1CheYa Tumpa,
mburuvicha guasu oyerovia ndembaepuere re,
¡oyerovia, echa remborɨ oporomoamɨri!
2Remee chupe ipɨa pe oipota vae,
neäteɨä remee chupe oiporu ndeve vae.
3Echa reë reövaiti ndeporerekua ikavi vae ndive,
äka-regua oro ikɨambae reñono iñäka re.
4Tekove oiporu ndeve jare remee chupe;
oikopuku vaerä jekuae avei pegua.
5Iyemboetea tuicha, ndeporomborɨ rupi,
remee chupe oyemboeteuka yae vaerä.
6Echa ndeporerekua jese jekuae avei pegua,
remboyerovia, echa reï jae ndive.
7Echa mburuvicha guasu oyeko yandeYa reño,
Tuichagüe yae ete vae iporoparareko rupi ngaraa kia ipuere jese.
8Ndembaepuere oupitɨta opaete nderovaicho reta;
ndepo ndeakatu kotɨgua oupitɨta nemotareɨ vae reta.
9Horno jaku yae vae rami reñonota ndearasɨ iara pe.
Ndearasɨ pe remboaita, tata pe remokañɨteita.
10Taɨ reta remokañɨteita ɨvɨ güi,
jare iñemuña reta kuimbae reta ipɨte güi.
11Echa oipota tëi oyapo reta ikavimbae vae ndeve,
oyomboemboe reta, ërei ngaraa ipuere reta.
12Nde rembotekuarai retata,
nderuvɨ rejäata ikotɨ reta.
13¡Emboyekuaa ndembaepuere cheYa Tumpa!
¡Rotairarita jare romboeteta reporomoamɨri vae!
Who We AreWhat We EelieveWhat We Do
2025 by iamachristian.org,Inc All rights reserved.
