ESTER 3 - Guarani Bible with DC

Amán oeka kërai opa vaerä omokañɨtei Judáɨgua reta

1Kuaekuae reta jaɨkue rupi mburuvicha guasu Asuero ombotuicha yae Amán, Hamedata taɨ Agag iñemuña pegua, jare omee oiko vaerä opaete mburuvicha reta itenondeguarä.

2Jare opaete oyeokuai mburuvicha guasu pe vae öke rupi ñogüɨnoi vae, oyetavatɨka itindɨasɨ reve Amán oasa yave; echa jökorai mburuvicha guasu oyókuai reta, ërei Mardoqueo mbaetɨ ave oyetavatɨka ani oñemomichi yepe.

3Jare öke pe mburuvicha guasu jembiokuai reta ñogüɨnoi vae oparandu Mardoqueo pe:

—¿Maera pa mburuvicha guasu iporookuai mbaetɨ reyapo?

4Ara ñavo oparandu reta chupe, ërei jae mbaetɨ oyeapɨsaka jese reta, jáeramo oñeapo reta jese Amán pe, oikuaa reta vaerä jökoraiñota ra oiko vae; echa jae oyekuaauka ma chupe reta, Judáɨgua ko vae.

5Jare Amán oasa Mardoqueo jóvai rupi yave, oecha mbaetɨ oyetavatɨka ani oñemomichi chupe ramo iyarasɨ yae.

6Ërei mbaetɨ oipota oiporarauka Mardoqueo peño, echa oyekuaauka ma chupe reta kiaɨgua ko jae vae; jare Amán oeka kërai opa vaerä omokañɨtei Mardoqueo jëtara Judáɨgua reta, Asuero iporookuaía pe ñogüɨnoi vae.

Mborookuai Judáɨgua reta okañɨtei vaerä

7Tenondegua yasɨ pe, jae ko yasɨ Nisán, Asuero doce año ma oiko mburuvicha guasurä yave, oyeapo suerte

8Jare Amán jei mburuvicha guasu Asuero pe:

—Oime metei tëtaɨgua reta oñemoai ñogüɨnoi opaete tëta reta ndembaepuere pe oï vae rupi, jare mborookuai jae reta güɨnoi vae ambuaeyee ko opaete vae güi, jare mbaetɨ omboete reta ndeporookuai, mbaetɨ jaekavi remaeño vaerä oikove reta.

9Jáeramo nde cheruvicha guasu jaekavi ko ndeve yave, emee mborookuai opa vaerä oñemokañɨtei; jare che tajäa tamee tresciento treinta mil kilo korepoti, ndeveguarä okovara vae reta pe, oñovatu vaerä ndeve.

10Jayave mburuvicha guasu oekɨ ipoäka güi moäka-vera mborookuai pegua jare omee Amán, Hamedata taɨ pe, jae ko Agag iñemuña pegua, Judáɨgua reta re oyemboyovaicho vae.

11Jare jei chupe:

—Jókuae korepoti remombeu vae toiko ndembaerä, jaeramiño vi jókuae tëta, eyapo chupe ndepɨapotaa.

12Jayave oenɨi mburuvicha guasu pe ombaekuatía vae reta, tenondegua yasɨ ara trecea pe, jare oikuatía reta Amán oyókuai rami, ɨvɨ re oyangareko mburuvicha guasu pe vae reta pe, sundaro ruvicha reta ñogüɨnoi ɨvɨ ñavo rupi vae pe, jare tëta ruvicha ñavo pe; tëta ñavo imbaekuatía ae rupi jare iñee ae pe; mburuvicha guasu Asuero jee re oyekuatía, jare ipoäka-vera omboyeɨ jese oñemoañete vaerä.

13Jare omondo reta tupapire, jerajaa reta ndive opaete tëta reta mburuvicha guasu iporookuaía pegua pe, pɨpe oyókuai opaetei vaerä oyuka jare omokañɨtei opaete Judáɨgua reta jókuae ara voi: Taɨrusu reta, ndechi reta, michia reta jare kuña reta yasɨ Adar pe, jae ko yasɨ docea ara trece pe, oyemombae reve imbaembaegüe reta re.

14Jókuae mborookuai oyekuatía oyemondo ɨvɨ ñavo peguarä vae, oñemoërakua opaete tëta reta rupi, oyupavo kavi ñogüɨnoi vaerä jókuae ara peguarä.

15Jare tupapire jerajaa reta oë aramoete pegua mburuvicha guasu iporookuai jei rami, kuae mborookuai oñemee Susa pe, kuae tëta güi mburuvicha reta oporookuai. Jare mburuvicha guasu okau Amán ndive ramboeve Susa pegua reta ipɨa kaviä yae ñogüɨnoi.