ECLESIÁSTICO 3 - Guarani Bible with DC

Mborookuai yanderu reta pegua

1Cheraɨ reta, peyeapɨsaka cheré, che ko jae peru;

pekua che jaegüe rupi jare peasayepeta ko.

2Tumpa oipota ko ñemuña imichia reta omboete vae,

jare ichɨ iporookuai tomboete reta vi.

3Kia ñavo tu omboete vae omboaiukata ko imbaeyoa reta,

4jare ichɨ omboete vae omboatɨ ko mbaeyekou tuicha vae.

5Kia ñavo tu omboete vae taɨ reta oyeroviata ko jese;

oyerure yave, Tumpa oenduta ko chupe.

6Kia ñavo tu omboete vae oikopukuta ko;

jare kia ichɨ omboete vae Tumpa omboekopota ko,

7echa osɨi katu tu reta pe jae iya rami oyapo reta.

8Cheraɨ, emboete nderu tembiapo reta rupi jare ñee reta rupi,

jare jökorai renoita oipotagüe rupi mbaeyekou reta.

9Echa yanderu imbaeyekou ko omee oñoëtara vae reta ipɨ̈rata yogüɨreko vaerä,

ërei yandesɨ imbaeyavɨ oapomondorota ko.

10Agüɨye eyembotuicha reecha nderu oï ñemomarai pe yave,

echa jókuae yemboeteä ko ndevegua.

11Metei yanderaɨ oporomboete yave, tu iporomboete güi ko;

ërei ngatu, kia ichɨ güɨnoti vae oasa ete ko imbaeyoa.

12Cheraɨ, epoko emboete nderu;

agüɨye eeya oikoño oiko ramboeve.

13Yepe iyarakuaa pe ipɨtu ma, ndepɨakúe katu eiko jae ndive;

agüɨye emomarai oikoño oiko ramboeve.

14Yomborɨ ñamee yanderu pe vae jae ko metei mbae ngaraa ye ñaneakañɨ chugüi vae;

yandeyoa yamboepɨ ñaï rami ko.

15Mbɨatɨtɨ pe reï yave, Tumpa imaenduata ko nderé

jare iñɨ̈rota ndeve ndembaeyoa reta re;

kuaraɨ jakugüe iroɨ omondɨkui rami.

16Kia tu omombo vae oyovaicho ko Tumpa kotɨ,

jare kia ichɨ omboarasɨuka vae Tumpa oyepopeyuta ko jese.

Ñemomichi

17Cheraɨ, eñemomichi eiko opaete mbae reyapo vae rupi,

jaema tätata ko nderaɨu vae pea jeta rupi oporombopota oiko vae güi.

18Ndetuicha katu ete ma yave, ma jeiete eñemomichi

jökorai remboyeroviata Tumpa.

20Echa tuicha yae ko Tumpa iporoparareko,

jare jae oikuaauka paravete vae reta pe oikuakugüe reta.

21Agüɨye eka neïrurä kia oasa ete oyembotuicha vae,

jare agüɨye eparandu mbae oasa ete yavai vae re.

22Ërei eeka reikuaa kavi vaerä Tumpa ndeokuaigüe re,

jare agüɨye eyemoambeko mbae oñeomi oï vae re.

23Agüɨye eñemokïiriä mbae oasa nderupi vae re,

echa mbae reechagüe jaekaviño ma ko ndevegua.

24Jeta ko oyembotavɨ iyemongeta ae pe vae,

jaema yemongeta raanga reta omboyoavɨ ma jae iyemongeta.

26Kia ipɨapochɨ vae, kuri ngaraa ma ko ikavi,

jare kia susere oaɨu vae, pɨpe ko okañɨteita.

27Kia ipɨapochɨ vae oime oäro güɨnoi tembiporara tuicha vae,

jare imbaeyoa oiko vae má jeiete ko omboatɨ mbaeyoa reta.

28Iyaguara oiko vae isusere mbaetɨ ko ipöa,

echa jae ko ɨvɨra kavi mbae jokɨgüe ko.

29Iyarakuaa vae oikuaa ko ïru iyarakuaa vae reta iporomboarakuaa;

jaema kia ñavo oyeapɨsaka kavi jese vae oyekou ko arakuaa re.

Oikoyepe oiko vae oyemborɨ vae

30Ɨ ombogüeta ko tata jendɨ vae,

jare mbae ñamee oyerure vae pe vae omeeta mbaeyoa reta opa vaerä oyemboai.

31Kia ipɨakavi vae re kuri imaenduata ko vae;

resɨrɨrɨ yave, reväeta ko kia ndeoko vaerä.