JUECES 18 - Guarani Bible with DC

Micaía jare Dan iñemuña reta

1Jókuae ara rupi mbaetɨ vɨteri mburuvicha guasu Israel pe. DanJos 19.47. iñemuña reta mbaetɨ vɨteri vi güɨnoi ɨvɨ imbae ae, Israel iñemuña reta ipɨte pe. Jáeramo oeka yogüɨreko ɨvɨ pɨpe oñemoëta vaerä.

2Jáeramo Dan iñemuña reta güi omondo reta pandepo kuimbae jëia yae vae Zora jare Estaol güi, kuae reta yogüɨraja omae jare oikuaa kavi vaerä kërai ko jókuae ɨvɨ. Jei reta chupe: “Pekua peikuaa kavi ɨvɨ.” Jare jókuae pandepo vae reta yogüɨraja Efraín pegua ɨvɨtɨ pe jare yogüɨraja oväe Micaía jo pe, joko pe oke reta.

3Micaía jo güi köi ma yogüɨraja yave oikuaa reta jókuae kunumi levita iñee, jare yogüɨraja reta oparandu chupe:

—¿Kia pa ndereru kuae kotɨ? ¿Maera pa kuae pe reï? ¿Jare mbae pa reyapo kuae pe?

4Jare jókuae kunumi levita omombeu opaete Micaía oyapo chupe vae, jare oyapo isacerdoterä vae.

5Jayave jae reta jei chupe:

—Eparandu Tumpa pe, kuae royu rojo vae jaekavita ra oreve.

6Jare sacerdote levita jei chupe reta:

—Pekua pepɨakatu reve; yandeYa ko ojo perenonde peangareko vaerä peoa rupi.

7Jayave jókuae pandepo kuimbae vae reta opa oë yogüɨraja oväe tëta Lais pe. Jare oecha reta jókuae tëta pegua reta yogüɨreko pɨagüive Sidón pegua reta rami, oyepokuaa mbaetɨ kia omoambeko jare mbaetɨ mbae oata chupe reta. Mombɨrɨ yogüɨreko oyougüi Sidón pegua reta ndive jare mbaetɨ oñemoïru reta kia ndive ave.

8Jayave jókuae pandepo kuimbae yogüɨraja omae vae yogüeru ye Zora jare Estaol pe, jëtara reta ñogüɨnoia pe yave, oparandu reta chupe:

—¿Kërai pa peguata?

Jayave jae reta jei:

9—Rojo roguata jókuae ɨvɨ rupi, jare roecha jókuae ɨvɨ ikavi yae. ¡Pepüa! ¡Ñaporepeña jese! ¡Agüɨye pemaeiño peï, ikavi ko yaja ñapɨ̈ro jókuae ɨvɨ!

10Echa peo peväe joko pe yave peechata joko pegua reta yogüɨreko pɨagüive jare ɨvɨ tuicha vae, mbaetɨ etei mbae oata pɨpe. Tumpa omeeta jókuae ɨvɨ pepo pe.

11Jayave seisciento kuimbae Dan iñemuña pegua ñogüɨnoe Zora jare Estaol güi jembiporu ñeraro pegua reve reve,

12jare yogüɨraja oväe Judá pe, joko pe oyembojeyupa reta, Quiriat-jearim güi kuaraɨ oikea kotɨ, Dan Jeyupa ombojee reta añave regua vae pe.

13Joko güi yogüɨraja Efraín pegua ɨvɨtɨ pe, jare yogüɨraja oväe Micaía jo pe.

14Jayave jókuae pandepo yogüɨraja oikuaa ɨvɨ Lais vae reta jei jëtara reta pe:

—¿Peikuaa pa kuae pe oime mbae vae? Kuae pe oime temimonde iyɨvambae jare tumpa reta mbae iä oñeopa vae jare korepoti oyemondɨkuigüe pegua. ¿Peyemongeta kavi mbae peyapo vaerä?

15Jayave jókuae pandepo vae reta yogüɨraja kunumi levita pɨri Micaía jo pe, jare oparandu reta chupe kërai ra oï vae.

16Jare jókuae seisciento kuimbae Dan iñemuña pegua reta okätɨro öke pe jembiporu ñeraro pegua reve reve.

17Jare jókuae pandepo vae reta oike o pe jare oipɨɨ reta mbae iä oñeopa vae jare korepoti oyemondɨkuigüe pegua, jare temimonde iyɨvambae sacerdote imiari ramboeve öke pe jókuae seisciento kuimbae reta ndive.

18Sacerdote oecha yave jókuae pandepo vae reta oike Micaía jo pe jare güɨnoe mbae iä, temimonde iyɨvambae jare tumpa reta oñeopa vae jare oyemondɨkuigüe, jei chupe reta:

—¿Mbae pa peyapo peï?

19Jae reta jei chupe:

—¡Nekïrii, yaja orerupíe! ¡Roipota reiko vaerä oreve sacerdoterä jare eiko oreve oreru rami! ¿Jaekavi pa ndeve reiko vaerä metei kuimbae isacerdoteräño opaete Israel iñemuña reta güi, jae ko metei tëtara metei tu güi vae?

20Kuae ikavi sacerdote pe, jare oipɨɨ temimonde iyɨvambae jare tumpa reta mɨmba iä reta jare ojo Dan iñemuña reta jupíe.

21Jayave jae reta ogüeyɨ tape pe jare omboɨpɨ oguata, oñono reta tenonde michia reta, mɨmba reta jare opaete imbaembae güɨraja vae.

22Mombɨrɨ ma yogüɨraja Micaía jo güi yave, Micaía jare jo iyɨvɨrigua reta ndive oyomboatɨ jare oaɨkuemoña Dan iñemuña reta.

23Dan iñemuña reta oendu yave osapúkai chupe oaɨkuemoña vae reta, oyerova reta ye oparandu Micaía pe:

—¿Maratu pa reiko? ¿Maera pa pesapúkai mbatee oreve?

24Jare Micaía jei chupe reta:

—Pe reta peru peraja chegüi chetumpa reta, che ayapo vae, jare peraja vi chegüi chesacerdote, jare chereeya köraiño. Jare peparandu yeño cheve: ¿Maratu ra aiko vae?

25Ërei Dan iñemuña reta jei chupe:

—Agüɨye neñeeäta oreve, echa güɨramoi amogüe orepɨte güi iyarasɨ katu vae oñemopüata nderé, jare nemokañɨteita opaete nerëtara ndive.

26Micaía oecha jae reta jeta yae yave, oyerova ye ojo jëta kotɨ; jare Dan iñemuña reta yogüɨraja vi joko güi

27opaete Micaía oyapogüe ndive, jare isacerdote ndive yogüɨraja regua oväe Lais pe. Dan iñemuña reta opa oyuka kɨsepuku pe joko pe yogüɨreko pɨagüive vae reta jare opa oapɨ reta tëta guasu.

28Mbaetɨ kia oepɨ reta vaerä, echa mombɨrɨ ñogüɨnoi Sidón güi, mbaetɨ vi oñemoïru kia ndive. Kuae tëta guasu oï ɨvɨpe kavi Bet-rehob pe. Jaɨkue rupi Dan iñemuña reta omopüa pɨau ye jókuae tëta guasu jare opɨta oñemoëta joko pe.

29Jare ombojee Dan, iñemuñagüe jee pe, jae ko Israel taɨ; tenonde yave jee yepi kuae tëta guasu Lais.

30Joko pe Dan iñemuña reta oñono tumpa-raanga reta oñemopöra oyeapo vae omboete reta vaerä, jare isacerdote jae ko Jonatán, Gersón taɨ, Moisés jɨmɨmino. Jaɨkue rupi Jonatán iñemuña reta yogüɨreko Dan iñemuña reta isacerdoterä, oyererajauka reta regua tembipɨɨrä.

31Joko pe güɨreko reta tumpa-raanga reta Micaía oyapogüe, opaete ara Silo pe Tumpa jo oime reve.