2 MACABEOS 14 - Guarani Bible with DC

Nicanor oyapo mbɨakatu Judas ndive(1 Mac 7.1-38)

1Mboapɨ año ma oasa yave, Judas jare iñeïru reta pe jërakua Demetrio, Seleuco taɨ, ogüeyɨ ɨguasu güi Trípoli rupi jetagüe vae sundaro reta ndive,

2echa oyukauka ma yave Antíoco jare imborɨka Lisias, oyemboiya tëta guasu re.

3Alcimo jee vae, tenonde yave oikose sacerdote ruvicharä yave, jae etei oyemongɨa oñemoïru yave itumpa ambuae vae reta ndive, oecha ma yave yavai oyeepɨ vaerä jare opɨ̈ro ye vaerä mɨmba oyeyuka oyeapɨ jese vae jóvai,

4oñoväe mburuvicha guasu Demetrio ndive año ciento cincuenta y uno rupi, ombopota metei äka-regua oro pegua pe, karandaɨ joogüe jae olivo iyapokɨ reta tupao güɨrökuavee ñoi vae, ërei mbaetɨ imiari jae ndive.

5Ërei ou oväe iyemongeta pɨ̈chɨi vae oyapo vaerä. Demetrio oekauka mburuvicha iyokoka reta iyemboatɨ pe, jare oparandu chupe judío reta iyemongeta re. Alcimo jei:

6“Judío reta hasideo jei oyeero vae reta, juvicha jaeko Judas Macabeo, jae ko ñoraro jare tekorai iyapoa, jáeramo mbaetɨ yaiko pɨagüive kuae ɨvɨ pe.

7Jáeramo, che, yepe tëi opɨ̈ro reta ma chegüi mbota orerugüe reta oeya oreve vae, jae ko sacerdote ruvicharä aikota tëi vae, jeseve ayu pekotɨ mókoi mbae re:

8Tenonde ete, ayu ko mburuvicha guasu iporomborɨ amboete ramo; jare mokoía, jae ko aipota ramo teko kavi cherëtaɨgua reta pe, echa mbaetɨ ramo kia oñeapo jókuae chemiari jese vae reta re, yogüɨrekoasɨ yae cherëtaɨgua reta.

9Aiporu cheruvicha guasu pe, toparandu kavi kuae re, jare tomee mborookuai oepɨ vaerä orerëta, echa ko mburuvicha ipɨakavi yae jare iporerekua opaete vae ndive;

10Judas oikoveño oiko ramboeve ngaraaí ko tëta oiko pɨagüive.”

11Opa yave Alcimo imiari, jókuae mburuvicha guasu iñeïru reta omotareɨ ñoi Judas vae, jeiete ete omboarasɨuka ikotɨ Demetrio.

12Kuae oiparavo Nicanor, elefante re oñoraro vae reta juvicharä, ombojee Judea pegua reta isundaro ruvicharä.

13Jare oyókuai oyuka vaerä Judas jare opa vaerä omoai moai jupiegua reta, omboguapɨ ye vaerä Alcimo, sacerdote ruvicharä opaete tupao reta pe.

14Itumpa ambuae vae Judea pegua reta, oyemboya Nicanor kotɨ, echa ipɨa pe ko ñogüɨnoi kavita echa judío reta iñamɨri yave.

15Nicanor ou ma oväe jare itumpa ambuae vae reta oporepeña ma vae, jërakua yave, judío reta oyatɨ ɨvɨkúi pe iñäka jare oyerure Tumpa pe, echa jae oñererökuavee omborɨ reta vaerä jekuae kuae avei.

16Juvicha omee yave ñee chupe reta, omboɨpɨ oguata joko güi, jare okua oyoe reta tovaicho ndive tëta Hadasa pe.

17Judas jëtara, Simón, oñoraro yave oï Nicanor ndive, güɨramoi peguaño oa jese ïru tovaicho reta, jáeramo mbaetɨ oë kavi mbatee chupe iñoraro.

18Ërei ngatu, Nicanor oikuaa katu yae, Judas jare iñeïru reta ipoki yae ñoraro pe ramo, oipoɨu oipɨɨ tembiporu.

19Jáeramo omondo Posidonio, Teodoto jare Matatías, iñɨ̈ro vaerä oyoupe judío reta ndive.

20Opa ma yave oyemongeta kavi kuae re, Judas omombeu isundaro reta pe, ipɨakatu opɨta opɨta ñee güeru jovaicho reta chupegüe re.

21Ombojee reta ara oyomboatɨ tee vaerä mburuvicha katuai. Sundaro atɨ ñavo güi ombou reta guataka, jare oñono reta guapɨa yomboete pegua.

22Judas opa voi ma oñonondaivi isundaro reta, güɨramoi tovaicho reta iyapu pegua. Ërei imiari reta ma yave, omboyoupíe iyemongeta.

23Nicanor opɨta oporomoambekombae mbovɨ ara katu Jerusalén pe. Opa vi omboyerova isundaro jupiegua reta.

24Mbaetɨ etei osɨrɨ Judas güi echa oyopokuaa katu yae jae ndive,

25jei chupe omenda vaerä jare oñemuña vaerä joko pe. Judas oyapo jae oiporu chupe vae jare ovɨakatu reve oiko.

Oyemboɨpɨ ye tekorai

26Alcimo, oecha Judas oyopokuaa katu yae Nicanor ndive, jare oecha ma yave yemongeta jae reta oikuatiagüe, ojo oeka Demetrio, jei vaerä chupe Nicanor oyemongeta pɨ̈chɨi oï jëta kotɨ vae, jáeramo ombojee iyokokarä Judas, jokuaeɨgua reta jovaicho.

27Mburuvicha guasu iyarasɨ yae, echa güɨrovia kuae ipɨapochɨ vae iyapu chupegüe. Oikuatía tupapire Nicanor pe, jei chupe mbaetɨta ko ikɨ̈reɨ oñoraro vae jare oyókuai oyokenda vaerä ɨmambae pegua Macabeo jare omondo Antioquía kotɨ.

28Ërei Nicanor, oipɨɨ yave kuae tupapire ipɨayemoambeko yae oyapo echa jae ñäteɨ opia jókuae ñomoïru güɨnoi reta vae güi, echa Judas mbaetɨ mbae pɨ̈chɨi vae oyapo.

29Ërei, mburuvicha guasu iporookuai ko jókuae, jáeramo oeka eka tëi kerupi opia vaerä kuae mborookuai güi.

30Ërei ngatu Macabeo oecha yave Nicanor mbaetɨ ma ipɨakatu jae ndive tenonde rami, jare jembiapo rupi oeka vɨari tekorai oiko ramo, omboatɨ mbovɨ katu rupi jupiegua reta jare oñemi Nicanor güi.

31Nicanor oecha yave Judas omopane kavi yae, ojo tupao ikɨa mbae vae kotɨ sacerdote reta ombaeyuka ñogüɨnoia pe, jare oyókuai reta omee vaerä chupe Judas.

32Jae reta jaei iyapumbae reve chupe mbaetɨ ko oikuaa ketɨ ko oime oï jókuae mbɨa Nicanor oeka vae,

33jayave, opövee reve iyakatu pe tupao re, jei: “Mbaetɨ yave peru cheve Judas, opata amboai kuae tupao, jare jekovia pe amopüata Baco itupao.”

34Opa yave kuae ñee omoe, ojo joko güi. Sacerdote reta omopüa ipo ara kotɨ jare omboɨpɨ reta oyerure Tumpa oporoepɨ ñomai ikotɨ reta vae pe, körai:

35“Nde, cheRu, mbaetɨ mbae oata ndeve vae, reiparavo orepɨte pe kuae tupao nderendarä.

36Añave, cheYa ikɨambae vae, agüɨye emaeño toa ñemomarai pe ndero, echa opa ramo ko oyekɨayoe.”

Razís imano

37Jayave oñeapo reta Razís re Nicanor pe, jae ko Jerusalén pegua, kuae mbia oyemoambeko yave jëtaɨgua reta re vae, iyarakuaa katu yae, echa ipɨakavi opaete vae ndive, jáeramo: “Judío reta tu”, jei ombojee reta,

38tenonde yave maemegua iara pe, añave opövee jese reta jëta oepɨ ramo, ërei jae, ikuimbae reve, omee jete jare jekove jókuae teko re.

39Nicanor omoañete vaerä iyarasɨ judío reta kotɨ, omondo 500 sundaro reta oipɨɨ vaerä Razís,

40echa jayave echa jasɨ katu yaeta judío reta pe.

41Sundaro oporepeña Razís joɨvate re, omoaña reta jöke, echa ko ou yeokuai chupe reta öke oapɨ vaerä, Razís oecha mbaetɨ ma jape yave, ojäa iyé kɨsepuku guasu,

42ikɨ̈reɨ ramo omano kavi, ñäteɨ ramo vi oiko kuri yeangao rupi omano yave jókuae iporoyukaasɨ katu vae reta ipo pe.

43Ërei ñoraro pe oyombokepeguaiño ramo, jae oyeavɨ oyekutu; jökorai yave, tovaicho reta ou ma oyemboɨ jöke pe, ërei jae osɨi täta rupi oguambɨ guasu kotɨ, jare oa ɨvate güi jeta vae reta ñogüɨnoia kotɨ,

44ërei ɨvɨ kotɨ ñogüɨnoi vae reta osɨrɨ jenda güi jare, jae paravete oa ou ɨvɨ re etei.

45Ndei ipɨtuëpa mbove, yavaete yé ipere reve, opüa yeño tugüɨ katuai, jare osɨi sundaro reta ipɨte rupi, oyemboɨ metei ita guasu iyapɨte re jare,

46jete tugüɨ katuai reve omondoro ichuri reta, joko güi omopüa reve ipo, omombo sundaroatɨ reta re, oiporu reve tekove iya pe omee ye vaerä arakae yave chupe. Jökorai omano.