JOB 20 - Guarani Bible with DC

Zofar imiari jeko pɨ̈chɨi vae oiporara vae re

1Zofar Naamat pegua jei ye Job pe:

2Rere vae chemboyemongeta jare aropɨa guasuä,

jáeramo aipota amoë cheñee.

3Ñee remboeta vae pe rere cheve jasɨ katu vae,

ërei che aikuaa kërai jaeta ndeve vae.

4¿Mbaetɨ pa reikuaa jökorai avei vae?

Kuimbae oiko güive ɨvɨ pe:

5Iyoa vae reta iyerovia mbaetɨ ɨma oiko,

oyerovia michi peguaño.

6Yepe tëi ara oupitɨ,

jare iñäka oupitɨ amapɨtu reta.

7Jepoti rami, opata ko jekuae avei pegua,

oecha vae reta jeita: “¿Ketɨ pa oime?”

8Okañɨta mbaɨu ramiño, mbaetɨta kia oväe,

ipaɨu pe mbae oecha vae ramiñota.

9Oecha vae, ngaraa ye ma ipuere oecha,

ani jëta pegua reta ave, ngaraa ma oecha ye.

10Taɨ reta oekata mboroparareko paravete vae reta pe,

tu oñomigüe, taɨ reta güeru yeta iya reta pe.

11Taɨrusu jare oikove katu reve,

omano retata.

12Ikavimbae ipöra yae chupe,

omomora yae imiari pɨpe.

13Iyuru pe güɨreko jókuae omomora vae,

mbegüe pe jou güɨreko.

14Ërei jaɨkue rupi, jɨe pe,

oyepoepɨ chupe mboi imbayachi rami.

15Omogüëe mbaeyekou omokoigüe,

Tumpa güɨnoe jɨe güi.

16Oipɨte oiko mboi imbayachi,

jare jókuae mbayachi oyukata ko.

17Mbaetɨta oecha ei jare neche

ɨ rami osɨrɨ ɨ̈aka rupi vae.

18Opaete güɨnoigüe, omboekovia yeta iya reta pe,

mbaetɨta oyekou jókuae mbaeyekou re.

19Ipogüɨrai oeya paravete vae reta,

opɨ̈ro o mbaetɨ jae omopüa vae.

20Jáeramo, mbaetɨ yangapɨɨ opɨta mbae re,

ngaraa vi güɨroasayepe oipota rai vae.

21Mbaetɨ etei mbae ojoyepe chugüi,

jáeramo mbaetɨta oiko kavi avei,

22jeta mbae güɨnoi pɨte pe, mbaetɨta ovɨakatu,

jeko pɨ̈chɨi vae reta opüata jese.

23Oñemoɨ̈vɨata oï ramboeve,

Tumpa oitɨta iyarasɨ jese;

iyarasɨ ombouta jese jare jembíu re.

24Otekuarai tëi tembiporu jiero pegua ñeraro pegua güi yave,

uvɨ jiero iyu vae pegua pe oñɨvo retata.

25Uvɨ oëta ojo ikupe kotɨ,

juvɨ jakua jembipe vae oipɨarasa etei.

Okɨɨye yaeta.

26Opaete mbaesusere oñeñovatu oï chupe,

Tumpa opata omokañɨ tata pe,

omokañɨteita opaete jo pe jembɨregüe.

27Ara omboyekuaata chupe iyoa,

jare ɨvɨ opüata jese.

28Jo pegua mbaembae reta opata oyereraja,

opata oñemoai moai Tumpa iyarasɨ iara pe.

29Jae ko kuae Tumpa omokätɨro iyoa vae pe vae;

chupeguarä jei kuaekuae.