1Cheraɨ, reipota reyeokuai Tumpa pe yave,
eyeapokatu ñejäa peguarä.
2Emopɨ̈rata ndeyemongeta jare eyembokuimbae,
agüɨye vaerä rekɨɨye reo reväe.
3Egüɨ̈rakua Tumpa re jare agüɨye esɨrɨ chugüi;
jare jökorai iyapɨ pe reiko kavita ko.
4Eipɨɨ opaete mbae ou ndeve vae,
jare eyembopɨaguasu tembiporara ou nderupi yave.
5Echa oro añete vae oñejäata ko tata pe,
jare kuimbae reta añetete vae oñejäata tembiporara tätagüe vae pe.
6Erovia Tumpa re, jare jae ndemborɨta ko;
eiko jupi rupi jare eäro jese.
7Pe reta, Tumpa re pemboete vae, perovia iporoparareko re;
jare agüɨye pepia tape isɨmbi vae güi, agüɨye vaerä peropa.
8Tumpa omboete vae reta, togüɨrovia jese,
jare ngaraa opɨta reta mbae jekovia mbae chupe.
9Tumpa omboete vae reta, oäro oiko kavi vaerä,
yerovia opambae vae jare Tumpa iporoaɨu.
10Pemae mbae oiko ara oasagüe rupi vae re:
Mbaetɨ ko kia Tumpa re güɨrovia vae yaecha oyembotavɨ vae;
mbaetɨ ko yaecha kia jupi rupi ombaemboete vae oyemombo vae;
opaete oyerure chupe vae reta pe, jae oendu ko.
11Echa Tumpa ipɨatäta ko jare iporoparareko,
omboai mbaeyoa reta jare omboasa mbɨatɨtɨ iara yave.
12Ërei, ¡atataɨ pea okɨɨye vae reta jare iyakɨ vae reta!
¡Atataɨ pea mbaeyoa pe oiko vae reta mókoi teko yogüɨreko vae!
13¡Atataɨ pea ipɨatäta mbae vae reta, jare iporogüɨrovia mbae vae!
¡Tumpa oepɨ retata ra!
14¡Atataɨ pea jösa mbae mbɨaguasu ndive vae reta!
¿Këraita pa yogüɨreko Tumpa ojäa reta yave?
15Tumpa omboete vae reta oyapo ko jae iporookuai;
jókuae jae jembiaɨu reta oyapo ko jae oipotagüe.
16Tumpa omboete vae reta oeka ko oyapo vaerä jae omboyerovia vae;
jókuae jembiaɨu vae reta oyapo ko ikɨ̈reɨ reve kavi iporookuai.
17Tumpa omboete vae reta oïndaivi ko
oñemomichi vaerä jae jóvai.
18Ñañeñono Tumpa ipo pe,
agüɨye yaiko kuimbae reta ipo pe;
echa Tumpa iporoaɨu
oyovake ko jae tuicha rami.
Who We AreWhat We EelieveWhat We Do
2025 by iamachristian.org,Inc All rights reserved.
