ÉXODO 14 - Guarani Bible with DC

Israel iñemuña reta oasa Ɨguasu Pɨ̈ta vae

1YandeYa jei Moisés pe:

2“Ere Israel iñemuña reta pe toyembojeyupa Pi-hahirot jóvai, Migdol jare ɨguasu ipäu pe, Baal-zefón jóvai, kuae reta jóvai toyembojeyupa reta, ɨguasu jembeɨ pe.

3Faraón oyemongeta vaerä Israel iñemuña reta kotɨ körai: ‘Israel iñemuña reta jopa ñogüɨnoi kuae ɨvɨ rupi, ñuu ombojopa reta güɨnoi.’

4Jare che amotätata Faraón ipɨa, peraɨkuemoña vaerä; jare ayemboeteukata Faraón rupi jare opaete isundaro reta rupi, jare oikuaata Egiptoɨgua reta che ko jae peYa vae.”

Jare jae reta jökorai oyapo.

5Jare Faraón mburuvicha guasu Egipto pegua pe jërakua Israel iñemuña reta opa ko otekuarai; jayave jae jare imborɨa reta ipɨa oyepoepɨ Israel iñemuña reta kotɨ, jare jei reta: “¿Maera ra yayapo kuae, ñamaeño opa yogüɨraja oyeokuai vaerägüe yandeve reta?”

6Jupiveiño Faraón oñono kaviuka ikäretou, jare opa güɨraja jupíe isundaro reta.

7Güɨraja seisciento käretou ikavigüe, jare opaete käretou Egipto pegua reta, jare sundaro ruvicha reta pɨpe päve päve.

8YandeYa omotäta Faraón mburuvicha guasu Egipto pegua ipɨa, jare oaɨkuemoña Israel iñemuña reta; ërei Israel iñemuña reta mbaepuere yae ete rupi ko ñogüɨnoe yogüɨraja.

9Faraón jare Egiptoɨgua reta oaɨkuemoña opaete sundaro reta ndive: Kavayu regua reta, jare käretou pegua reta ndive; jare oupitɨ reta ɨguasu jembeɨ pe oyembojeyupa ñogüɨnoia pe, Pi-hahirot iyɨpɨ pe, Baal-zefón jóvai.

10Jare Faraón köi ma ou chugüi reta yave, Israel iñemuña reta omopüa iñäka, jare oecha Egiptoɨgua reta yogüeru jaɨkue yave okɨɨye yae ete reta, jare jäse reve oyerure reta yandeYa pe.

11Jei reta Moisés pe:

—¿Mbaetɨ pa tɨvɨa renda Egipto pe orerenoe vaerä opa romano ñuu rupi? ¿Maera pa körai oreapo, opa orerenoe Egipto güi?

12¿Kuae reä pa roe tëi ndeve Egipto pe: “Emaeño toroyeokuai Egiptoɨgua reta pe? ¡Echa ikaviño ko royeokuai vaerä Egiptoɨgua reta pe, kuae ñuu rupi romano vae güi!”

13Jare Moisés jei chupe reta:

—Agüɨye pekɨɨye, peyemboɨ täta, jare pemae añave yandeYa pereepɨta vae re; echa Egiptoɨgua reta añave peecha vae ngaraa ye ma peecha.

14YandeYa ko oñerarota pepoepɨka pe, jare pe reta mbaetɨta peyemoambeko.

15Jayave yandeYa jei Moisés pe:

—¿Maera pa peeka yemborɨ cheve? Ere Israel iñemuña reta pe toguata.

16Eupi ndepopoka jare eropövee ɨguasu re, jare emboyao, jare toike Israel iñemuña reta jókuae ɨguasu ipäu rupi, ɨvɨ otini vae rupi.

17Jare che amotätata Egiptoɨgua reta ipɨa, peraɨkuemoña vaerä; ayemboeteukata Faraón maratuta oasa vae rupi, opaete isundaro reta kavayu regua reta rupi, jare käretou reta ñeraro pegua rupi vi;

18Egiptoɨgua reta oikuaa vaerä che ko jae peYa, ayemboeteuka yave Faraón rupi, isundaro kavayu regua reta rupi jare opaete ikäretou maratuta oasa vae rupi.

19Jare Tumpa iaraɨgua ojo oiko Israel iñemuña reta jenonde vae, osɨrɨ, jare ou oñeñono jae reta jaɨkue kotɨ; jaeramiño vi amapɨtu metei jɨsɨ ojo oiko jae reta jenonde vae osɨrɨ vi, jare ou oñeñono jae reta ikupe kotɨ,

20jare oñeñono Egiptoɨgua reta jare Israel iñemuña reta ipäu pe; Egiptoɨgua reta pe amapɨtu ombopɨtumimbi, ërei Israel iñemuña reta pe omboesape pɨ̈tu yave; jáeramo jókuae pɨ̈tu Egiptoɨgua reta mbaetɨ ipuere oupitɨ Israel iñemuña reta.

21Jayave Moisés güɨropövee ipopoka ɨguasu re, jare jókuae pɨ̈tuSal 77.16-20. yandeYa ombou ɨvɨtu täta yae vae kuaraɨ oëa kotɨ güi ombosɨrɨ vaerä ɨ oyougüi jare otini, jökorai ɨ oyemboyao opɨta.

22Jare Israel iñemuña reta1 Co 10.1-2; Heb 11.29. oike ɨguasu ipäu otinía rupi, jare ɨ opüa ovapetea rami jae reta iyakatu kotɨ jare iyasu kotɨ.

23Jare Egiptoɨgua reta oaɨkuemoña ɨguasu mbɨte kotɨ, opaete Faraón isundaro kavayu regua reta, jare käretou pegua reta.

24Jare köe ma ou yave yandeYa omae Egiptoɨgua reta kotɨ jókuae amapɨtu güi, metei jɨsɨ tata vae güi, jare ombopɨajopa Egiptoɨgua reta,

25jare opa vi güɨrokomegua ikäretou reta iruera, jare opa ombopɨa-këraiasɨ. Jayave Egiptoɨgua reta jei oyoupe:

—Yatekuarai kuae Israel iñemuña reta güi, echa iYa Tumpa oñeraro jae reta jekovia pe yandekotɨ.

26Jayave yandeYa jei Moisés pe:

—Emopüa ndepopoka ɨguasu re, ɨ opa ye vaerä ou jenda pe, oyasoi vaerä Egiptoɨgua reta, käretou pegua reta jare opaete sundaro kavayu regua reta.

27Jayave Moisés omopüa ipopoka ɨguasu re, jare köe ma ou yave ɨguasu täta yae rupi ou ye opa oyea, jare Egiptoɨgua reta otekuarai pota tëi yave oñoövaiti reta ɨguasu ndive; jökorai yandeYa opa oyuka Egiptoɨgua reta ɨguasu mbɨte pe.

28Jare ɨ opa ye oyea, jare opa oyasoi käretou reta, sundaro kavayu regua reta; opaete Faraón isundaro reta oike oaɨkuemoña ɨguasu ipäu rupi vae reta, mbaetɨ etei metei ave omomara.

29Israel iñemuña reta yogüɨraja ɨguasu ipäu otinía rupi; jare ɨ opüa ovapetea rami jae reta iyakatu kotɨ jare iyasu kotɨ.

30Jökorai jókuae ara yandeYa güɨroasayepe Israel iñemuña reta Egiptoɨgua reta güi; jare Israel iñemuña reta oecha Egiptoɨgua reta jëogüegüe ɨguasu jembeɨ rupi.

31Jare Israel iñemuña reta oecha jókuae mɨakañɨ tuicha yae yandeYa oyapo Egiptoɨgua reta kotɨ vae; jayave jae reta oipoɨu yandeYa güi, jare güɨrovia reta yandeYa re jare jembiokuai Moisés re.