Jayave kuña jei:

—¿Kia pa reipota aenɨi ndeve?

Jare Saúl jei chupe:

—Eenɨi cheve Samuel.

12Jare jókuae kuña oecha Samuel yave jäse täta jare jei Saúl pe:

13—¿Maera pa chembotavɨ? ¡Nde yepe jae Saúl!

Ërei mburuvicha guasu jei chupe:

—Agüɨye ekɨɨye. ¿Mbae pa reecha?

—Aecha metei mbae iä oë ɨvɨ güi —jei jókuae kuña chupe.

14Jare Saúl oparandu:

—¿Kërai pa jókuae reecha vae?

—Aecha metei kuimbae indechi vae, jae oñeapeva metei ñeapevaka pe —jei kuña.

Jayave Saúl oikuaa jupivei Samuel ko vae, jare oyetavatɨka itindɨasɨ ɨvɨ re omboete reve.

15Jayave Samuel jei chupe:

—¿Maera pa chemoambeko jare chereenɨiuka?

Jare Saúl jei:

—Chepɨatɨtɨ yae aï, echa filisteo reta oporepeña ñogüɨnoi cheré, jare Tumpa osɨrɨ chegüi; mbaetɨ ye ma imiari che ndive, ñeemombeúa reta rupi ani mbaɨu reta rupi ave. Kuae jeko pegua ko roenɨi remombeu kavi vaerä cheve mbae ayapo vaerä.

16Jayave Samuel jei chupe:

—¿Maera pa jayave reparandu cheve, yandeYa ndereeya ma jare oyovaicho ma ndekotɨ reve?

17Oyapo ko ndeve, omombeu ndeve cherupi vae, yandeYa oekɨ mborookuaía ndepo güi jare omee neïru pe,1 S 15.28. David pe,

18echa nde mbaetɨ reyapo yandeYa jei vae, ndeokuai tëi yave reyuka vaerä Amalec1 S 15.3-9. iñemuña reta. Jáeramo yandeYa kuae oyapo ndeve.

19Jare yandeYa nemeeta Israel iñemuña reta nde ndive filisteo reta ipo pe, jare pɨareve nde nderaɨ reta ndive peïta che ndive. Jare omeeta vi sundaro Israel pegua reta filisteo reta ipo pe.

20Jayave Saúl opaetei jëogüe jare oa ɨvɨ re, echa okɨɨye yae Samuel omombeu chupe vae güi. Mbaetɨ ipɨ̈rata, echa jókuae ara jare jókuae pɨ̈tu mbaetɨ etei okaru.

21Jayave jókuae kuña oya katu Saúl re, oecha okɨɨye rai yae ramo jei chupe:

—Mase che nderembiokuai ayapo ma reiporu vae, añemoëgua ko mano pe jare aendu opaete ñee nde rere cheve vae.

22Añave romoñera nde vi reendu vaerä cheñee, taru ndeve tembíu rekaru vaerä, jare nepɨ̈rata vaerä guata pe.

23Saúl ñäteɨ okaru, ërei iyɨvɨrigua reta jare jókuae kuña omoñera okaru vaerä, jare ikɨ̈reɨ. Jare opüa ɨvɨ güi jare oguapɨ metei tupa pe.

24Jókuae kuña güɨnoi guaka raɨ ikɨra vae, javoi oyuka, jare vi oipɨɨ trigokúi, omómbɨu jare omboyɨ mbɨyape ovumbae vae.

25Jare oñono Saúl jóvai jare iyɨvɨrigua reta jóvai. Opa okaru reta yave opüa jare yogüɨraja jókuae pɨ̈tu voi.