GÉNESIS 48 - Guarani Bible with DC

Jacob jei ñee kavi Efraín jare Manasés kotɨ

1Oasa güire kuae mbaembae, omombeu reta José pe tu imbaerasɨ oï vae. Jayave jae güɨraja mókoi reve taɨ reta, Manasés jare Efraín.

2Jare Jacob pe omombeu reta taɨ José oime ou omae jese vae yave, jae oñemomɨ̈rata jare opüa oguapɨ jupa pe.

3Jare jei José pe:

—Tumpa Imbaepuere yae ete vae oyekuaa cheve tëta Luz jee vae pe, ɨvɨ Canaán pe, jare iporerekua cheré.

4Jei cheve: “Mase, che rombotuichata, rombojetata, roñonota tëtaguasu reta iyɨpɨrä; jare kuae ɨvɨGn 28.13-14. ameeta neñemuña reta nderaɨkue rupigua reta pe jekuae avei pegua.”

5Añave, kuae mókoi nderaɨ reta, Efraín jare Manasés ɨvɨ Egipto pe oa ndeve vae reta; ndei ayu ɨvɨ Egipto pe ndépɨri mbove oa ndeve vae reta chembae ko; cheraɨ Rubén jare Simeón rami.

6Jaɨkue rupi oa vae reta ramo toyogüɨreko ndembaerä; tɨkeɨ reta jee re, toñogüɨnoi mbae iyarä.

7Echa che ayu aiko Padan-aram güi yave, ndesɨ Raquel omano chegüi tape rupi, Efrata kotɨ ojo vae pe, jae ko Belén,Gn 35.16-19. joko pe añotɨ.

8Israel oecha José taɨ reta mókoi reve, jare jei:

—¿Kia pa kuae reta?

9Jare José jei tu pe:

—Jae ko cheraɨ reta, Tumpa omee cheve kuae pe vae.

Jayave tu jei:

—Eroya katu cheré amee vaerä ñee kavi chupe reta.

10Jare Israel indechi yae jare jesa ogüe ma, mbaetɨ ma ipuere oecha kavi. Jare José güɨroya katu jese jare jae oovapɨte jare oiküava.

11Jare Israel jei José pe:

—Cheyemongeta pe ko mbaetɨta ma aecha nderova, ërei Tumpa omee aecha vaerä vi neñemuña.

12Jayave José oekɨ imichia reta tu jäpapau güi jare itindɨasɨ ɨvɨ re.

13Javoi oipɨɨ mókoi reve taɨ, Efraín iyakatu kotɨ, Israel iyasu kotɨ, jare Manasés iyasu kotɨ Israel iyakatu kotɨ; jare güɨroya katu jese.

14Ërei jae oñono ipo iyakatu Efraín iñäka re, taɨkuegua re; jare ipo iyasu kotɨgua oñono Manasés iñäka re. Jökorai omboyoasa iyɨva, yepe tëi Manasés tenondegua ko.

15Jare körai jei ñee kavi José kotɨ:

“Tumpa, jae jemimbota rupi oguata cheramɨi Abraham jare cheru Isaac vae.

Jae cheangareko aiko güive añave regua.

16Araɨgua chereroasayepe opaete ikavimbae güi vae,

tiporerekua kuae kunumi reta re.

Kuae reta rupi toiko avei cheree, jare cheru Isaac jee, jare Abraham jee,

jare toñemuña reta jeta yeyé kuae ɨvɨ pe.”

17Ërei José oecha ramboeve tu ipo iyakatu kotɨgua oñono Efraín iñäka re yave, mbaetɨ ipöra chupe; jare oipɨɨ tu ipo ombosɨrɨ vaerä Efraín iñäka güi oñono Manasés iñäka re.

18José jei tu pe:

—¡Cheru, agüɨye jökorai! Kuae ko jae tenondegua, jese eñono ndepo akatu.

19Ërei ngatu tu mbaetɨ oipota, jare jei:

—¡Aikuaa ko cheraɨ! ¡Che aikuaa ko! Jae oikota vi ko tëta tuicha yae vaerä; ërei ngatu tɨvɨ ko tuicha yae eteta chugüi, iñemuña reta omopüata jeta tëtaguasu reta.

20Jökorai Jacob jei ye ñee kaviHeb 11.21. ikotɨ reta jókuae ara:

—Opaete vae Israel iñemuña oiporuta peree reta, jare jeita: “Tumpa toyapo nde ndive Efraín jare Manasés pe rami.”

Jare Efraín ombotenonde Manasés güi.

21Jare Israel jei José pe:

—Mase, che jaema amanota, ërei Tumpa oïta pe ndive, jae pereroyerova yeta ñaneñemuñagüe reta iɨvɨ pe.

22Jare tuicha amee ndeve nderɨkeɨ reta güi, amee ndeve Siquem, ñoraro pe apɨ̈ro amorreo reta güi vae.