ZACARÍAS 11 - Guarani Bible with DC

1¡Líbano, eipea neröke,

jare ndeɨvɨra ɨ̈vɨrare reta tomokañɨtei tata!

2¡Ɨvɨra pino jee vae, peyaeo,

echa ɨ̈vɨrare ikavi yae vae oyemboai ma!

¡Ɨvɨra reta encina jee vae Basán pegua, peräse peyaeo,

echa kaa tëɨ yae vae oyemboai!

3Maangarekoa reta, peräse peyaeo, echa oasa ete ikavi kapii vae oyemboai.

Oyeendu yaguapope ndeigüe iñee, echa Jordán pegua kaa tëɨ yae vae oyemboai.

Maangarekoa reta iyakɨ vae

4Körai jei cheYa Tumpa: “Eyangareko vecha reta oyereraja mbaeyukaa pe vae re,

5ogua vae reta oyuka oyemboekombae reve; jare omee vae reta jei: ‘¡Yasoropai cheYa, echa aikokatu ma!’ Iyangarekoa reta ave mbaetɨ mboroparareko güɨnoi jese.

6Jáeramo, ngaraa ye ma aiparareko kuae ɨvɨ pegua reta jei yandeYa: Echa ko che amee kuimbae reta iñeïru ipo pe, jare juvicha guasu ipo pe; omboai retata ɨvɨ, jare che ngaraa aepɨ chugüi reta.”

7Jare ayangareko vecha reta oyereraja mbaeyukaa pe vae re, kuae ko jae, paravete vae reta re. Aipɨɨ mókoi popoka: Metei ambojee “Ikavi vae” jare ïru “Maapɨtía”, jare ayangareko vecha reta re.

8Jare metei yasɨ pe mboapɨ maangarekoa amboai, echa mbaetɨ ma chepɨaguasu ikotɨ reta, chereröɨro reta jeko pegua.

9Jare jae chupe reta: “¡Mbaetɨta ma aiko peangarekoarä! ¡Omanota vae, tomano! ¡Okañɨta vae, tokañɨ! ¡Jembɨregüe, toyou!”

10Jayave aipɨɨ popoka “Ikavi vae” pe ambojee vae, jare aakɨo; jökorai amboai vaerä morogüɨrökuavee päve opaete vae ndive ayapo vae.

11Jare jókuae ara oyemboai, jökorai paravete vae reta omae cheré vae ou oikuaa yandeYa iñee ko.

12Jare jae chupe reta: “Jaekavi peve yave, pemboepɨ cheve cheparavɨkɨ jepɨ; jare mbaetɨ yave peeya jökoraiño.” Jare ojäa reta cheparavɨkɨ regua, omboepɨ reta cheve treinta reare korepoti pegua.

13YandeYa jei cheve: “Eñono korepoti rɨru tupao pegua pe jókuae korepoti, chemboepɨ kavi pɨpe vae.” Jare aipɨɨ jókuae treinta reare korepoti pegua añono korepoti rɨru tupao pegua pe.Mt 27.9-10.

14Aakɨo ye ïru popoka “Maapɨtía” pe ambojee vae, jökorai amboai vaerä Judá jare Israel güi metei rami yogüɨreko vae.

15YandeYa jei cheve: “Eyeapo maangarekoa iyakɨ vae rami.

16Echa che amopüa kuae ɨvɨ pe metei omaangareko vae mbaetɨta oeka okañɨgüe, mbaetɨta vi oeka ndeigüe ani oipoano ipere vae, ikangɨgüe ave mbaetɨta ovoɨ güɨraja, jaeño jouta ikɨra vae isoo jare ipɨ̈sagüe ave mbaetɨta oeya.Ez 34.2-4; Miq 3.1-7.

17¡Paravete maangarekoa iyakɨ vae, oeya mɨmba vae!Jn 10.12-13. ¡Kɨsepuku toekɨ iyɨva jare jesa iyakatu kotɨgua! ¡Totini iyɨva jare topɨta jesambae!”