1 REYES 16 - Guarani Bible with DC

1Jayave yandeYa jei Jehú, Hanani taɨ pe, jei vaerä Baasa kotɨ körai:

2“Che ko romopüa ɨvɨkúi güi jare roñono tëta chembae Israel juvicharä. Ërei nde, remomoe Jeroboam jeko, Israel pe reyapouka mbaeyoa. Chemboarasɨuka mbaeyoa reyapo vae pe.

3Jáeramo, Baasa, toromokañɨtei opaete ñemuña ndive; Jeroboam, Nabat taɨ pe ayapo rami tayapo vi ndeve.

4Oipotagüe neñemuña omano tëta guasu pe vae yaɨmba reta jouta, jare kaa pe omano vae uruapúa reta jouta.”

5Ïru mbaembae Baasa oyapogüe, jare opaete imbaepuere regua, oyekuatía oï tembikuatía pe, Israel pegua mburuvicha guasu reta regua oyekuatía oïa pe.

6Baasa omano yave, oñotɨ reta Tirsa pe. Jare taɨ Ela oguapɨ jekovia pe mburuvicha guasurä.

7Ñeemombeúa Jehú, Hanani taɨ rupi, yandeYa jei Baasa kotɨ jare opaete iñemuña reta kotɨ, ikavimbae oyapo yandeYa jesa róvai jeko pegua; echa omboarasɨuka ikavimbae oyapo Jeroboam jare opaete iñemuña reta rami, jókuae jae opa omokañɨtei vae reta.

Ela jare Zimri yogüɨreko Israel pe

8Asa mburuvicha guasu Judá pegua, veintisei año ma oiko mburuvicha guasurä yave, Ela, Baasa taɨ omboɨpɨ oï mburuvicha guasurä Tirsa pe Israel re, jare mókoi año oiko mburuvicha guasurä,

9ërei Zimri, Ela ikäretou ñeraro pegua reta oyemboyao mbɨte rupi vae juvicha oñemopüa jese, Tirsa pe okau jare osavaɨpo ramboeve imbaembae iyangarekoa Arsa jëta pe.

10Zimri ou chupe jare oyuka, oï vaerä jekovia pe mburuvicha guasurä. Kuae oiko veintisiete año ma Asa oiko Judá pe yave.

11Zimri oguapɨ rupive, opa oyuka Baasa iñemuña reta, oeyambae reve metei ave kuimbae ani ivɨa-ïru yepe, oyepɨ vaerä chupe.

12Jökorai Zimri omokañɨ opaete Baasa iñemuña reta, yandeYa omoërakua ikotɨ ñeemombeúa Jehú rupi rami,

13opaete Baasa jare taɨ Ela oyapo ikavimbae vae jeko pegua, echa jókuae mbaeyoa rupi oyapouka vi mbaeyoa Israel iñemuña reta pe, jökorai itumpa-raanga pota rupi omboarasɨuka reta yandeYa Israel iTumpa.

14Ïru mbaembae Ela regua, opaete oyapogüe oyekuatía oï tembikuatía pe, Israel pegua mburuvicha guasu reta regua oyekuatía oïa pe.

15Veintisiete año ma oiko Asa Judá pe yave, jare Israel iñemuña reta oyembojeyupa ñogüɨnoi opüa vaerä filisteo reta jëta Gibetón re yave, Zimri omboɨpɨ oï Tirsa pe. Ërei chiu ara ñoete oiko,

16echa jókuae ara sundaro reta oyembojeyupa ñogüɨnoi vae oikuaa Zimri opüa mburuvicha Baasa re jare oyuka vae, jayave opaete jókuae teyupa pegua sundaro reta oñono Omri mburuvicha guasurä Israel peguarä jae ko sundaro reta itenondegua ete.

17Jayave Omri jare opaete isundaro reta oïraro poi Gibetón jare yogüeru opa oñova Tirsa.

18Zimri oecha tëta opa ko oñeova yave, oike mburuvicha guasu jo japɨpe, jare oyatapɨ jese iyeupe jae oï reve japɨpe, jökorai omano.

19Kuae oasa, iyoa jare jeko mbaetɨ ikavi yandeYa jesa róvai jeko pegua, echa omomoe Jeroboam jeko, Israel iñemuña reta pe oyapouka mbaeyoa vae omomoe.

20Ïru mbaembae Zimri oyapogüe jare oñemopüa mburuvicha re vae regua oyekuatía oï tembikuatía pe, Israel pegua mburuvicha guasu reta regua oyekuatía oïa pe.

Omri oiko Israel pe

21Jayave Israel pegua reta oyemboyao mókoi pe. Metei yemboyao oyemboya Tibni, Ginat taɨ re, omboguapɨ vaerä mburuvicha guasurä, jare ïru yemboyao oyemboya Omri re.

22Ërei Omri re oyemboya vae reta imbaepuere yae Tibni, Ginat taɨ re oyemboya vae reta güi. Omano Tibni, jökorai Omri opɨta mburuvicha guasurä.

23Omri omboɨpɨ oï mburuvicha guasurä Israel re, treinta y un año ma oiko Asa mburuvicha guasurä Judá pe yave, doce año oiko mburuvicha guasurä; ova año oiko mburuvicha guasurä Tirsa pe.

24Omri ogua Semer güi ɨvɨtɨ Samaria, sesenta y seis kilo korepoti re, jare omopüa joko pe tëta guasu oñekëse kavi vae jare ombojee Samaria, echa jókuae ɨvɨtɨ iyagüe jee Semer.

25Omri oyapogüe mbaetɨ ikavi yandeYa jesa róvai, tenonde rupi mburuvicha guasu reta yogüɨreko vae güi oasa ete ye ikaviä,

26echa omomoe opaete Jeroboam, Nabat taɨ jeko, Israel iñemuña reta pe oyapouka mbaeyoa vae rupi, jökorai itumpa-raanga pota rupi omboarasɨuka reta yandeYa Israel iTumpa.

27Ïru mbaembae Omri oyapogüe, opaete imbaepuere regua oyekuatía oï tembikuatía pe, Israel pegua mburuvicha guasu reta regua oyekuatía oïa pe.

28Omano yave oñotɨ reta Samaria pe. Jare taɨ Acab oguapɨ jekovia pe mburuvicha guasurä.

Acab oiko Israel pe

29Treinta y ocho año ma oiko Asa Judá pe yave, Acab, Omri taɨ omboɨpɨ oï Israel pe.

30Jare veintidó año oiko mburuvicha guasurä Acab, Omri taɨ Israel re, tëta guasu Samaria pe, ërei jeko mbaetɨ etei ikavi yandeYa jesa róvai, tenonde rupi yogüɨreko mburuvicha guasu vae reta güi oasa ete ye ikaviä,

31echa omomoe Jeroboam, Nabat taɨ jeko oipoɨumbae reve. Jare Acab omenda Jezabel ndive, mburuvicha guasu Et-baal, Sidón pegua tayɨ ndive, jare omboɨpɨ omboete Baal.

32Jare oyapo mɨmba oyeyuka oyeapɨ jese vae, tupao Baal peguarä oyapo vae pe, Samaria pe.

33Oyapo vi Asera iä, jökorai oasa ete oyapo Acab opaete ïru mburuvicha guasu reta Israel pegua güi, tenonde yogüɨreko chugüi vae reta güi, jökorai omboarasɨuka yandeYa Israel iTumpa.

34Acab oiko yave, Hiel, Bet-el pegua omopüa ye Jericó. Kuae tëta iguapɨka reta omopüa yave omano chugüi taɨrɨpɨ Abiram, jare tëta guasu jöke reta oñono yave omano chugüi taɨ taɨkuegua ete Segub, jökorai oyembopo Josué, NunJos 6.26. taɨ omombeu Tumpa iñee jei vae.